ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان ۇلتتىق كودىمىزدى جاڭعىرتۋ ماقساتىندا وڭتۇستىك قازاقستاندىق ونەرتاپقىش دومبىرانىڭ ەلەكتروندى نۇسقاسىن ويلاپ تاۋىپ، قولدانىسقا ەنگىزدى، دەپ حابارلايدى Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.
ەندى دومبىرانى ۇيالى تەلەفونىڭىزدان تارتىپ، ءان شىرقاۋىڭىزعا بولادى. ەگەر ۇيرەنگىڭىزگە كەلسە، تەگىن جۇكتەۋگە دە مۇمكىندىك تۋىپ وتىر. «Apple» كومپانياسى ماقۇلداعان بۇل باعدارلامانىڭ اۆتورى – وڭتۇستىك قازاقستاندىق ءىT مامان نۇرلان قامبار. ونەرتاپقىش جىگىت اتالعان باعدارلامانى جۋىردا عانا اقش-تاعى «Apple» كومپانياسىنا ماقۇلداتىپ، اۆتورلىق قۇقىق يەسى اتاندى.
بۇگىندە نۇرلان باۋىرجان ۇلى الماتىداعى سۇلەيمەن دەميرەل اتىنداعى ۋنيۆەرسيتەتىنىڭ اقپاراتتىق جۇيەلەر ماماندىعىنىڭ 2-كۋرسىندا وقيدى. جاستايىنان وقۋدا وزات بولىپ، زەيىنى زەرەك وسكەن نۇرلاننىڭ الداعى ارمانى - اتاقتى ءىT مامان اتانۋ.
دومبىرانىڭ ەلەكتروندى نۇسقاسىن ويلاپ تاپقان 20 جاسار جىگىتكە بۇل يدەيا استاناداعى ەكسپو كورمەسىنە بارعاندا كەلىپتى. نۇرلاننىڭ بۇل يدەياسىن ىسكە اسىرۋعا «قازاقستاندىق ستيۆ دجوبس» اتانىپ كەتكەن ارمان سۇلەيمەنوۆ اقىل-كەڭەس بەرىپتى.
«قازىرگى تاڭدا قازاق جاستارى جاڭاشىلدىققا ۇمتىلىپ، جاڭا تەحنولوگيالاردى يگەرۋگە كۇش سالىپ جاتىر. سولاردىڭ ءبىرى رەتىندە مەن دە ءوز باعىمدى سىناپ كورۋدى ءجون ساناپ، العاشقى ەڭبەگىمدى جۇزەگە اسىرۋعا تىرىستىم. بۇل باعدارلامانىڭ ءبىر ەرەكشەلىگى – دومبىرا ۇيرەنۋگە ءارى دومبىرا جوق جەردە ۇيالى تەلەفوننان كۇي نەمەسە ءان تارتۋعا مۇمكىندىك بەرەدى. اتالعان باعدارلامانى مىنا سىلتەمەدەن مىنا سىلتەمەدەن تەگىن جۇكتەپ الۋىڭىزعا بولادى»، - دەيدى ونەرتاپقىش.
بۇگىندە ول جازعى دەمالىس كەزەڭىن پايدالانىپ استانا قالاسىنداعى نازاربايەۆ ۋنيۆەرسيتەتىندەگى ءىT مامانداردان ارنايى ساباق الىپ ءجۇر.
