ق ر ەنەرگەتيكا ءمينيسترى قانات بوزىمبايەۆ انتيرەسەيلىك سانكسيالاردان قازاقستانعا كەلەتىن قاۋىپ-قاتەر تۋرالى جۋرناليستەر سۇراعىنا جاۋاپ بەردى دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

«قازىرگى ۋاقىتتا بۇل ماسەلەنى مۇقيات زەرتتەپ جاتىرمىز. بۇل سانكسيالار اقش سەناتىندا قارالىپ جاتقاندا-اق رەسەيلىك جانە امەريكالىق ارىپتەستەرمەن بايلانىستا بولعانىمىزدى جاسىرمايمىن. وندا نە جازىلاتىنىن دا الدىن الا تۇسىندىك»، – دەيدى ق.بوزىمبايەۆ ۇكىمەت ۇيىندە وتكەن باسپا ءسوز ءماسليحاتىندا جۋرناليستەر سۇراعىنا جاۋاپ بەرە وتىرىپ.

مينيستر قازاقستاننىڭ ەڭ الدىمەن كاسپيي قۇبىر جەلىسى كونسورسيۋمىنا (كقك) قاتىستى الاڭداۋشىلىق بىلدىرگەنىن اتاپ ءوتتى.

«ءقازىر كقك ساراپتاما جۇرگىزۋمەن اينالىسىپ جاتىرمىز. ايتارلىقتاي قاۋىپ-قاتەر جوق سەكىلدى. سەبەبى، كقك قۋاتتىلىعىن ارتتىرۋ بويىنشا نەگىزگى جۇمىس اتقارىلىپ قويعان. تەك بىرنەشە نىسانداردى ىسكە قوسۋ ماسەلەلەرىن اياقتاۋ عانا قالعان. وسىعان بايلانىستى وسى قۇبىر جەلىسى جۇيەسىنە تۇسەتىن قاشاعان جانە تەڭىز مۇنايلارىنىڭ بولاشاقتاعى كولەمىمەن ەش قيىندىق بولماۋى ءتيىس»، – دەدى ق.بوزىمبايەۆ.

الايدا مينيستر ۆولگودون ماسەلەسىنىڭ بار ەكەنىن ەسكە سالدى. «تەڭىز كەن ورنىن كەڭەيتۋدەگى ۆولگودونعا قولجەتىمدىلىك ماسەلەسى بار. مۇندا دا رەسەيلىك جانە امەريكالىق ارىپتەستەرىمىزبەن بەلسەندى جۇمىس ىستەيتىن بولامىز. بۇگىنگى كۇن مەن الداعى 3-5 جىل تۋرالى ايتار بولساق، قانداي دا ءبىر قاۋىپ-قاتەردى بايقاعان جوقپىز. وزدەرىڭىز بىلەسىزدەر، گازدى ەكى مەملەكەتكە ساتىپ وتىرمىز. رەسەيمەن كەلىسىمشارت قازان ايىنان بەرى ءوز كۇشىندە، قىتايمەن گاز ەكسپورتى جونىندە كەلىسىمشارت بەكىتتىك. قىتايداعى مۇمكىندىكتەرىمىز 10 ملرد-قا دەيىن جەتەدى، بيىلعى گازدى گازپروم-گاز ارقىلى ساتاتىن شىعارمىز. باكۋ، باتۋمي قالالارىندا دا مۇناي قۇبىرلارىن پايدالانۋ مۇمكىندىكتەرى ىسكە قوسىلماعان، قاجەت بولعان جاعدايدا قوستىرۋعا بولادى. ءبىراق ازىرگە ەكونوميكا بويىنشا ەڭ وڭاي ءتاسىلى – نوۆوروسسييسك پەن كقك. سوندىقتان بۇل ماسەلە بويىنشا ازىرگە ەش قاتەر كورىپ وتىرعان جوقپىز»، – دەدى قانات بوزىمبايەۆ.