بۇگىن ۇكىمەت ۇيىندە ق ر ينۆەستيسيالار جانە دامۋ ءمينيسترى جەڭىس قاسىمبەكتىڭ قاتىسۋىمەن مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىندا بەرگەن تاپسىرماسىن ورىنداۋعا بايلانىستى تەحنولوگيالىق جاڭعىرتۋ ءبولىمى بويىنشا باسپا ءسوز ءماسليحاتى ءوتتى دەپ حابارلايدى Qamshy.kz  اقپارات اگەنتتىگى  ق ر ينۆەستيسيالار جانە دامۋ مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.

جەڭىس قاسىمبەكتىڭ ايتۋىنشا، ەلىمىز يندۋستريا 4.0 تەحنولوگياسىنا كوشۋ پروسەسى الەم بويىنشا ءالى باستاپقى كەزەڭدە كەلەدى. دامىعان جانە تەز دامۋشى ەلدەردىڭ باسىم كوپشىلىگى وزدەرىنىڭ ۇلتتىق سيفرلى ترانسفورماسيا ستراتەگيالارىن تەك سوڭعى 3-4 جىلدا عانا ىسكە اسىرۋعا كىرىستى (گەرمانيا 2011 جىلى، اقش – 2012، جاپونيا، جۇڭگو، ەۋرو وداقتىڭ باسقا دا ەلدەرى – 2014-2015 جىلدارى قابىلدادى). حالىقارالىق ساراپشىلاردىڭ ايتۋىنشا، يندۋستريا 4.0 اياسىندا ازىرگە ءبارى تولىق وزگەرىپ كەتەدى دەگەن تۇسىنىك جوق. ونەركاسىپتەردىڭ جاڭا ستاندارتقا تۇبەگەيلى كوشۋى الداعى 10-15 جىلعا بولجانىپ وتىر.

«بىزدە بۇل پروسەستەن قالماۋدىڭ مۇمكىندىگى بار. مۇنداعى ماسەلەنىڭ بارلىق قيىندىقتارىنا قاراماستان، ءبىز يندۋستريا 4.0 تەحنولوگياسى قازاقستان ءۇشىن جاڭا مۇمكىندىكتەر اكەلەتىنىن كورىپ وتىرمىز. سونىڭ ىشىندە تيىمدىلىكتى ارتتىرۋ، جاڭا بيزنەس پەن ەكسپورتقا باعىتتالعان ءوندىرىس قۇرۋ ماسەلەلەرىن ايتۋعا بولادى»، – دەپ اتاپ ءوتتى ق ر ينۆەستيسيالار جانە دامۋ ءمينيسترى.

مينيسترلىك جىل باسىنان بەرى ءتيىستى شارالاردى ازىرلەۋدە بەلسەندى جۇمىستار اتقارىپ كەلەدى.

«بيىل قىركۇيەك ايىندا حالىقارالىق ساراپشىلارمەن بىرگە ونەركاسىپتەردىڭ يندۋستريا 4.0 تەحنولوگياسىنا وتۋگە دايىندىعىنىڭ تەحنيكالىق تالداۋىن اياقتايمىز. ال جىل سوڭىنا قاراي 2025 جىلعا دەيىن يندۋستريا 4.0 ەلەمەنتتەرىن ەنگىزۋ بويىنشا ۇكىمەت قاۋلىسىنا سايكەس قادامدىق جوسپاردى قابىلدايمىز»، – دەدى جەڭىس قاسىمبەك.

سونىمەن قاتار مينيسترلىك ERG، KazZinc، ArcelorMittal، قازاقمىس جانە باسقا دا جۇيەقۇراۋشى ءىرى كومپانيالارمەن جۇمىس جۇرگىزىپ كەلەدى.

«بۇگىنگى تاڭدا اتالمىش كاسىپورىندار وزدەرىنىڭ سيفرلى جاڭعىرۋ جوسپارلارىن دايىنداپ، «اقىلدى كەنىش» سياقتى باعدارلامالارىن ىسكە اسىرۋعا كىرىسىپ كەتكەنىن اتاپ وتكەن ءجون. وندا بارلىق دەرەكتەردى تالداۋ،  الدىڭعى قاتارلى داچيكتەر مەن سەنسورلار، ينتەگراسيالانعان اقپاراتتىق جۇيەلەر (ERP، MES)، روبوتتاندىرۋ وپەراسيالارى سياقتى تاعى باسقا دا تەحنولوگيالار ەنگىزىلەتىن بولادى. مىسالى، ERG كومپانياسى الداعى 7-8 جىلدا شامامەن 800 ملرد. تەڭگەنىڭ سيفرلاندىرۋ جوباسىن ينۆەستيسيالاۋدى جوسپارلاپ وتىر»، – دەپ مالىمدەدى مينيستر.