شەكاراشىلار ەسكەرتۋىن ەلەمەي، ولارعا قارسى تاس اتىپ، شەكارادان زاڭسىز جىلقى وتكىزبەك بولعان جامبىل وبلىسىنىڭ تۇرعىندارى انىقتالدى. بۇل تۋرالى ۇلتتىق قاۋىپسىزدىك كوميتەتى ءتوراعاسىنىڭ ورىنباسارى، شەكارا قىزمەتىنىڭ ديرەكتورى ەكسكليۋزيۆتى سۇحباتىندا ايتتى. زاڭسىز ارەكەتكە جول بەرگەندەردىڭ بارلىعى تەرگەلىپ جاتىر. دارحان ءدىلمانوۆتىڭ ايتۋىنشا، ولار قىرعىزستاننان كەلگەن كونتراباندالىق جۇكتى، ياعني جىلقىنى شەكارادان زاڭسىز وتكىزبەك بولىپ، قورشاۋلاردى بۇزعان دەپ حابارلايدى Qamshy.kz اقپارات اگەنتتىگى استانا ارناسىنا سىلتەمە جاساپ.

دارحان ءدىلمانوۆ، ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى، شەكارا قىزمەتىنىڭ ديرەكتورى:

"زاڭبۇزۋشىلىققا قاتىسقان بارلىق تۇلعالارعا قاتىستى جانە شەكارا قىزمەتىندەگى ينجەنەرلىك-تەحنيكالىق نىسانعا نۇقسان كەلتىرگەن بارلىق تۇلعالاردىڭ ارەكەتى انىقتالىپ، ءقازىر ولارعا قاتىستى تەرگەۋ امالدارى جۇرگىزىلىپ جاتىر. جۋىق ارادا بارلىق ناتيجەلەر بەلگىلى  بولادى".

ەسكە سالايىق، وتكەن جەكسەنبىدە جامبىلداعى قازاق-قىرعىز شەكاراسىندا وق اتىلىپ، ادام ءولدى. شەكارا قورشاۋلارىن بۇزباق بولعان 20 شاقتى ادامدى شەكاراشىلار توقتاتپاق بولادى. الايدا ولار ساقشىلارعا تاس اتىپ، جاراقاتتايدى. زاڭسىزدىقتى توقتاتۋ ءۇشىن شەكارا قىزمەتكەرى وق اتىپ، ءبىر ادام اجال قۇشادى. ءقازىر ەكى تاراپقا قاتىستى قىلمىستىق ءىس قوزعالدى. شەكاراشىنىڭ قارۋ قولدانۋ ارەكەتىنىڭ زاڭدىلىعى دا تەكسەرىلمەك.