21 تامىز كۇنى سەنەگال رەسپۋبليكاسىنىڭ ۇلتتىق كۇنى اتاپ ءوتىلدى. سەنەگال ساياساتىنىڭ باستى باعىتتارىنىڭ ءبىرى ەنەرگەتيكالىق تاۋەلدىلىك دەڭگەيىن تومەندەتۋ بولىپ تابىلادى دەپ حابارلايدى Qamshy.kz اقپارات اگەنتتىگى ەكسپو-2017 كورمەسىنىڭ مەديا-ورتالىعىنا سىلتەمە جاساي وتىرىپ.

مەرەكەلىك شارانىڭ رەسمي بولىگىندە سەنەگال ۇلتتىق اگەنتتىگىنىڭ ەكسپورتتى دامىتۋ بويىنشا باس مەنەدجەرى ماليك دجوپ ەنەرگيا ەكونوميكالىق جانە الەۋمەتتىك دامۋدىڭ نەگىزى ەكەنىن اتاپ ءوتتى. سول سەبەپتى سەنەگال رەسپۋبليكاسىنىڭ ۇكىمەتى 2017 جىلدىڭ سوڭىنا قاراي ەلدىڭ ەنەرگەتيكالىق تەڭگەرىمىندەگى جاڭارتىلاتىن ەنەرگيا كوزدەرىنىڭ ۇلەسىن 20%-عا كوبەيتۋدى جوسپارلاۋدا.

«ەنەرگەتيكالىق جانە ەكولوگيالىق ماسەلەلەردى شەشۋ ءۇشىن الەم ەلدەرىن ءوزارا تىعىز ىنتىماقتاستىق ورناتۋعا شاقىرامىن. بۇگىنگى كۇنى سەنەگال افريكا كونتينەنتىندەگى جاڭارتىلاتىن ەنەرگيا رەسۋرستارىن قولدانۋ بويىنشا جەتەكشى مەملەكەتتەردىڭ ءبىرى بولىپ تابىلادى. ءبىز كۇن جانە جەل ەنەرگياسىن وندىرەمىز. ءۇش كۇن-ەلەكتر ستانسيالارىنىڭ اشىلۋىنان كەيىن، دۇنيەجۇزىلىك بانكتىڭ قولداۋىمەن، سەنەگال جالپى قۋاتى 350 مۆت كۇن ەلەكتروستانسيالارىنىڭ قۇرىلىسىنا تەندەر جاريالايدى. سونىمەن قاتار، ەلدە ىشكى بيوگازدى وڭدەۋ تەحنولوگياسى دامىعان. «بولاشاق ەنەرگياسى» تاقىرىبىنداعى ەكسپو-2017 كورمەسى ءبىز ءۇشىن ماڭىزدى، سەبەبى تاقىرىپ بالامالى ەنەرگيا كوزدەرىن دامىتۋ جانە ەنگىزۋمەن بايلانىستى رەسپۋبليكانىڭ ساياسي باعىتىنا ساي كەلەدى. بۇل كورمە جاڭارتىلاتىن ەنەرگيا كوزدەرىن ەنگىزۋگە جانە كومىرقىشقىل گاز قالدىقتارىن قىسقارتۋعا ىقپال ەتەدى»، – دەپ اتاپ ءوتتى سەنەگال ۇلتتىق اگەنتتىگىنىڭ ەكسپورتتى دامىتۋ بويىنشا باس مەنەدجەرى.

ءوز كەزەگىندە قازاقستان رەسپۋبليكاسى مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ ءتوراعاسى ماينيۋرا مۋرزامادييەۆا استانا قالاسىندا «بولاشاق ەنەرگياسى» تاقىرىبىنداعى ەكسپو-2017 كورمەسىن وتكىزۋ قازاقستاننىڭ بالامالى ەنەرگيا كوزدەرىن دامىتۋ جولىندا ىنتاسىن كورسەتەدى دەپ اتاپ ءوتتى. سونداي-اق، سەنەگال رەسپۋبليكاسىنىڭ «سەنەگالدى قۇرۋ ءۇشىن تازا ەنەرگيا» تاقىرىبىنداعى ەكسپوزيسياسىنىڭ مازمۇنى كورمەگە كەلۋشىلەردىڭ قىزىعىن تۋدىراتىنىن ايتتى.

ەستەرىڭىزگە سالا كەتەيىك، سەنەگال رەسپۋبليكاسى – باتىس افريكادا ورنالاسقان مەملەكەت. رەسپۋبليكا 2035 جىلعا قاراي دامۋشى ەلدەر قاتارىنا قوسىلۋدى كوزدەيدى. سەنەگالدىڭ نەگىزگى دامۋ باعىتتارىنىڭ ءبىرى – مەملەكەتتىڭ ەنەرگەتيكالىق تاۋەلدىلىك دەڭگەيىن تومەندەتۋدى قامتاماسىز ەتۋ بولىپ تابىلادى. سەنەگال رەسپۋبليكاسىنىڭ ەكسپوزيسياسى افريكا پلازاسىندا ۇسىنىلعان.