باتىس قازاقستان وبلىسىنداعى ورال قالاسىندا ەكى جولاۋشى اۆتوبۋستارى مەن ەكى جەڭىل كولىگىنىڭ قاقتىعىسۋى سالدارىنان 45-كە جۋىق ادام زارداپ شەككەن. بۇل تۋرالى دەنساۋلىق ساقتاۋ دەپارتامەنتى باسشىسىنىڭ ءتوراعاسى گۇلنار ءابدىراحمانوۆا حابارلادى، دەپ جازادى Qamshy.kz اقپارات اگەنتتىگى.

جول-كولىك وقيعاسى بەيسەنبى كۇنى جەرگىلىكتى ۋاقىتپەن 08:40-تا بولعان. العاشىندا 20 ادامنىڭ زارداپ شەككەنى حابارلانعان، ولاردىڭ تورتەۋى كىشكەنتاي بالالار، ال بىرەۋى جۇكتى ايەل.

«زارداپ شەككەندەردىڭ سانى 45-كە جەتتى، 15 ادام وبلىستىق اۋرۋحانادا تەكسەرۋدەن ءوتىپ جاتىر، ال 30-ى قالالىق كوپفۋنكسيونالدى اۋرۋحاناعا جەتكىزىلدى»، – دەدى گۇلنار ءابدىراحمانوۆا.

ءابدىراحمانوۆانىڭ ايتۋىنشا، جۇكتى ايەل كەۋدە جاراقاتىمەن اۋرۋحانادا جاتىر. 17 جاستاعى ءجاسوسپىرىمنىڭ باس ميى جاراقاتتانعان، 16 جاستاعى ءجاسوسپىرىمنىڭ بۇيرەگىنە زاقىم كەلدى. 10 جاستاعى بالا مەن بىرگە تولعان ءسابيدىڭ دەنساۋلىقتارى تەكسەرىلۋ ۇستىندە.

وبلىستىق ىشكى ىستەر دەپارتامەنتى پوليسەي قىزمەتىنىڭ باسشىسى ماناربەك ناجييەۆتىڭ مالىمەتىنشە، №7 اۆتوبۋستىڭ جۇرگىزۋشىسى Reunalt Duster جەڭىل اۆتوكولىگىمەن سوعتىعىسقان. سونىڭ سالدارىنان ديستانسيانى ساقتاي الماعان اۆتوبۋس الدىندا كەتىپ بارا جاتقان اۆتوبۋسقا سوعىلادى. ول اۆتوبۋس وزگە جەڭىل كولىكتى سوقتى. قازىرگى ۋاقىتتا جول-كولىك وقيعاسىنا بايلانىستى تەرگەۋ جۇمىستارى ءجۇرىپ جاتىر.