قۇربان ايتقا ساناۋلى كۇندەر قالدى. اللانىڭ رازىلىعىنان ۇمىتتەنگەن جاندار قۇرباندىققا سوياتىن مالدى تاڭداۋدا وتە مۇقيات بولۋى قاجەت. قۇرباندىقتىڭ اللانىڭ قۇزىرىندا قابىل بولۋىنىڭ مۇسىلمان ءۇشىن ماڭىزدىلىعىن ەسكەرسەك، ءبىرىنشى ىقىلاس-نيەت دۇرىس بولۋى، ەكىنشى سويىلاتىن مال جارامدى بولۋى كەرەك دەپ جازادى قمدب ۋاعىز-ناسيحات ءبولىمىنىڭ مەڭگەرۋشىسى ەرشات وڭعاروۆ ءوزىنىڭ Facebook پاراقشاسىندا.
ءمۇفتياتتىڭ رەسمي سايتىندا: "ەشكىنىڭ جانە قويدىڭ جاسى ءبىر جىلدان اسىپ ەكىنشى جىلعا كىرگەنى، سونداي-اق التى ايلىق مارقا قوزى (ۇلكەن قوي سەكىلدى) ءىرى، قوڭدى بولسا قۇرباندىققا جارامدى. سيىردىڭ ەكى جاسقا تولىپ، ءۇشىنشى جىلعا كىرگەنىن، ال تۇيەدەن جاسى بەس جىلدان اسىپ، التىنشى جىلعا كىرگەنىن قۇرباندىققا شالۋعا بولادى. سونىمەن قاتار سويىلاتىن مالدىڭ كەمشىلىك، كىناراتى بولماۋى كەرەك" دەلىنگەن (fatua.kz). 
قويدىڭ ءبىر جاسى شامامەن 6 اي. سەبەبى، ساۋلىقتارىنىڭ بۋازدىق مەرزىمى 145 – 155 تاۋلىككە سوزىلادى، ياعني ورتاشا ەسەپپەن 5 اي 10 كۇن (kk.m.wikipedia.org). سول ءۇشىن شاريعاتتا التى ايدان اسقان توقتى قۇرباندىققا جارامدى دەلىنگەن.
وسى ورايدا ەسكەرتكىم كەلگەنى، بيىلعى توقتىلاردىڭ بارلىعى قۇرباندىققا جارامايدى. ويتكەنى توقتىنىڭ جاسى كەم دەگەندە التى ايدان اسقان جانە ءىرى بولۋى شارت. دالىرەك ايتقاندا، اعىمداعى جىلدىڭ ناۋرىز ايىنا دەيىن تۋىلعان ءتول بولۋى ءتيىس. ەلىمىزدىڭ بىرنەشە وڭىرلەرىندە ساقمان ءساۋىر ايىندا باستالاتىنى بەلگىلى. اسىرەسە ورتالىق جانە سولتۇستىك ايماقتاردا.
سوندىقتان قۇربان مالىن ساتۋشىلار مەن تۇتىنۋشىلار وسىنى ەسكەرسە ەكەن دەيمىن.
كەلە جاتقان قۇربان ايت قۇتتى بولسىن! قۇرباندىقتارىڭىز قابىل بولسىن! «ەشبىر قۇل قۇربان كۇنى اللانىڭ قۇزىرىندا قۇرباندىق قانىن اعىزعاننان ارتىق جاقسى امال جاساي المايدى. ويتكەنى شالىنعان مالدىڭ ءمۇيىزى، قىلى جانە تۇياقتارى قيامەت كۇنى مول ساۋاپ اكەلەدى. شالىنعان قۇرباندىقتىڭ قانى جەرگە اقپاستان بۇرىن اللانىڭ قۇزىرىندا جوعارى مارتەبەگە جەتەدى. ولاي بولسا، شىن كوڭىلمەن قۇربان شالىڭىز» (xاديس).