1 ماۋسىم 15 تامىز ارالىعىندا استانا قالاسىنىڭ جۇمىسپەن قامتۋ ورتالىعى ارقىلى 2500-گە جۋىق ادام جۇمىسقا ورنالاستىرىلعان دەپ Qamshy.kz اقپارات اگەنتتىگى استانا قالاسى اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.

استانا جۇمىسسىزدىق دەڭگەيى بويىنشا ەڭ تومەنگى كورسەتكىشپەن كوش باستاپ تۇر. 1 تامىزعا دەيىنگى جاعداي بويىنشا 10 000 جاڭا جۇمىس ورنى اشىلىپ، ولاردىڭ قاتارىندا شاعىن جانە ورتا بيزنەس تە بار. 

«حالىقارالىق مامانداندىرىلعان EXPO-2017 كورمەسىن وتكىزۋ بارىسىندا استانا قالاسى اكىمدىگىنىڭ حالىقتى جۇمىسپەن قامتۋ ورتالىعىنا 4 012 تۇرعىن جۇمىسقا ورنالاستىرۋ وتىنىشىمەن كەلدى. ولاردىڭ 2409 ادامى جۇمىسسىزدىقتان الەۋمەتتىك قورعاۋمەن قامتىلدى. جۇمىس بەرۋشىلەر اراسىندا قوناق ءۇي ماماندىقتارى بويىنشا سۇرانىس وسكەن، بۇل – اسپاز، قوناق ءۇي بيزنەسىنىڭ مەنەدجەرى، گيد-اۋدارماشىلار، قىزمەت كورسەتۋشىلەر. مىسالى، ءبىزدىڭ ورتالىق ارقىلى EXPO-2017 كورمەسى اۋماعىنداعى جاڭا «Hilton» وتەلىنە 100 ادام جۇمىسقا تۇردى»، – دەپ حابارلادى استانا اكىمدىگىنىڭ جۇمىسپەن قامتۋ ورتالىعى باسپا ءسوز قىزمەتىنىڭ باسشىسى اياجان ايتجانوۆا استانا كونۆەنشن بيۋرو كومپانياسىنىڭ وكىلدەرىنە. 

رەسمي مالىمەتتەرگە ساي، اتالعان دەپارتامەنت ستاتيستيكاسى بويىنشا 2017 جىلدىڭ ءىى توقسانىندا استانادا جۇمىسسىزدىق دەڭگەيى 4،5% قۇراعان (جىلدىق جوسپار بويىنشا 4،7%).