ايگىلى باۋىرجان مومىش ۇلىنىڭ كەلىنى، جازۋشى، قازاقى سالت-داستۇرلەردى ناسيحاتتاۋشى زەينەپ احمەتوۆا قازاق قىزدارىنىڭ تويدا كيەتىن كويلەكتەرىن سىنعا الدى.
«قىزدار، اينالايىندار، تۇرمىسقا شىعاتىن كەزدە تويعا يىعى مەن كەۋدەسى اشىق، جوتاسى جالاڭاش، شەتەلدىك ۇلگىدەگى اق كويلەكتى كيمەڭدەرشى، باس تارتىڭدارشى سودان! نەگە وسى ءبىز وزگەنىڭ قاڭسىعىنا تاڭسىق بولامىز دا جۇرەمىز؟ بار عوي، قازاقتىڭ ادەمى كويلەكتەرى، ساۋكەلەسى! ءتىپتى، ارنايى تىكتىرۋگە دە بولادى. تويعا كەلەتىن ۇلكەن قاريالاردىڭ، اقساقالداردىڭ، اق جاۋلىقتى اجەلەردىڭ كوزىنشە جاڭا تۇسكەن كەلىننىڭ اشىق-شاشىق ءجۇرۋى جاراسپايدى. توي الدىندا بەتاشار جاسايتىنىمىز تاعى بار. ءوزى جارتىلاي جالاڭاش جۇرگەن كەلىننىڭ بەتىن اشۋدا نە ءمان قالادى؟
تاعى ءبىر تۇيتكىل: جاس كەلىننىڭ گۇل لاقتىرۋى. ول تەرىس قاراپ تۇرادى دا، قولىنداعى شوق گۇلدى ارت جاققا قاراي لاقتىرادى. ول جەردە كۇيەۋگە شىقپاعان ءبىر توپ جاس قىز ۋلاسىپ-شۋلاسىپ جاتادى. سىرتتاي قاراپ تۇرساڭ، وسىنىڭ ءوزى ەرسى ەمەس پە؟ سول تويدا الگى جاس بويجەتكەندەردىڭ اكە-شەشەسى، اعا-جەڭگەسى، اعايىن-تۋىسى وتىر. قانشا بايسىراپ بارا جاتساڭ دا، سولاردىڭ كوزىنشە «تەزىرەك كۇيەۋگە تيەيىن» دەپ گۇلگە سونشا تالاسىپ نە كورىندى؟»، – دەيدى زەينەپ احمەتوۆا.
«كوپ جاساعاننان سۇراما، كوپتى كورگەننەن سۇرا»، – دەيدى قازاق. كەلىندىك قىزمەتتىڭ قاتال سىنىنان وتكەن زەينەپ احمەتوۆانىڭ وسيەتى جاس كەلىندەرگە ۇلگى بولارى انىق.
