الماتى اكىمى باۋىرجان بايبەك كەزەكتى جۇمىس ساپارىندا جول جانە كوممۋنالدىق ينفراقۇرىلىمدى قايتا جاساۋ جۇمىستارىنىڭ بارىسىن تەكسەردى دەپ حابارلايدى Qamshy.kz اقپارات اگەنتتىگى الماتى قالاسى اكىمدىگىنىڭ باسپا ءسوز قىزمەتىنە سىلتەمە جاساپ. 151 شاقىرىم جول، 85 كوشە، 32 جاياۋجول.

باسپا ءسوز قىزمەتىنىڭ مالىمەتىنشە، بۇگىندە ماگيسترال كوشەلەردەگى جوسپارلانعان 151 شاقىرىم جولدىڭ بارلىعىنا ورتاشا جوندەۋ جۇمىستارى جۇرگىزىلگەن. اۋداندىق ماڭىزى بار 85 كوشەدەگى جوندەۋ جۇمىستارى قازان ايىندا اياقتالادى. 32 جاياۋ جولدىڭ 26 شاقىرىمى جاڭارتىلدى جانە جوندەلدى. بيىلعى جىلى قالا بويىنشا 317 شاقىرىم سۋ قۇبىرلارى مەن 265 شاقىرىم كارىز جەلىلەرىن سالۋعا جانە قايتا جاساۋعا قارجى ءبولىندى. ۇزىندىعى 284 شاقىرىم بولاتىن جاڭا سۋ قۇبىرلارى جەلىسىن ىسكە قوسۋ – بيىلعى جىلدىڭ كۇزىندە 175 مىڭنان استام ادام تۇراتىن 35 مىڭ تۇرعىن ءۇيدى سۋمەن قامتۋدىڭ ورتالىق جۇيەسىنە قوسۋعا مۇمكىندىك بەرەدى.

"شيەۆچەنكو جانە كونايەۆ كوشەلەرىندە كولىك قوزعالىسى اشىلدى، بۇلارداعى رەلستەر الىنىپ تاستالدى، ارىق لوتوكتارى توسەلۋدە، جاياۋ جولدار، وربيتا ىشقاماۋدانىنان كوكبازارعا دەيىنگى ۆەلودالىزدىڭ ءبىر بولىگى بولىپ تابىلاتىن ۆەلوجولدار اباتتاندىرىلۋدا"، – دەلىنگەن حاباردا.

كۇردەلى جوندەۋ جۇمىستارى جۇرگەن بايتۇرسىنوۆ كوشەسى بويىمەن تيميريازيەۆ كوشەسىنەن اباي داڭعىلىنا دەيىنگى جولدار اۋماعى دا جوندەلىپ، مۇندا دا كولىك قوزعالىسى اشىلدى، تروتۋارلار مەن ۆەلوجولدار كورىكتەندىرىلۋدە. جاندوسوۆ كوشەسىنىڭ ۇزىندىعى 2،8 شاقىرىم بولاتىن ۋچاسكەسىندەگى كۇردەلى جوندەۋ جۇمىستارى دا اياقتالىپ قالدى. قازىرگى كەزدە مۇندا قوزعالىس بولىگى، جاياۋ جولدار مەن ۆەلوجولدار اباتتاندىرىلىپ جاتىر.

اسقاروۆ كوشەسىنەن ءال-فارابي داڭعىلىنىڭ باتىس بولىگىندەگى ۇزىندىعى 3،5 شاقىرىم بولاتىن سۋ جۇيەلەرىن قايتا جاسالۋدا، سونىڭ ارقاسىندا قىركۇيەك ايىندا 200 مىڭعا جۋىق قالا تۇرعىنى اۋىز سۋمەن قامتاماسىز ەتىلەدى. قالا اكىمىنە قايتا جاسالعان ۋچاسكەگە قارا اسفالت توسەلگەن سوڭ، 30 تامىزدا كولىك قوزعالىسىنىڭ اشىلاتىندىعى باياندالدى. الماتى اكىمى ەنەرگەتيكا جانە كوممۋنالدى شارۋاشىلىق باسقارماسىنىڭ باسشىسىنا جۇمىستى جەدەلدەتۋدى ءارى ساپالى اتقارۋدى، اۋماقتى كورىكتەندىرۋگە باسا نازار اۋدارۋدى تاپسىردى.

مەگاپوليس باسشىسى جۇبانوۆ، تولە بي، مامەتوۆا جانە قازىبەك بي كوشەلەرى بويىنداعى جىلۋ جۇيەلەرىن قايتا جاساۋ جۇمىستارىن دا تەكسەردى.

"تولە بي – ۇلكەن كولىك لەگى بار ماگيسترال كوشە. مۇندا ۇزىندىعى 1،6 كم بولاتىن اۋماقتا كۇشەيتىلگەن رەجيمدە جوندەۋ جۇمىستارى جۇرۋدە، تەحنولوگيالىق پروسەسس تولىق ساقتالىپ وتىر. جۇمىستى 25 قىركۇيەكتە اياقتاۋدى جوسپارلاپ وتىرمىز. تولە بي بويىمەن ماسانچيگە بۇرىلاتىن جەردەن قاراساي باتىرعا دەيىنگى اۋماقتاعى جوندەۋ جۇمىستارىن تامىز ايىندا بىتىرەمىز، سونىمەن قاتار مامەتوۆا مەن قازىبەك بي كوشەلەرىندەگى جوندەۋ جۇمىستارىن دا وسى مەرزىمدە تولىق اياقتايمىز"، –دەدى "الماتى جىلۋ جۇيەسى" ج ش س ديرەكتورى ەربولات امانعالييەۆ.

جالپى، جاڭا جىلۋ ماۋسىمىنا دەيىن ۇزىندىعى 32 شاقىرىمنان اساتىن جىلۋ جۇيەلەرى جوندەۋدەن وتەدى، بۇل وتكەن جىلمەن سالىستىرعاندا 2،7 ەسە كوپ. جۇمىستار جاڭاشا يزولياسيالانعان قۇبىرلاردى قولدانۋ ارقىلى جۇرۋدە، بۇلاردىڭ پايدالانۋ مەرزىمى 40 جىل.

سونىمەن قاتار قالادا فۋرمانوۆ، اباي، حمەلنيسكيي كوشەلەرىن ۇڭگىلەۋ جانە بىرنەشە جولايرىقتارىن سالۋ جۇمىستارى ودان ءارى جالعاسادى. اباي داڭعىلى بويىنداعى ەسەنتاي وزەنى ارقىلى وتەتىن كوپىردە كۇردەلى جوندەۋ جۇمىستارى ءجۇرىپ جاتىر، ونىڭ سولتۇستىك بولىگىندەگى كولىك قوزعالىسى 1 قىركۇيەكتە، ال وڭتۇستىگىندەگى كولىك قوزعالىسى 1 قازاندا اشىلاتىن بولادى.