بانگلادەشتىڭ جاڭارتىلاتىن ەنەرگيا كوزدەرىنىڭ قۋاتى 423 مۆت قۇرايدى دەپ حابارلايدى Qamshy.kz اقپارات اگەنتتىگى.
بۇل تۋرالى ەكسپو-2017 حالىقارالىق مامانداندىرىلعان كورمەسى اياسىندا ەلدىڭ ۇلتتىق كۇنىن مەرەكەلەۋ بارىسىندا بانگلادەش حالىق رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى موسۋد ماننانا مالىمدەدى. ءوز سوزىندە موسۋد ماننانا بانگلادەش تازا جاسىل ەنەرگيا مەن جاڭارتىلاتىن ەنەرگيا كوزدەرىمەن بايلانىستى مىندەتتەمەلەرىن ورىندايتىنىن اتاپ ءوتتى. ونىڭ ايتۋىنشا، قازىرگى كەزدە قۋاتى 282 مۆت قۇرايتىن جاسىل ەنەرگيانى وندىرە الاتىن جوبالار جۇزەگە اسىرىلۋدا.
«بانگلادەش جەكە جانە جەلىدەن تىس ايماقتاردا كۇن ەنەرگياسىن تۇتىناتىن ۇيلەر جۇيەلەرىن قۇرۋ ارقىلى ۇلكەن جەتىستىكتەرگە جەتتى. بۇگىندە 4.4 ميلليون كۇن ەنەرگياسىن تۇتىناتىن ۇيلەر جۇيەلەرى ورناتىلدى. دۇنيەجۇزىلىك بانك بايانداماسى، جاڭارتىلاتىن ەنەرگيا كوزدەرىنە شولۋ جانە جۇمىس ورىندارىنا قاتىستى ءبىر جىلدىق شولۋعا سايكەس، بانگلادەشتىڭ كۇن ەنەرگياسى جۇيەسى الەمدەگى تابىستى جوبالاردىڭ ءبىرى بولىپ تابىلادى. سونداي-اق، مەملەكەتىمىز جەل ەنەرگياسى، كەلگىنسۋلار ەنەرگياسى، تولقىن ەنەرگياسى، بيوگاز جانە باسقا دا جاڭارتىلاتىن ەنەرگيا كوزدەرىن قولدانۋ مۇمكىندىگىن زەرتتەۋدە. كورمەنىڭ «بولاشاق ەنەرگياسى» تاقىرىبى ەنەرگەتيكالىق بالانستى قايتا قالپىنا كەلتىرۋ ماسەلەسىن تالقىلاۋعا مۇمكىندىك بەردى»، - دەپ مالىمدەدى موسۋد ماننانا.
ءوز كەزەگىندە قازاقستان رەسپۋبليكاسى ادىلەت ءمينيسترىنىڭ ورىنباسارى جانات ەشماعامبەتوۆ استانا قالاسىنداعى ەكسپو-2017 كورمەسىندە بولاشاق ەنەرگياسىنىڭ دامۋى ءۇشىن ۇلكەن ۇلەس قوساتىن الەمدەگى وزىق عىلىمي جانە تەحنولوگيالىق جەتىستىكتەر جينالعاندىعىن اتاپ ءوتتى. ونىڭ ايتۋىنشا، كورمە جاسىل ەنەرگەتيكا پروگرەسسىنىڭ نىشانى جانە ادامزاتتىڭ جاڭارتىلاتىن ەنەرگيا كوزدەرىنە كوشۋ تالپىنىسىنىڭ كورىنىسى بولىپ تابىلادى.
«حالىقارالىق كورمە يندۋستريالاندىرۋدىڭ نىشانى، سونداي-اق، تەحنيكالىق جانە تەحنولوگيالىق جەتىستىكتەردى تانىستىرۋ ءۇشىن تاماشا مۇمكىندىك بولىپ تابىلادى. «بولاشاق ەنەرگياسى» تاقىرىبىنداعى ەكسپو-2017 كورمەسى بالامالى ەنەرگيا كوزدەرى، الەم بويىنشا تازا ەنەرگيانى تاراتۋ سياقتى حالىقارالىق قاۋىمداستىقتىڭ وزەكتى ماسەلەلەرىنىڭ بىرىنە ارنالعان»، – دەپ اتاپ ءوتتى جانات ەشماعامبەتوۆ.
ەكسپو-2017 كورمەسىنە 115 مەملەكەت جانە 22 حالىقارالىق ۇيىمدار قاتىسۋدا. سونداي-اق ءىرى كورپوراسيالار بالامالى ەنەرگيا كوزدەرى سالاسىنداعى جەتىستىكتەرى مەن ازىرلەمەلەرىن ۇسىنۋدا.
