ەحرو كورمەسىندە ۆەنگريا ەلىنىڭ ۇلتتىق كۇنى تويلانىپ جاتىر. وسىعان وراي ۇلتتىق كۇن ساحناسىندا سالتاناتتى شارا ۇيىمداستىرىلدى. بۇل تۋرالى Qamshy.kz اقپارات اگەنتتىگى khabar.kz-كە سىلتەمە جاساپ حابارلايدى.

ءداستۇرلى كيىم كيگەن ماجارلىق ونەرپازدار قىپشاقتاردىڭ تۇرمىس-سالتىن كورسەتىپ، ءداستۇرلى مۋزىكاسىن ورىندادى. ماجار حالقى ەجەلدەن وزدەرىن قىپشاقتان تاراعان ۇرپاق ەكەندەرىن ايتىپ كەلەدى. سوندىقتان بولار ماجار مەن قازاق حالىقتارىنىڭ ءسالت-داستۇرى، ادەت-عۇرپى وتە ۇقساس. سونداي-اق، 3 كۇن بويى ۆەنگريا پاۆيلونىندا قىپشاق كۇندەرىن تويلايدى.  412 شارشى مەتر اۋماقتى الىپ جاتقان پاۆيلوندا تابيعي رەسۋرستارعا باسىمدىق بەرىلگەن. ياعني كۇن، جەل جانە سۋدان قۋات الاتىن تىڭ جاڭالىقتارىن بەينەروليكتەر ارقىلى كورسەتىپ بەرەدى. ولار قاراپايىم اعاش جاپىراقتارىن سينتەزدەۋ ارقىلى قۋات الۋعا بولاتىندىعىن دالەلدەدى. سونىمەن قاتار پاۆيلوننىڭ قاق ورتاسىندا «ءومىر اعاشى» دەپ اتالاتىن ۇلكەن بايتەرەك ورناتىلعان. 

ايتا كەتۋ كەرەك، بۇگىندە بۋداپەشت كوشەلەرىندە بەنزينمەن ەمەس، توقپەن جۇرەتىن اۆتوبۋستار جۇيتكيدى.

دجوردج كوسسا، ەكولوگيالىق كولىك شىعاراتىن كومپانيا باسشىسى:

– ءبىز ەلەكتر ەنەرگياسى ارقىلى جۇرەتىن اۆتوبۋستاردى شىعارا باستادىق. بۇل – قورشاعان ورتانى لاستامايتىن ەكولوگيالىق تازا كولىك. «جاسىل» تەحنولوگيانىڭ دامۋىنا وسىلايشا ءوز ۇلەسىمىزدى قوسپاقپىز. ال ەحرو-2017 كورمەسى ارقىلى جاڭا جوبالارمەن تانىسۋعا مۇمكىندىك تۋدى.