استانادا 2017 جىلدىڭ 7 ايى بويىنشا وتكەن جىلدىڭ وسى كەزەڭىمەن سالىستىرعاندا ونەركاسىپ ءوندىرىسى 4،2%-عا ءوستى. بۇل جەتىستىك نەگىزىنەن كولىك قۇرىلىسى جانە مەتاللۋرگيا، يندۋستريالاندىرۋ كارتاسى جوبالارى ەسەبىنەن مۇمكىن بولىپ وتىر. بۇل تۋرالى Qamshy.kz اقپارات اگەنتتىگى استانا قالاسى اكىمدىگىنىڭ مالىمەتىنە سۇيەنىپ حابارلايدى.

– ونەركاسىپ ءونىمىنىڭ كولەمى 2017 جىلدىڭ قاڭتار-شىلدە ارالىعىندا استانادا 289،9 ملرد. تەڭگەنى قۇرادى جانە وتكەن جىلدىڭ وسى كەزەڭىمەن سالىستىرعاندا 83،6 ملرد. تەڭگەگە وسكەن. ونەركاسىپ ءوندىرىسىنىڭ 2017 جىلعا جوسپارلانعان كولەمى 486 ملرد. تەڭگە، – دەپ حابارلادى قالالىق كاسىپكەرلىك جانە ونەركاسىپ باسقارماسىنىڭ ونەركاسىپتى دامىتۋ ءبولىمىنىڭ جەتەكشىسى ازامات راشيتوۆ.

فيزيكالىق يندەكس كولەمى 2016 جىلدىڭ وسى كەزەڭىمەن سالىستىرعاندا 104،2% دەڭگەيىندە بەلگىلەنگەن.

استانادا وسى ۋاقىتقا دەيىن وڭدەۋ ونەركاسىبىندە 241،5 ملرد. تەڭگە سوماسىندا ءونىم ءوندىرىلدى، بۇل 2016 جىلدىڭ وسى ۋاقىتىمەن سالىستىرعاندا 77،5 ملرد. تەڭگەگە ءوستى. يندۋستريالاندىرۋ كارتاسى ءوندىرىسىنىڭ ءونىم كولەمى وڭدەۋ ونەركاسىبىنىڭ جالپى كولەمىنىڭ 46%-ىن  قۇرايدى.

ەلوردادا وڭدەۋ ونەركاسىبىنىڭ نەگىزگى سالالارى كولىك قۇرىلىسى، قۇرىلىس ماتەريالدارى ءوندىرىسى، مەتاللۋرگيا، (التىن مەن كۇمىس ءوندىرىسى) جانە تاماق ونەركاسىبى.