استانا ەكسپو-2017 حالىقارالىق كورمەسى جاپون پاۆيلونىنا كەلۋشىلەر سانى 16 تامىز كۇنى 500 000-نان استى. كورمە اشىلۋىنىڭ العاشقى كۇندەرىندە كەلۋشىلەر سانى شامامەن 6000-عا جەتكەن جاپون پاۆيلونىنىڭ تامىز ايى باستالعالى، كەلۋشىلەردىڭ ورتا سانى 8000-عا شاق كەلدى. ءار ءتۇرلى ەلدەردىڭ ساياسي جانە بيزنەس الەمىنىڭ ساڭلاقتارى، كىشىدەن باستاپ ۇلكەنگە دەيىن قازاقستان تۇرعىندارىمەن بىرگە الەمنىڭ تۇپكىر-تۇكپىرىنەن دە كوپتەگەن قوناقتار كەلىپ جاتىر دەپ حابارلايدى Qamshy.kz اقپارات اگەنتتىگى.
جاپون پاۆيلونىنىڭ 500 000-شى كەلۋشىسى قوستاناي وبلىسى، رۋدنىي قالاسىنان كەلگەن امانگارايەۆ نۇرىم جانە ونىڭ وتباسى بولدى. امانگارايەۆ نۇرىم پاۆيلوندى كورگەننەن كەيىن، كەلەسىدەي ءوز اسەرىمەن ءبولىستى: «ەكسپو كورمەسىن كورۋ ءۇشىن تۇنگى پويىزبەن كەلدىك. جاپون پاۆيلونىنا وسىنداي ەرەكشە ساتتە كەلگەنىمىزگە وتە قۋانىشتىمىز. جاپون پاۆيلونى جايىندا ايتاتىن بولسام، ويلاعانىمىزداي جاپونيا شىنىمەن جوعارى تەحنولوگيالارعا باي ەل ەكەنىنە كوزىمىز جەتتى».
جاپون پاۆيلونىنا كەلۋشىلەر سانى 500 000-نان اسىپ، جاپون پاۆيلونىنىڭ ديرەكتورى ششيباموتو حيدەكادزۋ كەلەسىدەي ءسوز سويلەدى: «جاپونيانىڭ تانىمال جوعارى تەحنولوگيالارى تۋرالى عانا ەمەس، جاپونداردىڭ قورشاعان ورتاعا دەگەن قامقورلىعى جانە تابيعاتى مەن مادەنيەتى جايىندا بارىنشا كوپتەگەن ادامدار بىلسە ەكەن دەگەن ويدامىز».
استانا ەكسپو-2017 حالىقارالىق كورمەسى 2017 جىلى 10 ماۋسىم (سەنبى) مەن 10 قىركۇيەك (جەكسەنبى) ارالىعىندا 93 كۇن استانادا وتەدى. 115 مەملەكەت پەن 22 حالىقارالىق ۇيىم اتالمىش كورمەنىڭ تاقىرىبىن اشاتىن «بولاشاق ەنەرگياسى» مەن مادەنيەتىن تانىستىراتىن ەكسپوزيسيالارىن ۇسىنىپ جاتىر. استانا ەكسپو-2017 حالىقارالىق كورمەسىنە تولىعىمەن 2 ملن. 265 مىڭ ادام كەلدى (14 تامىز «استانا ەكسپو-2017» ۇلتتىق كومپانياسى مالىمەتىنە سايكەس).
جاپون پاۆيلونىندا «Smart Mix with Technology» تاقىرىبى نەگىزگە الىنا وتىرىپ، جاپونيا تەحنولوگيالىق كۇشىمەن بۇكىلالەمدىك پروبلەمالاردى شەشۋ ءۇشىن ءوز ۇلەسىن قوسپاقشى. سونىمەن قاتار، 2025 جىلعى حالىقارالىق كورمە وتكىزىلۋ ورنىنا كانديدات وساكا قالاسى جان-جاقتى تانىستىرىلىپ جاتىر.
كەڭ ەكراندى مونيتوردا كورسەتىلەتىن بەينە مەن سمارتفون قوسىمشاسىمەن بايلانىسقان ينتەراكتيۆتى قويىلىم مەن كورسەتىلىمى، وزگە ەل پاۆيلوندارى ءوز كورمە مازمۇنىن ورىس تىلىندە تانىستىرىپ جاتقاندا قازاق ءتىلىن نەگىزگى ءتىل رەتىندە كورمەنى تانىستىرعان جاپون پاۆيلونى كوپتەگەن كەلۋشىلەردىڭ جوعارعى باعاسىنا يە بولىپ وتىر.
