ۇستىمىزدەگى جىلعى 22 تامىزدا استانادا قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ جانە اۋستريا رەسپۋبليكاسىنىڭ عىلىم، زەرتتەۋلەر جانە ەكونوميكا فەدەرالدى ۆيسە-مينيسترى بەرنادەتتە گيرلينگەردىڭ تەڭ توراعالىعىمەن ەكونوميكالىق، اۋىل شارۋاشىلىعى، تابيعاتتى قورعاۋ، ونەركاسىپتىك، تەحنيكالىق جانە تەحنولوگيالىق ىنتىماقتاستىق جونىندەگى قازاقستان-اۋستريا ۇكىمەتارالىق كوميسسياسىنىڭ 8ء-شى وتىرىسى ءوتتى دەپ حابارلايدى Qamshy.kz اقپارات اگەنتتىگى ق ر ءسىم سىلتەمە جاساي وتىرىپ.
وتىرىس بارىسىندا تاراپتار ەكىجاقتى كۇن ءتارتىپتىڭ وزەكتى ماسەلەلەرىن، سونىڭ ىشىندە قازاقستان رەسپۋبليكاسى مەن اۋستريا رەسپۋبليكاسىنىڭ ەكونوميكالىق احۋالى، ەكىجاقتى ىنتىماقتاستىقتىڭ قازىرگى جاعدايى مەن بولاشاق مۇمكىندىكتەرى بويىنشا ءداستۇرلى تۇردە پىكىر الماستى.
دەلەگاسيالار، سونىمەن قاتار، قازاقستان-اۋستريا ىنتىماقتاستىعىنىڭ ەنەرگەتيكا، تاۋ-كەن قازۋ ونەركاسىبى، قورشاعان ورتانى قورعاۋ تەحنولوگيالارى، كولىك جانە ينفراقۇرىلىم، اۋىل شارۋاشىلىعى، دەنساۋلىق ساقتاۋ، سونداي-اق ءوڭىرارالىق جانە كوپجاقتى ىنتىماقتاستىقتى دامىتۋ سالالارىنداعى وزەكتى ماسەلەلەر مەن مۇمكىندىكتەردى تالقىلادى.
كوميسسيا وتىرىسىنىڭ شەڭبەرىندە اۋستريالىق تاراپ ەكسپو-2017 حالىقارالىق كورمەسى شەڭبەرىندە وتكىزىلگەن ءىس-شارالارعا ەگجەي-تەگجەيلى توقتالدى. ءوز كەزەگىندە ر.ۆاسيلەنكو اۋستريا دەلەگاسياسى اتالعان كورمەگە ساپالى تۇردە دايىندالعانى جانە جوعارى دەڭگەيدە قاتىسقانى ءۇشىن العىسىن ءبىلدىردى.
بۇعان قوسا تاراپتار اۋستريانىڭ ەكسپو-2017 ءىس-شارالارى اياسىندا ءۇ.ج. 14 ماۋسىمدا ەكى ەل بيزنەس دەلەگاسيالارىنىڭ قاتىسۋىمەن وتكەن قازاقستان-اۋستريا ىسكەرلىك كەڭەسىنىڭ كەزەكتى كەزدەسۋىن ريزاشىلىقپەن اتاپ ءوتتى.
ەكى ەل اراسىنداعى سىندارلى ساياسي ديالوگ ءساتتى ەكونوميكالىق ىنتىماقتاستىقتىڭ كەپىلى بولىپ تابىلاتىنى اتالىپ ءوتتى. قازاقستاندىق ديپلوماتتىڭ ايتۋىنشا، 2017 جىلدىڭ ءبىرىنشى جارتىسىندا قازاقستاننىڭ ەو ەلدەرىمەن سىرتقى ساۋدا اينالىمى 2016 جىلدىڭ كورسەتكىشىمەن سالىستىرعاندا شامامەن 30%-عا ۇلعايىپ، 14،733 ملرد. اقش دوللارىن قۇرادى. بۇل رەتتە 2016 جىلدىڭ قورىتىندىسى بويىنشا قازاقستان تمد ەلدەرى اراسىندا اۋستريانىڭ رەسەيدەن كەيىنگى ەكىنشى ەڭ ءىرى ساۋدا سەرىكتەسى بولدى.
سونداي-اق ر.ۆاسيلەنكو ساۋدا-ەكونوميكالىق قارىم-قاتىناستاردىڭ وربۋىنە حالىقتىڭ جۇمىلعىشتىعى مەن ازاماتتار اراسىنداعى تىكەلەي بايلانىستار جەتەلەيتىنىنە نازار اۋداردى. وسى ورايدا، قازاقستان 2015 جىلى قول قويىلعان ق ر مەن ەو اراسىنداعى كەڭەيتىلگەن ارىپتەستىك جانە ىنتىماقتاستىق كەلىسىمىمەن قاراستىرىلعان ۆيزالىق رەجيمدى جەڭىلدەتۋ ماسەلەسىنە زور كوڭىل بولەدى. بۇل تۇرعىدا باسقوسۋ بارىسىندا اتالعان باعىت بويىنشا پروگرەسكە قول جەتكىزۋ پەرسپەكتيۆالارى تالقىلاندى.
كوميسسيا وتىرىسىنىڭ قورىتىندىلارى بويىنشا تەڭ ءتوراعالار تالقىلانعان ماسەلەلەردى تولىعىمەن قامتيتىن پروتوكولعا قول قويدى.
