تىۆا رەسپۋبليكاسىنىڭ قىزىل قالاسىندا "قازاقكونسەرتتىڭ" ونەرپازدارى ەل مەرەيىن تاعى ءبىر مارتە ۇستەم ەتتى دەپ حابارلايدى Qamshy.kz اقپارات اگەنتتىگى "قازاقكونسەرت" مەملەكەتتىك كونسەرتتىك ۇيىمىنىڭ باسپا ءسوز قىزمەتىنە سىلتەمە جاساپ.

ءداستۇرلى تۇردە جىل سايىن وتەتىن "كومەي ءانىن ورىنداۋشىلار فەستيۆالىنە" بيىل قازاقستان تاراپىنان "نوماد" ەتنو-فولكلورلىق ءانسامبلى قاتىسقان. جاپونيا، نورۆەگيا، كانادا، فرانسيا، يسپانيا، اقش، حاكاسيا جانە تاعى دا باسقا ەلدەر فەستيۆالگە قاتىستى. بارلىعى 23 ەل ب ا ق سىناعان سايىستا قازاقستاندىق ونەرپازدار "ەڭ ۇزدىك انسامبلدىك سۇيەمەلدەۋ" اتالىمى بويىنشا سۋىرىلىپ العا شىعىپ، ارنايى ديپلوممەن ماراپاتتالدى.

تىۆاداعى "حوومەي" ورتالىعىنىڭ ديرەكتورى يگور كوشكەندەي "نومادتىقتارعا" وزدەرىنىڭ ۇلتتىق اسپابىن سىيعا تارتتى. تىڭدارمانداردىڭ ىستىق ىقىلاسىنا بولەنگەن جەرلەستەرىمىز رەسەيلىك راديو، تەلەارنالارىنا تىكەلەي ەفيردە سۇحبات بەردى. ءانسامبلدىڭ كوركەمدىك جەتەكشىسى ەرلان اسقاربەكوۆتىڭ حابارلاۋىنشا، ءداستۇرلى تۇردە وتەتىن سايىسقا قازاقستان بيىل ءبىرىنشى رەت قاتىسىپ وتىر. سوندىقتان ۇيىمداستىرۋشىلار، وزگە قاتىسۋشىلار مەن كورەرمەندەر تاراپىنان "نومادتى" تىڭداۋعا دەگەن ىقىلاسى ەرەكشە بولدى. ءبىزدىڭ ونەرپازدار سەنىمدى اقتاپ، كوپشىلىكتىڭ ىشىندە ەرەكشەلەنە الدى. ەلىمىزدىڭ مەرەيىن ارتتىرعان ۇجىمعا شىعارماشىلىق تابىس تىلەيمىز!