كەزدەسۋدە نۇرسۇلتان نازاربايەۆقا «سيفرلىق قازاقستان» مەملەكەتتىك باعدارلاماسىن ازىرلەۋ بارىسى تۋرالى باياندالدى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساي وتىرىپ.

قازاقستان پرەزيدەنتى جاھاندىق باسەكەلەستىكتىڭ ارتۋى جاعدايىندا ەكونوميكانى اۋقىمدى تۇردە سيفرلاندىرۋدىڭ وزەكتىلىگىن اتاپ ءوتتى.

"بۇگىندە بۇل ماسەلە الدىڭعى ورىنعا شىقتى. بۇكىل الەم وسى باعىتقا قاراي جىلجۋدا. ءبىز دە قالماۋعا ءتيىسپىز. بۇل – اسا كۇردەلى مىندەت. بارلىق ۆەدومستۆولار، مينيسترلىكتەر جانە وڭىرلەر ۇيلەسىمدى جۇمىس جۇرگىزۋى كەرەك"، – دەدى ەلباسى.

اقپارات جانە كوممۋنيكاسيالار ءمينيسترى مەملەكەت باسشىسىنا جاڭا باعدارلامادا كوزدەلگەن ءتورت باسىم باعىت جونىندە ايتتى.

"ءبىز ءقازىر باعدارلاما جوباسىن بارلىق مۇددەلى تاراپپەن بىرگە تالقىلادىق. «سيفرلىق قازاقستان» باعدارلاماسى ارقىلى نەگىزگى 4 جۇمىس باعىتى قاراستىرىلادى. ولار: ينفراقۇرىلىمدى دامىتۋ، ادام كاپيتالىن جاقسارتۋ، ەكونوميكا سالالارىن سيفرلاندىرۋ جانە مەملەكەتتىك قىزمەت كورسەتۋ جۇيەسىن جەتىلدىرۋ"، – دەدى د.ابايەۆ.

سوڭىندا نۇرسۇلتان نازاربايەۆ ءبىرقاتار ناقتى تاپسىرما بەردى.