2017 جىلعى 21 تامىزدا قازاقستان رەسپۋبليكاسى مەن يتاليا رەسپۋبليكاسى اراسىنداعى ديپلوماتيالىق قارىم-قاتىناستاردىڭ ورناعانىنا 25 جىل تولادى دەپ جازادى Qamshy.kz اقپارات اگەنتتىگى.
شيرەك عاسىر ىشىندە ەلدەرىمىز اراسىندا سىندارلى ساياسي ديالوگ ورناتىلىپ، تىعىز شارتتىق-قۇقىقتىق بازا قۇرىلدى، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىق قارقىندى دامىدى.
2009 جىلى قول قويىلعان ستراتەگيالىق ارىپتەستىك تۋرالى مەملەكەتارالىق شارت قازاقستان-يتاليا قارىم-قاتىناستارىنىڭ ەرەكشە مارتەبەسىن ايعاقتايتىن اسا ەلەۋلى وقيعا بولدى.
بۇۇ، ەقىۇ جانە باسقا دا حالىقارالىق ۇيىمدار شەڭبەرىندە سەنىمدى قارىم-قاتىناستار ورناتىلدى. قازاقستان مەن يتاليانىڭ حالىقارالىق كۇن تارتىبىندەگى وزەكتى ماسەلەلەر بويىنشا ۇستانىمدارى ۇقساس. ەكى ەلدىڭ 2017 جىلى بۇۇ قاۋىپسىزدىك كەڭەسى اياسىنداعى ءوزارا ءىس-قيمىلىندا بىر-بىرىنە دەمەۋى وسىنىڭ دالەلى.
يتاليا قازاقستاننىڭ نەگىزگى سىرتقى ساۋدا ارىپتەستەرىنىڭ ءبىرى بولىپ تابىلادى، يتاليان كومپانيالارى ەلىمىز ەكونوميكاسىنداعى ءىرى ينۆەستورلاردىڭ قاتارىندا. وسى جىلدار ىشىندە قازاقستان ەكونوميكاسىنا تارتىلعان يتاليان ينۆەستيسيالارىنىڭ جالپى كولەمى شامامەن 6 ملرد. اقش دوللارىن قۇرادى. ونەركاسىپتىك جانە ەكونوميكالىق ىنتىماقتاستىق جانە الماسۋ جونىندەگى ۇكىمەتارالىق جۇمىس توبىنىڭ بەلسەندى قىزمەتى ەكونوميكالىق جانە ينۆەستيسيالىق ءوزارا ارەكەتتەستىكتى بارىنشا كەڭەيتۋگە ىقپال ەتۋدە.
يتاليانىڭ جاڭارتىلاتىن ەنەرگيا كوزدەرىن قولدانۋداعى باي تاجىريبەسىن نازارعا الا وتىرىپ، يتاليان كومپانيالارى استاناداعى ەكسپو-2017 حالىقارالىق مامانداندىرىلعان كورمەسىنە بەلسەندى قاتىسۋدا.
ءوڭىرارالىق ىنتىماقتاستىق سەرپىندى دامۋدا. استانا مەن ميلان، استانا مەن فريۋلي-ۆەنەسيا-دجۋليا ءوڭىرى دەلەگاسيالارمەن تۇراقتى تۇردە الماسۋدا. بۇل ىنتىماقتاستىققا قازاقستاننىڭ يتاليانىڭ ءبىرقاتار قالالارىنداعى قۇرمەتتى كونسۋلدارى زور ۇلەس قوسىپ وتىر.
ءبىلىم جانە مادەنيەت سالاسىنداعى بايلانىستار دا كەڭەيىپ كەلەدى. 2013 جىلى يتاليادا قازاقستاننىڭ مادەنيەت كۇندەرى، ال 2016 جىلى قازاقستاندا يتاليانىڭ مادەنيەت كۇندەرى ءساتتى ءوتتى. «استانا وپەرا» تەاترى ميلانداعى «لا سكالا»، نەاپولدەگى «سان كارلو» جانە گەنۋياداعى «كارلو فەليچە» تەاترلارىمەن تىعىز ىنتىماقتاستىقتا.
قازاقستان يتاليامەن ستراتەگيالىق ارىپتەستىكتى جان-جاقتى نىعايتىپ، دامىتۋعا نيەتتى.
