اقمولا وبلىسى اكىمىنىڭ قولداۋىمەن ۇيىمداستىرىلعان ۆەلومارافونعا قاتىسقان بەلگىلى قازاقستاندىق مارافونشى، «گيننەس رەكوردشىسى» بالعاباي كۇلپەيسوۆ جولاي ماكينسك قالاسىنا سوعىپ كەتتى. مارافون بۋرابايداعى ابىلايحاننىڭ الاڭىنان باستاۋ الىپ، استانا قالاسىنداعى ەكسپو قالاشىعىنا دەيىن ءجۇرىپ ءوتتى، دەپ حابارلايدى Qamshy.kz اقپارات اگەنتتىگى اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

اسا ۇزاق جۇگىرىستەرگە قاتىسقانى ءۇشىن گيننەس رەكوردتار كىتابىنا ەنگەن تاجىريبەلى مارافونشى بالعاباي كۇلپەيسوۆ 1993 جىلدان باستاپ ءوزىنىڭ مارافوندارىن «ۇلىلارعا تاعزىم» دەگەن اتپەن قازاق ەلىنىنىڭ اقىندارى مەن باتىرلارىنا، تاريحي ماڭىزى بار داتالارعا جانە وقيعالارعا، سونىمەن قاتار بەلگىلى ساياساتكەرلەر مەن قوعام قايراتكەرلەرىنە ارناپ كەلەدى. مىسالى، 2007 جىلى سپورتشى استانادان ۋكراينالىق دنەپرودزەرجينسك قالاسىنا دەيىن 3 500 شاقىرىم جۇگىرىپ وتكەن. بۇل جۇگىرىستى مارافونشى ۋكراينادا وتكەن قازاقستان جىلىنا ارناعان ەكەن.

بالعاباي كۇلپەيسوۆ كوپتەگەن ەلدەردە بولىپ، 90-شى جىلداردا قۇنانباي مەن قاجىمۇقاننىڭ جولىن قايتالاپ، مەككەگە دەيىن بارعان. بۇگىندە مارافونشى 60 جاستا. ولەڭدەر جازىپ، وتكەن ومىرىنەن الىنعان كوپتەگەن قىزىقتى وقيعالارمەن بولىسۋگە ىنتىزار. باسقا ەلدەردە وتكەن مارافون جۇگىرىستەرى كەزىندە تالاي قىزىق ءارى تانىمال ادامدارمەن كەزدەسكەنىن ايتىپ وتىرادى.

ومىرلىك ۇستانىمى – «اشىق بول، سوندا سەنىڭ الدىڭدا بارلىق جولدار اشىلادى». مارافونشىنىڭ ومىرلىك ۇستانىمى جانە سپورتقا دەگەن اۋەستىگى وزگەلەرگە ۇلگى بولۋعا ابدەن لايىق.