قازاقستاندىق بوكسشىلارى اراسىندا، ونىڭ ىشىندە ءوزىمىزدىڭ قاراكوزدەر قاتارىنداعى ءبىرى دە بىرەگەيى جانقوش تۇراروۆ شىعار. جاستايىنان ۇزدىك شىعۋعا تالپىنىپ، بىلەگىن بەكىتىپ، كاسىبي سپورتقا، ونىڭ ىشىندە بوكسقا دەن قويعانداردىڭ ىشىندەگى امەريكا اسىپ، ءوز بەتىمەن لاس-ۆەگاستا رينگتە اتوي سالعان از قانداستارىمىزدىڭ دا ءبىرى وسى – جانقوش.

ارينە، شارشى الاڭعا شىققاننان كەيىن الەمدە ۇزدىك اتانۋدى ارماندامايتىن سپورتشى جوق. جانقوش تا بالالىق شاعىنان ءوز الدىنا وسىنداي اسقاق مىندەت قويعان ەكەن. ءقازىر ول سول بيىك ارمانىنا جەتۋ ءۇشىن تەر توگىپ ءجۇر جانە «مەن الەم چەمپيونى بولامىن!» دەگەن ۋادەسىن ورىنداۋدىڭ الدىندا تۇر. تاياۋدا وتاندىق سايتتاردىڭ بىرىنە بەرگەن سۇحباتىندا ول: «ارمانىما جەتۋگە ءسال عانا قالدى»، – دەپ اشىعىن ايتقان بولاتىن.

ول كاسىبي رينگتەگى ەڭ ەستە قالارلىقتاي جەكپە-جەگىن وتانىمىزدا، «الماتى-ارەنا» سپورت سارايىندا وتكىزگەنىن ماقتانىشپەن ەسكە الادى. «18 مىڭعا جۋىق جانكۇيەرلەر جينالدى. ءبارى دە «جانقوش – جەڭىمپاز» دەپ ءبىر ادامداي ۇرانداعانداعى تولعانىسىمدى، ىشكى جان-دۇنيەمنىڭ اۋدارىلىپ تۇسكەنىن سوزبەن جەتكىزە المايمىن. مۇنىڭ قانداي باقىت ەكەنىن بىلسەڭىز عوي»، – دەپ اعىنان جارىلادى ول.

جانقوش قازاقستاندا سپورتتىڭ دامۋىنا ەلباسى زور قولداۋ كورسەتىپ وتىرعانىن اتاپ كورسەتتى، سول ءۇشىن نۇرسۇلتان نازاربايەۆقا العىسىن جەتكىزدى. "مەملەكەتىمىز باسشىسىنىڭ وسىنداي ساياساتى ارقاسىندا ق ر مادەنيەت جانە سپورت ءمينيسترى ا. مۇحامەدي ۇلى قازاقستاندىق سپورتتى جانە بوكستى دا ودان ءارى دامىتۋ ماقساتىندا بولاشاعى زور باعدارلامالاردى جۇزەگە اسىرۋدا"، – دەيدى جەڭىمپاز بوكسشى.

– ارىستانبەك مۇحامەدي ۇلىنىڭ ءوزى مينيستر بولىپ جۇمىس ىستەپ جاتقان كەزەڭ ارالىعىندا قازاق سپورتىن كوتەرۋ جولىندا قىرۋار ەڭبەك ءسىڭىردى. الەمدىك، ازيا قۇرلىعى بىرىنشىلىكتەرىندە دە ءبىزدىڭ سپورتشىلار وتە جوعارى كورسەتكىشتەرگە قول جەتكىزدى. مادەنيەت سالاسىندا دا بۇكىل ەلىمىز بويىنشا ءمانى زور، اۋقىمدى شارالار، كونسەرتتەر وتكىزىلدى. ءبارى دە اسا جوعارى دەڭگەيدە ۇيىمداستىرىلدى. وسىنىڭ بارلىعى دا ءمينيستردىڭ تىكەلەي قولداۋى ناتيجەسىندە جۇزەگە اسۋدا، – دەيدى جانقوش تۇراروۆ.

ءدال ءقازىر ول حالىقارالىق «ەكسپو-2017» كورمەسى اياسىنداعى 9-شى قىركۇيەكتە وتاندىق بىلعارى قولعاپ شەبەرلەرى كوشباسشىلارىنىڭ ءبىرى قانات يسلامنىڭ بەلگىلى كانادالىق بوكسشى برەندون كۋكقا قارسى وتكىزەتىن كاسىبي بوكس كەشىنە قاتىسۋعا قىزۋ دايارلىق ۇستىندە.