بۇگىن، 24 تامىزدا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ەقىۇ پارلامەنتتىك اسسامبلەياسىنىڭ ءتوراعاسى اۆستريا رەسپۋبليكاسى پارلامەنتى ۇلتتىق كەڭەسىنىڭ دەپۋتاتى كريستين مۋتتونەنمەن كەزدەستى دەپ حابارلايدى Qamshy.kz اقپارات اگەنتتىگى.  

نۇرلان ەرمەكبايەۆ كەزدەسۋ بارىسىندا مينيسترلىكتىڭ اتقارىپ وتىرعان قىزمەتى تۋرالى جانە كونفەسسياارالىق قاتىناس ورناتۋدا قازاقستاننىڭ جەتكەن جەتىستىكتەرى جايلى ءسوز قوزعادى.

«قازاقستان ەتنوكونفەسسيالىق قۇرامىمەن ەرەكشەلەنەدى. ەلىمىزدە 100-دەن اسا وزگە ەتنوس وكىلدەرى تۇرىپ جاتىر. بۇل رەتتە قازاق ەلىنىڭ كوپكونفەسسيالى قوعامدا تاتۋلىقتى نىعايتۋ، قاۋىپسىزدىك پەن بەيبىتشىلىكتى قامتاماسىز ەتۋ تۇرعىسىندا وزىندىك بىرەگەي تاجىريبەسى بار. ەلىمىزدىڭ وسىناۋ تاجىريبەسى الەمدىك قاۋىمداستىق الدىندا زايىرلى مەملەكەتتىڭ تۇراقتى دامۋ مودەلى رەتىندە قابىلداندى»، –دەپ اتاپ ءوتتى مينيستر نۇرلان ەرمەكبايەۆ.  

ءدىن ىستەرى جانە ازاماتتىق قوعام ءمينيسترى قابىلدانعان ءدىن سالاسىنداعى مەملەكەتتىك ساياسات تۇجىرىمداماسىنا جانە مينيسترلىك ازىرلەپ جاتقان زاڭ جوباسىنىڭ ماڭىزدىلىعىنا ايرىقشا توقتالىپ ءوتتى. 

ەقىۇ پارلامەنتتىك اسسامبلەياسىنىڭ ءتوراعاسى كريستين مۋتتونەن حانىم مەملەكەت پەن ءدىني ۇيىمدارى سۇحباتىنىڭ قازاقستاندىق تاجىريبەسىنە قىزىعۋشىلىق ءبىلدىردى. ۇلتتىق ءداستۇردى جاڭعىرتۋ جانە ءدىني ەكسترەميزمنىڭ كورىنىسى مەن جات يدەيالارعا قارسى تۇرۋداعى مەملەكەتتىڭ زايىرلىلىق قاعيدالارىن نىعايتۋ جۇمىستارىن جوعارى باعالادى.

كەزدەسۋ بارىسىندا تاراپتار ارىپتەستىكتى دامىتۋدىڭ پەرسپەكتيۆالىق باعىتتارىنا جانە جاقىندا عانا ەقىۇ پارلامەنتتىك اسسامبلەياسى اياسىندا قۇرىلعان تەرروريزمگە قارسى ءىس-قيمىل جونىندەگى كوميتەتىمەن بىرلەسىپ جۇمىس ىستەۋگە دايىن ەكەندىكتەرىن ءبىلدىردى.    

كەزدەسۋگە سونداي-اق، ەقىۇ پارلامەنتتىك اسسامبلەياسىنىڭ باس حاتشىسى روبەرتو مونتەللا جانە اۆستريانىڭ قازاقستانداعى ەلشىسى گەرحارد سايللەر قاتىستى.  

ەستەرىڭىزگە سالا كەتسەك، بيىلعى جىلى قازاقستاننىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا قاتىسۋشى مەملەكەت رەتىندە قابىلدانعانىنا 25 جىل تولىپ وتىر.