بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد قاراعاندى وبلىسىنا باردى. ساپاردىڭ باستى ماقساتى – پرەزيدەنتىك باعدارلامالاردىڭ كەنشىلەر وڭىرىندە جۇزەگە اسۋ بارىسىن قاداعالاپ، قولعا الىنعان جۇمىستارمەن تانىسۋ.

جالپى پارتيا ءتوراعاسى، قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆتىڭ تاپسىرماسىنا وراي نۇروتاندىقتار مەملەكەتتىك باعدارلامالاردى جۇزەگە اسىرۋ ءۇشىن بولىنگەن قاراجاتتىڭ ماقساتتى ءارى ءتيىمدى جۇمسالۋىنا ۇدايى باقىلاۋ جۇرگىزەدى. سوعان وراي مۇحتار قۇل-مۇحاممەد مامانداندىرىلعان كولىك-لوگيستيكالىق ورتالىقتىڭ اۋماعىندا ورنالاسقان «ريگەر» جشس-عا ارنايى باردى. بۇل جەردە دارى-دارمەكتەر مەن مەديسينالىق زاتتار ساقتالادى. كەشەن اۆستريا مەن رەسەيدەن اكەلىنگەن زاماناۋي قوندىرعىلارمەن جابدىقتالعان جانە مۇندا جۇمىس ۇدەرىسىنىڭ تيىمدىلىگىن ارتتىرۋ ءۇشىن اۆتوماتتاندىرىلعان باسقارۋ جۇيەسى ەنگىزىلگەن.

سونىمەن قاتار، «نۇر وتان» پارتياسى ءتوراعاسىنىڭ ءبىرىنشى ورىنباسارى جاڭادان ىسكە قوسىلعان ەسكىرگەن كولىكتەردى جويۋ زاۋىتىندا بولدى. «سارىارقا» ارنايى ەكونوميكالىق ايماعىندا ورنالاسقان زاۋىتتىڭ ورتالىق ازيادا ەشقانداي بالاماسى جوق. مۇنداعى يندۋكسيالىق بالقىتۋ پەشىنىڭ ءبىر جىلدىق جوبالىق قۋاتى 22740 تونناعا دەيىن جەتەدى. زاۋىتتا اۆتوقالدىقتاردان پەشتىك وتىندار، شويىن، بولات، اليۋمينيي، ءتۇرلى-تۇستى مەتالل قۇيمالارى جانە رەزەڭكە قيىندىلارى دايىندالادى.

ايتا كەتەيىك، اتالعان ەكى كاسىپورىن دا يندۋستريالدى-يننوۆاسيالىق دامۋ باعدارلاماسى جانە «بيزنەستىڭ جول كارتاسى-2020» مەملەكەتتىك باعدارلامالارىنىڭ ناتيجەسىندە ىسكە قوسىلعان.

سونداي-اق، پارتيا ءتوراعاسىنىڭ ءبىرىنشى ورىنباسارى كەنشىلەر وڭىرىندەگى تاعى ءبىر زاماناۋي كاسىپورىن – «يزوپليۋس ورتالىق ازيا» جشس-عا باردى. مۇندا قۇبىرلاردى يزولياسيالاۋ جۇمىستارى جۇرگىزىلەدى. زاۋىتتىڭ ونىمدەرى جىلۋ قۇبىرلارىنان باستاپ مۇناي قۇبىرلارىن جۇرگىزۋگە دەيىن قولدانىلادى. كاسىپورىنعا مەملەكەت تاراپىنان ءتيىستى قولداۋلار تۇراقتى كورسەتىلىپ كەلەدى. «سارىارقا» ارنايى ەكونوميكالىق ايماعىندا ورنالاسقان «يزوپليۋس» ج ش س بۇگىندە 50 ادامدى تۇراقتى جۇمىسپەن قامتىپ وتىر.

مۇحتار قۇل-مۇحاممەد وڭىردەگى وسىنداي وڭ وزگەرىستەردى جوعارى باعالاپ: «ەلباسىمىز بۇكىل ەلىمىزگە، ءاربىر قازاقستاندىققا قاجەت جاعدايدىڭ ءبارىن جاسادى. «قازاقستان-2050» ستراتەگياسى قابىلداندى، «100 ناقتى قادام» ۇلت جوسپارى بەكىتىلدى، ولاردى جۇزەگە اسىرۋ ءۇشىن جىل سايىن تريلليونداعان تەڭگە قاراجات بولىنۋدە. ەندى بىزگە تەك بىلەك سىبانىپ جۇمىس ىستەۋ عانا قالدى. بۇگىن مەن قاراعاندى وبلىسىندا ەلباسى تاپسىرمالارىنىڭ تابىستى ورىندالعانىنىڭ كۋاسى بولدىم»، – دەدى.

بۇگىندە ەلباسى ەڭبەك جولىن باستاعان قاراعاندى وبلىسى ونەركاسىپ سالاسى بويىنشا ەلىمىزدىڭ ەڭ ۇزدىگى. وعان دالەل رەتىندە قازاقستانداعى وڭدەۋ سالاسىنىڭ بەستەن ءبىر بولىگىن وسى وبلىس قامتاماسىز ەتەتىنىن ايتساق تا جەتكىلىكتى. ناقتى ايتقاندا، قاراعاندى وڭىرىندە 2017 جىلدىڭ قاڭتار-شىلدە ايلارىندا ءوندىرىس كولەمى 950 ملرد. تەڭگەدەن اسىپ، 3،6 پايىزعا كوبەيگەن. بۇعان مەملەكەتتىك باعدارلامالاردىڭ جۇزەگە اسۋ بارىسىن «نۇر وتان» پارتياسى ۇنەمى باقىلاۋدا ۇستاپ، ولقى تۇستاردى دەر كەزىندە انىقتاپ، الدىن الۋى دا زور ۇلەسىن قوسقانى ءسوزسىز.