Ninety one توبىنىڭ ءانشىسى دانيار قۇلىمشيننىڭ اتا-اناسى اقىلباي قۇلىمشين مەن ءاليا قىدىروۆا حالىقتىڭ سۇيىكتىسىنە اينالعان مۋزارت توبىنىڭ مۇشەلەرى مەيرامبەك بەسبايەۆ پەن ساكەن مايعازييەۆكە اشىق حات جولدادى، – دەپ حابارلايدى Qamshy.kz اقپارات اگەنتتىگى. اشىق حاتتا اتا-انا وزدەرىنىڭ ۇلىنا دۇرىس تاربيە بەرگەندىگىن جانە قوعامداعى جاعىمسىز پىكىرلەرگە 2 جىل بويى شىداعاندارىن ايتقان. دانياردىڭ اتا-اناسى تانىمال انشىلەرگە ءوز رەنىشىن Instagram الەۋمەتتىك جەلىسى ارقىلى ءبىلدىرىپتى.
«ءبىر سۇحباتىندا ساكەن مايعازييەۆ ادەتتەگىسىنشە Ninety One توبى تۋرالى وي تولعاپ، "ادام تانيتىنداي، مەيىرلەنە قۇشاقتايتىنداي، سۇيەتىندەي، اتا-انالارى قالاي جاقسى كورەتىنىن مەن بىلمەيمىن. قالاي ولارعا ۇيرەتپەيتىنىن، مەنىڭ جۇرەگىم اۋىرادى. ءوزىم ءۇشىن ەمەس، ۇرپاقتارىم ءۇشىن"، – دەپتى. اتاپ ايتساق، ساكەن بۇدان بۇرىن دا توپ مۇشەلەرىنىڭ بولمىسىنا سىن ايتىپ، بىرەسە جاقتاپ، بىرەسە داتتاپ جۇرگەن-دى. 2 جىل ۇندەمەي كەلە جاتقان بىزگە، بۇل سوزدەر شەكتەن شىققاندىق بولىپ كورىندى. قاناتتىعا قاقتىرماي، تۇمسىقتىعا شوقتىرماي، بار بىلگەنىمىزدى ۇيرەتىپ، ءوسىرىپ جاتقان بالالارىمىزعا ءتىل تيگىزىپ قانا قويماي، ولاردىڭ اتا-انالارىنىڭ، ياعني ءبىزدىڭ بەرگەن تاربيەمىزدى جوققا شىعارماق بولعان سوزدەرى ءبىزدىڭ قولىمىزعا قالام الىپ، وسى اشىق حاتتى جولداۋعا ماجبۇرلەپ وتىر"، – دەيدى رەنجىگەن اتا-انا. سونىمەن بىرگە اتى شۋلى توپتى قورعاعان اتا-انا مەيرامبەك بەسبايەۆ پەن ساكەن مايعازييەۆتىڭ ماقساتى قانداي ەكەنىن بىلگىسى كەلەتىنىن اشىق ايتقان. سونىمەن بىرگە، اتا-انانىڭ ايتۋى بويىنشا بالانى ساحناداعى جۇلدىزدار ەمەس، ۇيدەگى اتا-انا دۇرىستاپ تاربيەلەۋ كەرەك ەكەن.
"91 (Ninety one) توبىنداعى بالالارىمىزدىڭ "تاربيەسى" جايلى ءسوز قوزعاپ، ءجون كورسەتۋگە، قالا بەردى، ءبىزدى، اتا-انالارىن ءسوز قىلۋعا ەشكىمنىڭ حاقىسى جوق. بالالارىمىز ونەرلەرىنە سۇيەنىپ، اندەرىن جازىپ، بيلەرىن بيلەپ، حالىقتىڭ الدىندا قالاي ەركەلەسە دە، قالاي جۇرسە دە ءوز ەرىكتەرى. كەزىندە سىزدەردىڭ اندەرىڭىزدى تىڭداپ، ونەرلەرىڭىزگە ءسۇيسىنىپ، قۇرمەتتەدىك، ماقتان ەتتىك. ەندى سىزدەردىڭ ءبىزدىڭ بالالارىمىزدىڭ باستامالارىنا قاباتتاسۋلارىڭىزعا جول بولسىن؟ 91 توبى جاڭا زامانعا لايىقتالعان جانردا ونەر كورسەتىپ، الەمدىك پوپ مۋزىكا ىرعاقتارىنسىز جاڭا زامان تىنىسىن سەزىنە المايتىن وسكەلەڭ ۇرپاق، جاس بۋىننان تۇراتىن وزىندىك پۋبليكاسى بار توپ. ءبىزدىڭ بالالارىمىز، اۋەلى اللانىڭ اماناتىندا، ودان قالدى ءوزىمىزدىڭ باقىلاۋىمىزدا. ءدۇيىم قازاق جاستارىنىڭ تاربيەسى وسى بەس جىگىتتىڭ قولىندا ەمەس. بالانى تاربيەلەۋ – ساحناداعى بەس جىگىتتىڭ ەمەس، ۇيدەگى اتا-انانىڭ مىندەتى. ال كىمدە-كىم بالاسىن تاربيەلەي الماسا – كىنا وزىنەن. ونى ساحنا جۇلدىزدارىنان كورۋدىڭ تۇككە قاجەتى جوق. مۋزىكانت، ءانشى رەتىندە مۋزىكالىق جانرلارىن، جاساعان دۇنيەلەرىن: سينگل، البوم، پايىم، بەينەباياندارى جايلى سىن، كەم تۇستارىن ايتساڭىزدار ءوز ەرىكتەرىڭىز. ال، جەكە باسقا ءتيىسىپ، اتا-انالارىنىڭ بەرگەن تاربيەلەرىنە كۇمان كەلتىرۋ – شەكتەن شىققاندىق بولىپ تابىلادى. ءبىز ۇزاق ۋاقىت ۇندەمەي كەلدىك. سەبەبى ءبىزدى ىشكى مادەنيەتىمىز سالعىلاسىپ، بەت جارتىسىپ جاتۋعا جىبەرمەدى. ءالى دە "قازاقشىلدىق" تانىتىپ وتىرعانىمىزدى قاپەرلەرىڭىزگە ۇستاعايسىزدار! ءبىز بار بىلگەنىمىزدى بويىنا ءسىڭىرىپ، الاقانىمىزعا سالىپ وسىرگەن بالالارىمىز جايلى ايتىلىپ جاتقان عايبات سوزدەرگە قوسىلىپ، ءتىپتى، بەرگەن تاربيەمىزگە كۇمان كەلتىرىپ وتىرعاندار ءوزىمىز ەستى دەپ ساناپ كەلگەن ساكەن مەن مەيرامبەك بولعانى قىنجىلتتى»، – دەپ حاتتى اياقتاعان.
