الماتى قالاسىنىڭ ىرگەسىندەگى ۇزىناعاش كەنتىندە قازاقستان رەسپۋبليكاسى ۇلتتىق ۇلانىنىڭ 25 جىلدىق مەرەكەسىنە ورايلاستىرىلىپ رەگبيدەن جارىس ءوتتى دەپ حابارلايدى Qamshy.kz اقپارات اگەنتتىگى ق ر ۇلتتىق ۇلانى «وڭتۇستىك» وڭىرلىك قولباسشىلىعى باسپا ءسوز قىزمەتىنە سىلتەمە جاساپ. 

اتالعان ءدۇبىرلى دودانى ۇيىمداستىرۋعا قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعى ۇيىتقى بولدى. جارىسقا سەگىز كوماندا قاتىستى.

رەگبي ويىنى جايلى قىسقا توقتالا ەتسەك، 2015 جىلدان بەرى «رەگبي» ويىنى وليمپيادا ويىندارىنىڭ قۇرامىنا كىرىپ، كۇللى الەمدە ۇلكەن بەدەلگە يە بولىپ تۇر. جالپى العاندا، رەگبي ويىنىن مىقتىلاردىڭ ويىنى نەمەسە اسكەريلەردىڭ ويىنى دەپ جاتادى. ويتكەنى شەت مەملەكەتتەردە اسكەري سالادا كەڭ وركەن جايعان ويىن. ياعني، اسكەري سالادا دامىتۋعا قولايلى جارىس ءتۇرى. قازىرگى تاڭدا ۇلتتىق ۇلان سابىندا اتالعان سپور ءتۇرىن دامىتۋ ءجىتى نازارعا الىنعان.

2015 جىلى ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆتىڭ بۇيرىعىمەن رەگبي ۇلتتىق ۇلاندا قولدانبالى سپورت ءتۇرىنىڭ قاتارىنا ەندى. وتكەن جىلى تۇڭعىش رەت رەگبيدەن ۇلتتىق ۇلاننىڭ بىرىنشىلىگى بولىپ ءوتتى.

دودانىڭ اشىلۋ راسىمىنە كۇش-قۋات ورگاندارىنىڭ جەتەكشىلەرى اۋداندىق ءماسليحات دەپۋتاتتارى، سونداي-اق رەسپۋبليكالىق سپورت ۇيىمدارىنىڭ جانە بۇقارالىق اقپارات قۇرالدارىنىڭ وكىلدەرى قاتىستى. شاراعا ارنايى كەلگەن قازاقستان رەگبي فەدەراسياسىنىڭ پرەزيدەنتى مۇرات جۇمابەك ۇلى ۋانبايەۆتىڭ ايتۋىنشا، قازاقستاندا رەگبي ويىنى 1966 جىلدان بەرى وينالىپ، كوبىنە-كوپ ستۋدەنتتەر قاۋىمى اراسىندا وينالىپ كەلەدى ەكەن. 80ء-شى جىلدارى الماتى پوليتەحنيكالىق ينستيتۋتىنىڭ ستۋدەنتتەرى كسرو چەمپيوناتىنا دا قاتىسىپ، باس جۇلدەنى جەڭىپ العان ەكەن. «قازىرگى تاڭدا رەگبي ويىنى قارقىندى دامۋ ۇستىندە. اسىرەسە، اسكەري سالادا ۇلتتىق ۇلاننىڭ قولباسشىلىعى بۇل ويىنعا ۇلكەن ءمان بەرىپ، قولدانبالى سپورت رەتىندە دامىتۋعا كۇش سالۋدا. ۇلاندىقتار سوڭعى جىلدارى بارلىق اسكەري بولىمدەرىندە وسى ويىننان جارىستار وتكىزىپ، سوڭىنان ۇلكەن كولەمدەگى رەسپۋبليكالىق دودانى ۇيىمداستىرىپ وتىر. سالاۋاتتى ءومىر سالتىن ناسيحاتتاپ، سپورت اتاۋلىعى كەڭ تۇردە كوڭىل ءبولىپ وتىرعان ۇلتتىق ۇلان قولباسشىلىعىنا العىسىمدى بىلىدىرەمىن»، – دەپ اتاپ ءوتتى قازاقستان رەسپۋبليكاسى رەگبي فەدەراسياسىنىڭ ءتوراعاسى م.ۋانبايەۆ.

جارىستىڭ قورىتىندىسى بويىنشا الماتى قالاسى 3650 اسكەري ءبولىمىنىڭ سپورتشىلارى باس جۇلدەنى يەلەنىپ، ۇلتتىق ۇلان «وڭتۇستىك» وڭىرلىك قولباسشىلىعى قولباسشىسىنىڭ كۋبوگىن يەلەندى. ال ەكىنشى ورىننان الماتىلىق 7552 اسكەري ءبولىمى كورىنسە، قولا جۇلدەنى تاراز قالاسىنان كەلگەن 5513 اسكەري ءبولىمىنىڭ رەگبي كومانداسى يەلەندى.

ويىننىڭ ۇزدىك ويىنشىسى بولىپ، 6698 اسكەري ءبولىمىنىڭ سپورتشىسى سەرجانت قاھارمان نامبايەۆ تانىلدى.

جەڭىمپازدار باعالى سىيلىقتارمەن ماراپاتتالىپ، سونىمەن قاتار 28237 اسكەري ءبولىمىنىڭ دەنە شىنىقتىرۋ جانە سپورت قىزمەتىنىڭ باستىعى مايور تولەگەن ابدراحيموۆقا جانە ويىن سۋديالارى باعدات مولداحمەتكە، تاير  ميكۋليچكە قولباسشى اتىنان العىس جاريالاندى.