ق ر پرەمەر-مينيسترى باقىتجان ساعىنتايەۆ استاناعا جۇمىس ساپارىمەن كەلگەن بوليۆيانىڭ سىرتقى ىستەر ءمينيسترى فەرناندو ۋاناكۋني مامانيمەن كەزدەستى. بۇل تۋرالى Qamshy.kz اقپارات اگەنتتىگى پرەمەر-مينيستردىڭ باسپا ءسوز قىزمەتىنە سىلتەمە جاساپ حابارلايدى.

كەزدەسۋ بارىسىندا ەنەرگەتيكا، مادەنيەت، عىلىم جانە ءبىلىم بەرۋ سالالارىنداعى ەكىجاقتى ساۋدا-ەكونوميكالىق ىنتىماقتاستىق ماسەلەلەرى تالقىلاندى. ەكى تاراپ، سونداي-اق، مۇناي حيمياسى، اۋىل شارۋاشىلىعى، كولىك سالالارىندا، تازا تەحنولوگيالاردى دامىتۋ مەن جاڭعىرتىلاتىن ەنەرگەتيكا سالالارىندا بىرلەسكەن ينۆەستيسيالىق جوبالاردى قۇرۋ مەن ىسكە اسىرۋعا مۇددەلى ەكەندەرىن ءبىلدىردى.

فەرناندو ۋاناكۋني ءمامانيدىڭ ايتۋىنشا، بوليۆيا تەك قانا گاز سەكتورىندا ەمەس، سونىمەن قاتار سيرەك كەزدەسەتىن مەتاللدار مەن اتوم ونەركاسىبى سالالارىندا دا سەرىكتەستىكتى دامىتۋعا ءازىر.

باقىتجان ساعىنتايەۆ ەكىجاقتى ىنتىماقتاستىقتىڭ نىعايا تۇسۋىنە قىزىعۋشىلىق ءبىلدىرىپ، فەرناندو ۋاناكۋني مامانيگە قازاقستاننىڭ حالىقارالىق ەكسپو-2017 كورمەسىن وتكىزۋىنە قولداۋ بىلدىرگەنى ءۇشىن العىس ايتتى.