قازاقستان رەسپۋبليكاسىنىڭ پرەزيدەنتى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ ماقساتىندا الماتى مۋزەيىندە «قولجەتىمدى مۋزەي» اتتى مۇمكىندىگى شەكتەۋلى جاندارعا ارنالعان تۇراقتى ەكسپوزيسيا اشىلادى دەپ حابارلايدى Qamshy.kz اقپارات اگەنتتىگى.
مۇمكىندىگى شەكتەۋلى جانداردىڭ بارلىق كاتەگورياسى ءۇشىن قولجەتىمدىلىگى بويىنشا قىزمەتتەر ۇسىنىلادى: مۋزەي قورىنان تاكتيلدى ەكسپوناتتار، اۋديوگيدتەر، تيفلوكوممەنتاريي، برايل شريفتىمەن جولسەرىكتەر، ارحەولوگيالىق ارتەفاكتىلەردىڭ رەلەفتى سۋرەتتەرى، زالداردىڭ تاكتيلدى منەموسىزبالارى، سۋردواۋدارمامەن ەكسكۋرسيالار جانە ت.ب.
بۇگىندە الماتى قالاسىندا مۇمكىندىگى شەكتەۋلى جانداردىڭ سانى 47 مىڭدى قۇرايدى. ولاردىڭ بارلىعى مۋزەيدە بولماعان، ءتىپتى كەيبىرەۋى مادەني ورىندارعا بارعاندا ولارعا كورسەتىلەتىن جەڭىلدىكتەر تۋرالى بىلمەيدى. 2015 جىلى قازاقستان رەسپۋبليكاسىندا راتيفيكاسيالانعان مۇمكىندىگى شەكتەۋلى جانداردىڭ قۇقىقتارى تۋرالى بۇۇ كونۆەنسياسىنا سايكەس «مەملەكەت-قاتىسۋشىلار مۇمكىندىگى شەكتەۋلى جانداردىڭ مادەني ومىرگە باسقالارمەن تەڭ قۇقىعىن مويىندايدى جانە مۇمكىندىگى شەكتەۋلى جانداردىڭ قولجەتىمدى فورماتتا تەاتر، مۋزەي، كينوتەاتر، كىتاپحانا سەكىلدى مادەني ورىنداردا مادەنيەت تۋىندىسىنا قولجەتىمدىلىگىن، سونداي-اق ۇلتتىق، مادەني قۇندىلىعى بار ەسكەرتكىشتەر مەن نىساندارعا بارىنشا جوعارى قولجەتىمدىلىككە يە بولۋىن قامتاماسىز ەتۋ ءۇشىن بارلىق شارالاردى قابىلدايدى».
ايتا كەتەيىك، «قولجەتىمدى مۋزەي» اتتى مۇمكىندىگى شەكتەۋلى جاندارعا ارنالعان تۇراقتى ەكسپوزيسيانىڭ اشىلۋ سالتاناتى 23 تامىزدا ساعات 11.00-دە وتەدى.
وعان الماتى قالاسىنىڭ اكىمى ب. بايبەك، مۇمكىندىگى شەكتەۋلى جاندار ماسەلەسى بويىنشا اكىم كەڭەسشىسى ۆ. الايەۆ، «شىراق» مۇمكىندىگى شەكتەۋلى ايەلدەر اسسوسياسياسى» قوعامدىق قورىنىڭ ءتورايىمى، الماتى قالاسى ءماسليحاتىنىڭ دەپۋتاتى ل. قالتايەۆا، قازاقستان مۇمكىندىگى شەكتەۋلى جاندار ۇيىمى وداعىنىڭ ءتوراعاسى ا. امانبايەۆ، «ارجان» قوعامدىق قورىنىڭ ديرەكتورى ك. وماروۆا جانە ت.ب. قاتىسادى.
قولجەتىمدى مۋزەي – مۇمكىندىگى شەكتەۋلى جاندار ءۇشىن قولجەتىمدى مۋزەيلىك ورتامەن قامتاماسىز ەتىپ، ولاردىڭ ءومىر ءسۇرۋ ساپاسىن ارتتىرۋ جانە قوعامنىڭ پسيحولوگيالىق مادەنيەتىن قالىپتاستىرۋ ماقساتىن كوزدەيتىن الەۋمەتتىك-مادەني جوبا.
مۇمكىندىگى شەكتەۋلى جانداردىڭ باسقالارمەن قاتار ءومىر سۇرۋگە، جۇمىس ىستەۋگە، ياعني قوعام ومىرىنە ارالاسۋعا مۇمكىندىگى بولۋى ءتيىس. مۇمكىندىگى شەكتەۋلى جانداردىڭ ەركىنەن تىس كەز-كەلگەن الاستاتۋ، وقشاۋلاۋ سەكىلدى جاعدايلار ولارعا قاتىستى جاسالعان كەمسىتۋ بولىپ ەسەپتەلەدى.
الەمدىك مۋزەيلەر تاجىريبەسىندە مۇمكىندىگى شەكتەۋلى جاندارعا ارنالعان مۇنداي جوبالار كەڭىنەن قولدانىلادى. مىسالى:
- فرانسياداعى لۋۆر مۋزەيىندە ارنايى تاكتيلدى گالەرەيادا مۋزەي قورىنان مۇسىندەردىڭ مينياتيۋرالىق كوشىرمەلەرى جينالعان تۇراقتى جۇمىس ىستەيتىن ەكسپوزيسيا بار؛
- نيۋ-يورك قالاسىنداعى زامانۋي ونەر مۋزەيىندە زاعيپ جانە كوزى ناشار كورەتىن جاندارعا ارنايى قولعاپپەن مۇسىندەردى «زەرتتەۋگە» رۇقسات ەتىلگەن؛
- «گاراج» مۋزەيى (ماسكەۋ) زاعيپ جاندار ءۇشىن تاكتيلدى ەكسكۋرسيالاردى تۇراقتى تۇردە وتكىزىپ وتىرادى، سونداي-اق ەستۋ قابىلەتى شەكتەۋلى جاندار ءۇشىن ورىس تىلىندە سۋردواۋدارمامەن ەكسكۋرسيا وتكىزەدى.
ال، وتاندىق تاريحي مۋزەيلەر اراسىندا الماتى مۋزەيى عيماراتى مەن ەكسپوزيسياسىن مۇمكىندىگى شەكتەۋلى جانداردىڭ بارلىق كاتەگورياسى ءۇشىن بەيىمدەگەن العاشقى مۋزەي بولىپ وتىر.
