تۇرىك ارمياسى سيريانىڭ افرين قالاسىنىڭ كوشەلەرىندە راكەتالىق سوققى جاساپ، وق جاۋدىردى. سالدارىنان 10 شاقتى تۇرعىن زارداپ شەككەن دەپ حابارلايدى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ. بۇل جايىندا افرينداعى كۇرد ساياساتكەرى رەزان حەدۋ ايتىپ بەردى.

«بۇگىن افرين قالاسىنداعى كوشەلەر تۇركيا تاراپىنان ۇلكەن اپاتقا ۇشىرادى. قاراپايىم حالىقتىڭ ۇيلەرى قيراپ، ون شاقتى ادام جاراقات الدى، ولاردىڭ قاتارىندا 11 جاستاعى قىز دا بار»، – دەيدى حەدۋ.

ساياساتكەردىڭ ايتۋىنشا، اتىس ادامداردىڭ كوپشىلىگى كەلە جاتقان قۇربان ايت مەرەكەسىنە وراي بازارلاپ جۇرگەن ۋاقىتتا ورىن العان. سونىمەن قاتار، قالا سىرتىندا اتىس ءالى تولاستاماي، جالعاسىپ جاتقاندىعىن دا ايتىپ ءوتتى.

سيريالىق كۇردتتەردىڭ وكىلىنىڭ ايتۋىنشا، مۇنداي وقيعا ءبىرىنشى رەت ورىن الىپ جاتقان جوق. قالادا كوشەلەرىندە اتىس ءجيى بولىپ تۇرادى، ونىڭ جالعاسىپ كەلە جاتقاندىعىنا ءبىر جىلدان استام ۋاقىت بولعان. الايدا تۇرىك ارتيللەرياسىنىڭ بۇگىنگى شابۋىلى وتە قارقىندى بولىپ ءارى ۇزاق ۋاقىتقا دەيىن سوزىلعان.

«تۇرىكتەر بۇگىنگى اتىسپەن ورىستار مەن كۇردتەر اراسىنداعى ءوزارا ىنتىماقتاستىقتى جويعىسى كەلەدى. ال ورىستار وزدەرىنىڭ اسكەري پوليسياسىن تارتىپ، الەپپونىڭ سولتۇستىگىندە دە تۇراقتىلىقتىڭ كەپىلى بولعىسى كەلەدى»، – دەپ قوسا ايتىپ ءوتتى حەدۋ.

سيريانىڭ سولتۇستىك-باتىسىندا ورنالاسقان افرين قالاسى 2012 جىلدان بەرى كۇردتەردىڭ قاراماعىندا بولىپ تابىلادى.