ەكسپو-2017 كورمەسى اياسىندا مارشالل ارالدارى رەسپۋبليكاسىنىڭ ۇلتتىق كۇنى مەرەكەلەندى. رەسۋرستار جانە دامۋ مينيسترلىگىنىڭ حالىقارالىق ەنەرگەتيكالىق جوسپارلار جونىندەگى ديرەكتورى انگەلين حاينە ەل 2020 جىلعا قاراي جاڭارتىلاتىن ەنەرگيا كوزدەرىنىڭ ۇلەسىن 20%-عا ارتتىرۋدى جوسپارلايتىندىعىن مالىمدەدى دەپ حابارلايدى Qamshy.kz اقپارات اگەنتتىگى.

«مارشالل ارالدارى رەسپۋبليكاسىنىڭ ۇكىمەتى 2020 جىلعا قاراي جاڭارتىلاتىن ەنەرگيا كوزدەرىنە 20%-عا كوشۋ ماقساتىن العا قويدى. ەكسپو-2017 كورمەسىنىڭ «بولاشاق ەنەرگياسى» تاقىرىبى ەلىمىزدىڭ بولاشاق دامۋىمىمەن تىعىز بايلانىستى. قازاقستان سياقتى تابيعي رەسۋرستارعا باي مەملەكەتتەر بولاشاقتىڭ كىلتى ەنەرگيادا دەگەن ويدى ۇستانۋى سەنىم مەن ءۇمىت تۋدىرادى»، – دەپ اتاپ ءوتتى انگەلين حاينە.

ءوز كەزەگىندە قازاقستان رەسپۋبليكاسى قورعانىس جانە اەروعارىش ونەركاسىبى ءمينيسترىنىڭ ورىنباسارى ارمان رامازانوۆ قازاقستان استانا قالاسىنداعى حالىقارالىق مامانداندىرىلعان كورمەسىن وتكىزۋدە مەملەكەتىمىزگە قولداۋ كورسەتكەن ەلدەرگە العىسىن ءبىلدىردى. ونىڭ ايتۋىنشا، ەكسپو-2017 كورمەسى ەلدىڭ ءۇشىنشى ونەركاسىپتىك ريەۆوليۋسياعا وتۋىنە ىقپال ەتەدى.

«مارشالل ارالدارى رەسپۋبليكاسىنىڭ كورمەگە قاتىسۋى ەكى ەلدىڭ جاڭارتىلاتىن ەنەرگيا كوزدەرىن ىزدەۋدە مۇددەلەرى مەن كۇشتەرى ورتاق ەكەندىگىن كورسەتەدى. كورمەنى وتكىزۋ ناتيجەسىندە ءقاۋىپسىز ەنەرگياعا قول جەتكىزۋ مەن جاسىل تەحنولوگيالاردى ەنگىزۋگە باعىتتالعان الەمنىڭ دامۋ تاريحىنىڭ جاڭا كەزەڭى باستالادى. ەكسپو-2017 كورمەسى مەملەكەت باسشىسى اتاپ وتكەن جوعارى تەحنولوگيالى ماتەريالداردى جاساۋ، جاڭارتىلاتىن ەنەرگيا كوزدەرىن قۇرۋ جانە مامانداردى دايىنداۋ مەن بالامالى ەكونوميكادان تۇراتىن ءۇشىنشى ونەركاسىپتىك ريەۆوليۋسياعا وتۋگە مۇمكىندىك بەرەدى»، – دەدى ا. رامازانوۆ.

مارشالل ارالدارىنىڭ ەكسپوزيسياسى 11 مەملەكەت تانىستىرىلعان تىنىق مۇحيتى پلازاسىندا ۇسىنىلعان.

مارشالل ارالدارى رەسپۋبليكاسى – ميكرونەزيا قۇرامىنا كىرەتىن كليماتتىق وزگەرىستەرگە تاۋەلدى تىنىق مۇحيتىندا ورنالاسقان مەملەكەت. سونداي-اق كليمات جونىندەگى كەلىسىمگە قول قويعان العاشقى ارالدا ورنالاسقان ەلدەردىڭ ءبىرى بولىپ تابىلادى. 2008 جىلعى مۇناي داعدارىسىنان كەيىن مارشالل ارالدارى جاڭارتىلاتىن ەنەرگيا كوزدەرىنە كوشۋ بويىنشا الەمدەگى قاتاڭ شارالاردى قولداندى جانە پارنيكتى گازدار قالدىقتارىنىڭ كولەمىن ازايتۋ جونىندەگى مىندەتتەمەلەرى تۋرالى مالىمدەدى.