بۇگىن 22 تامىزدا ساعات 15.00 ترياتلون پاركىندە  شانحاي ىنتىماقتاستىق ۇيىمى مەن  ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ حالىقارالىق استانا مارافونىنا ارنالعان فلەشموب ءوتتى دەپ حابارلايدى Qamshy.kz اقپارات اگەنتتىگى. 

فلەشموبتى ق ر مادەنيەت جانە سپورت ءمينيسترى ارىستانبەك مۇحامەديۋلى باستادى. وتاندىق سپورت جۇلدىزدارى باقتيار ارتايەۆ، دانيار ەلەۋسىنوۆ جانە تاعى باسقا تانىمال سپورتشىلار فلەشموبتىڭ كوركىن قىزدىردى. قاتىسۋشىلار بەلگىلەنگەن مەجەنى جۇگىرىپ ءوتىپ، 27 تامىزدا وتەتىن جەڭىل اتلەتيكالىق مارافون تۋرالى ويلارىمەن ءبولىستى.

ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ ايتۋىنشا، اتالعان مارافون ەكسپو-2017 حالىقارالىق كورمەسى اياسىندا وتكىزىلەتىن ەڭ اۋقىمدى شارالاردىڭ ءبىرى بولعالى تۇر. مارفونشىلار ەلوردانىڭ كورىكتى جەرلەرىنەن جۇگىرىپ ءوتۋ ارقىلى، استانامىزدى الەم جۇرتشىلىعىنا پاش ەتپەك.  ارينە باستى ماقسات – ەل اراسىندا سەنىمدى، ديپلوماتيالىق قارىم-قاتىناستى، دوستىقتى نىعايتا ءتۇسۋ بولىپ وتىر.

25-26 تامىزدا ەكسپو-نىڭ وڭتۇستىك شىعىسىندا ستارتتىق سومكەلەدەردى تابىستاۋ ءراسىمى ۇيىمداستىرىلادى. ولاردى مارافونعا ونلاين جانە وففلاين تىركەلگەندەر الا الادى.  سومكەدە فۋتبولكا، ءنومىر مەن قاتىسۋشىعا جادىناما سالىنعان. بۇدان باسقا، شارادا تانىمال مارافونشىلار شەبەرلىك كلاسستارىن ۇيىمداستىرادى.

ەستەرىڭىزگە سالايىق، «ەكسپو-2017» اياسىندا وتەتىن شىۇ مەن اوسشك حالىقارالىق مارافونى 2017 جىلدىڭ 27 تامىزىندا تاڭعى ساعات 07:30-دا وتەدى. مارافوننىڭ مارشرۋتى استانانىڭ سول جاعالاۋىنداعى باستى كوشەلەردى قامتيدى. سپورتتىق شاراعا شىۇ مۇشە ءاربىر مەملەكەتتەن جالپى 50 كاسىبي سپورتشىنى تارتۋ كوزدەلگەن. ولار، ءۇش ءتۇرلى قاشىقتىقتا باقتارىن سىنايدى: 42 كم 195 م، 10 كم، جانە 2017 مەتر. شەتەلدەن كەلەتىن قاتىسۋشىلار سانى 1000 ادامدى قۇراپ وتىر. قازاقستاندىق تاراپتان 4000 ادام قاتىسادى دەپ كۇتىلۋدە. مارافونعا قاتىسۋشىلاردىڭ جالپى سانى 5000 ادام.  مارافونعا ونلاين تىركەلۋ ۇستىمىزدەگى جىلدىڭ 15ء-شى شىلدەسىندە باستالدى.