بيىل ەلدەگى جاڭا ساياسي ناۋقان قوڭىر كۇزدى كۇتپەي-اق باستالىپ كەتتى. كۇنى كەشە پرەمەر-مينيستردىڭ جاڭا ەكى ورىنباسارى تاعايىندالدى. ۇكىمەت قۇرامىنداعى مادەنيەت جانە سپورت، ءبىلىم جانە عىلىم، دەنساۋلىق ساقتاۋ، الەۋمەتتىك دامۋ مينيسترلىكتەرىنىڭ جۇمىسىنا جاۋاپتى ۆيسە-پرەمەرلىك لاۋازىمنىڭ ءالى قالپىنا كەلتىرىلمەگەنىن (اقپان ايىندا وسى لاۋازىمدى اتقارعان يمانعالي تاسماعامبەتوۆ رەسەيگە ەلشى بوپ كەتىپ، ورنىنا ەشكىم تاعايىندالماعان بولاتىن – رەد.) ەسكەرسەك، مينيسترلەر كابينەتى الداعى ۋاقىتتا قۇرىلىمدىق تا وزگەرىستەرگە ۇشىراۋى مۇمكىن.

پرەمەر-مينيستر باقىتجان ساعىنتايەۆتىڭ ۇكىمەت تىزگىنىن ۇستاعانىنا 9 قىركۇيەكتە ءبىر جىل تولادى. بۇل مۇنداي لاۋازىم ءۇشىن اسا كوپ ۋاقىت ەمەس. بۇعان دەيىنگى پرەمەرلەردىڭ ىشىندە ەڭ از وتىردى دەگەن ي.تاسماعامبەتوۆتىڭ ءوزى اتالعان لاۋازىمدى ءبىر جارىم جىلداي اتقارعان ەدى. ساعىنتايەۆتىڭ جۇمىسىنا ءالى پرەزيدەنت تاراپىنان ايتارلىقتاي سىن ايتىلمادى. كەيبىر الدىڭعى ارىپتەستەرىندەي اقپارات قۇرالدارىندا دا اشىق شابۋىلعا ۇشىراعان جوق. دەگەنمەن، ءبىزدىڭ ساياساتتا ءبارى دە بولا بەرەدى. ماسەلەن، يمانعالي تاسماعامبەتوۆ رەسەيگە ەلشى بوپ كەتەدى دەگەن دە ەشكىمنىڭ ويىندا جوق ەدى. سول سياقتى جاقىن كۇندەرى پرەزيدەنت ۇكىمەت باسشىسىن اۋىستىرىپ جاتسا، تاڭ قالىپ كەرەك ەمەس.

ەگەر بولا قالسا، ول ءاۋىس-تۇيىس باقىتجان ءابدىر ۇلىنىڭ بىلىكسىزدىگىنەن، نە قازاقستان ۇكىمەتىنىڭ وزىنە جۇكتەلگەن مىندەتتەردى اتقارا الماۋىنان بولمايدى. ونىڭ ۇستىنە پرەمەر اۋىسقانمەن، مينيسترلەر قۇرامى قاتتى وزگەرىسكە ۇشىرامايتىنى بۇعان دەيىنگى اۋىس-تۇيىستەردەن بەلگىلى. جىل باسىندا جاريالانعان ساياسي جاڭعىرۋ دە-يۋرە ۇكىمەتكە ءبىرشاما دەربەستىك بەردى. مەملەكەتتىك باعدارلامالاردى قابىلداۋ مەن جۇزەگە اسىرۋ جاۋاپكەرشىلىگى تولىقتاي مينيسترلەر كابينەتىنىڭ موينىنا جۇكتەلەدى. ودان بولەك الداعى بيلىك ءترانزيتى قارساڭىندا ساياسي ەليتانى تاعى دا ءبىر ەلەكتەن وتكىزىپ، ەسكى گۆارديانىڭ ەلەۋلى تۇلعالارىنا بيلىك باسپالداقتارىن مىقتاپ ءبولىپ بەرۋ كەرەك. وسى تۇرعىدان العاندا ەلدەگى ساناۋلى كونستيتۋسيالىق لاۋازىمداردىڭ ءبىرى ۇزاق جىلعى سىناقتاردان سۇرىنبەي وتكەن، مەملەكەتتىك اپپارات پەن قارجى-وندىرىستىك توپتار اراسىندا سالماقتى تۇلعاعا تابىستالۋى قاجەت.

بۇل ورىنعا احمەتجان ەسىموۆتىڭ كانديداتۋراسىن نەگە ايتىپ وتىرمىز؟ قازىرگى تاڭدا «استانا ەكسپو-2017» ۇلتتىق كومپانياسىن باسقارىپ وتىرعان ول جاقىن كۇندەرى حالىقارالىق كورمە جۇمىسىن قورىتىندىلاپ، ءوز ميسسياسىن اتقارىپ بولادى. كورمە پاۆيلوندارىنىڭ قۇرىلىسى كەزىندەگى بىردى-ەكىلى وقيعالار بولماسا، جالپى ەكسپو ىڭ-شىڭسىز ءوتتى. كەلەدى دەگەن قوناقتاردىڭ سانى ارتىعىمەن بولماسا دا ورىندالدى. كورمەنى ۇيىمداستىرۋ مەن وتكىزۋ كەزىندە ءبىرشاما قارجى ۇنەمدەلگەنى تۋرالى دا ايتىلىپ قالىپ ءجۇر. بۇنىڭ بارلىعى ەسىموۆتى ءتيىمدى مەنەدجەر، شەبەر ۇيىمداستىرۋشى، سالماقتى ساياساتكەر ەتىپ كورسەتەتىن جاعدايلار. ەلباسىنىڭ ءوزى ايتقانداي، احمەتجان ەسىموۆ باسقا دا مەملەكەتتىك قايراتكەرلەرمەن بىرگە بۇگىنگى قازاقستاننىڭ نەگىزىن قالاعان ازامات. ولاي بولسا، سىندارلى ساتتە ۇكىمەت تىزگىنىن نەگە ۇستاتپاسقا؟!

بۇل – بولجام، ارينە. ءبىراق، ءبىراز تاقىرىپقا تۇزدىق بولارلىقتاي بولجام. بيلىك باسىنداعى وزگەرىستەر ءبىر پرەمەر لاۋازىمىمەن شەكتەلەدى دەۋدەن جانە اۋلاقپىز. ۇلكەن وزگەرىستەر مەن وتپەلى كەزەڭدە ەلدەگى تۇراقتىلىق پەن ەليتانىڭ ىمىرا-بىرلىگىن ساقتاپ، بارلىق تاراپتاردىڭ مۇددەسى ەسكەرىلۋى ءۇشىن پارلامەنت پالاتالارىنىڭ جەتەكشىلەرى، مەملەكەتتىك حاتشى، باس پروكۋرور مەن جوعارعى سوت ءتوراعاسى لاۋازىمدارى دا قايتا بولىسكە ءتۇسۋى عاجاپ ەمەس.

جەڭىس سابىرجان ۇلى