«بولاشاققا باعدار: رۋحاني جاڭعىرۋ» باعدارلاماسى اياسىندا الەمنىڭ فيلوسوفيا، سوسيولوگيا، پسيحولوگيا، مادەنيەتتانۋ، ءدىنتانۋ، ءتىل ءبىلىمى، ەكونوميكا، مەنەدجمەنت پەن كاسىپكەرلىك سالالارىنىڭ ەڭ ۇزدىك وقۋلىقتارى قازاق تىلىنە اۋدارىلىپ جاتىر. بۇگىندە 17 كىتاپ اۋدارىلۋدا. اقش، ۇلىبريتانيا، شۆەيساريا، فرانسيا مەن رەسەي باسپالارىنىڭ كىتابىن اۋدارۋعا زاڭدى تۇردە رۇقسات الىنعان دەپ حابارلايدى Qamshy.kz اقپارات اگەنتتىگى وكق سايتىنا سىلتەمە جاساي وتىرىپ.
«جاڭا گۋمانيتارلىق ءبىلىم. قازاق تىلىندە 100 جاڭا وقۋلىق» دەگەن اتاۋمەن الەمدىك وقۋلىقتاردىڭ قازاشالانۋى بۇرىن بولماعان تىڭ جوبا. اۋدارمانى ىسكە اسىرۋ ءۇشىن 17 جۇمىس توبى قۇرىلىپ، وعان 90-نان استام كاسىبي اۋدارماشى اتسالىسۋدا. بۇل تۋرالى «ۇلتتىق اۋدارما بيۋروسىنىڭ» باسشىسى راۋان كەنجەحان ۇلى ورتالىق كوممۋنيكاسيالار قىزمەتىندە وتكەن بريفينگ بارسىندا مالىمدەدى.
ن.مەنكيۋدىڭ «ەكونوميكا» كىتابى، ەنتوني كەننيدىڭ «فيلوسوفيا تاريحى» سىندى كىتاپتارى وسى سالادا ەڭبەكتەنىپ جۇرگەن قازاق ءتىلدى وقىرمانعا قاجەت. جوبانىڭ ماقساتى – الىمدىك تۋىندىلاردى قازاق تىلىنە اۋدارىپ، رۋحاني كەڭىستىكتى بايىتۋ. اۋدارۋعا تاڭدالاتىن كىتاپتار ءتىزىمى مەن شارتتارى جايلى باسپا ءسوز جيىندا جوبا اۆتورى ايتىپ بەردى:
"كىتاپتاردى ىرىكتەۋدە نەگىزگى شارت رەتىندە كەم دەگەندە ءۇش رەت قايتا باسىلۋى، سوڭعى باسىلىمى 2014 جىلدان كەيىن بولماۋى، الەمنىڭ توپ-100 جوو-دا قولدانىلۋى، مازمۇندىق بەيتاراپتىلىقتى ساقتاۋ تالاپتارى قويىلىپ وتىر. سونىمەن قاتار، قوعامدا قىزۋ پىكىر تۋىنداتقان كەرون ارمسترونگتىڭ «قۇدايلار تاريحى» اتتى ەڭبەگىنىڭ اۋدارۋىلى جايلى اتاپ وتسەم. بۇل كىتاپ ەلىمىزدەگى جاستارعا دۇرىس باعىت سىلتەپ، عىلىمي ەڭبەكتى تۇسىنۋگە سەپتىگىن تيگىزەدى. ءبىز ونى اۋدارۋدا عالىم، دىنتانۋشىلارمەن جۇمىس ىستەپ جاتىرمىز"، – دەدى راۋان كەجەحان ۇلى.
وسىعان وراي، 23 تامىز الماتى قالاسى، «دوستىق» قوناق ۇيىندە اتقارىلىپ جاتقان جۇمىستارعا بايلانىستى عالىمدار، اۋدارماشىلار، رەداكتورلار، باسپاگەرلەر، وقۋ ورىندارى اكىمشىلىكتەرى مەن مەملەكەتتىك مەكەمەلەر وكىلدەرى قاتىساتىن قازاق تىلىندەگى اۋدارما ساپاسىن ارتتىرۋ مەن ادىستەمەلىك نەگىزدەرىن تالقىلايتىن باسقوسۋ وتەدى. باسقوسۋدا عىلىمي تەرميندەر مەن ۇعىمداردى قازاق تىلىنە اۋدارۋ، وزگە تىلدەردەن ەنگەن سوزدەر قولدانىسى، تەرمينولوگيا، ستيل، اۋدارما ورتاسىن دامىتۋ ماسەلەلەرى ءسوز بولادى.
