ولار بۇكىل قازاقستاندى ارالاعان. جارتى اي ىشىندە 10 ادامنان قۇرىلعان كوماندا 8 مىڭنان استام شاقىرىمدى ارتتا قالدىردى، دەپ حابارلادى ەلوردالىق اكىمدىكتىڭ مەديا ورتالىعى دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنە سىلتەمە جاساپ.

«بايتەرەك» مونۋمەنتى الدىندا جينالعان ساياحاتشىلاردى قالا تۇرعىندارى مەن قوناقتارى، سونداي-اق ەكسپەديسيا باستالعان وڭتۇستىك-قازاقستان وبلىسىنىڭ دەلەگاسياسى قارسى الدى.

تۋ كوتەرگەن موتوسيكليستەر مونۋمەنتتى اينالا ءوتتى. بايكەرلەر بۇل شەرۋدى وسى جازدىڭ باستى وقيعاسى – ەكسپو كورمەسى مەن ق ر كونستيتۋسياسى كۇنىنە ارنادى.

وڭتۇستىك قازاقستان بايكەرلەر فەدەراسياسىنىڭ پرەزيدەنتى رۇستەم بازاربەكوۆتىڭ سوزىنە قاراعاندا، تەمىر تۇلپارمەن بۇكىل ەل ءىشىن ارالاۋ يدەياسى ويلاماعان جەردەن كەلگەن. ساياحات تۋرالى كوپتەگەن باعدارلامالاردىڭ ءبىرىن كورگەن كوماندا كوشباسشىسى توپ قۇرىپ، قازاقتىڭ دارحان دالاسىن كورۋگە شەشىم قابىلداعان. 
«جەر دەگەن ەرەكشە عوي. جازىق كەڭ دالا. ۇنەمى اۋەدە ۇشاقپەن قالىقتايمىز نەمەسە پويىزبەن جۇرەمىز. قازاقتىڭ كەڭ جازىق دالاسىن بايقاماي دا جاتامىز. ال بۇل بۇعان كەرەعار، جەلمەن بىرگە جۇيىتكىپ، ءار ساي-تاسىن كورىپ، جەردىڭ قۋاتىن سەزىندىك. قاي جەرگە بارماساق تا ادامدار جىلى قابىلدادى. كەي كەزدەرى اۋىلداردا، تۇرعىنداردىڭ ۇيىندە، كەيدە قوناق-ۇيدە تۇنەدىك، ۇلكەن قالالاردا تىپتەن ءبىز ءۇشىن كونسەرت قويىپ، «قاھارماندار» كەلگەن سياقتى كۇتتى»، – دەدى رۇستەم بازاربەكوۆ. – وزىمىزبەن بىرگە تەك ەلىمىزدىڭ تۋىن، تاماق تيەلگەن سومكەلەردى عانا الدىق. ورتاشا ەسەپپەن ساعاتىنا 100-120 جىلدامدىقپەن جۇردىك، ادرەنالين قالاعان كەزدە 150-گە دەيىن جىلدىمدىقتى ارتتىردىق. ساپار بارىسىندا ەشقانداي توسقاۋىل، كەزدەسقوي جاعداي بولعان جوق. دەگەنمەن جول-كولىك اپاتىنا تۇسكەندەرگە كومەكتەستىك. 

«وقيعا قوستاناي قالاسىنىڭ ماڭىندا ورىن الدى. جولدا اۋدارىلىپ جاتقان كولىكتى كوردىك. سول ماڭدا بولعانداردىڭ ءبارى كومەككە كەلدى. ابىروي بولعاندا زارداپ شەككەندەر جوق. ادامداردى كولىكتىڭ ىشىنەن الىپ شىقتىق، 4 ساعاتقا توسىلىپ قالدىق. ءارى قاراي ءوز باعىتىمىزمەن قايتا جولعا شىقتىق»، – دەدى ر. بازاربەكوۆ.

بايكەرلەر بۇل موتوشەرۋمەن شەكتەلمەيدى، توقتامايدى. كەلەسى جىلى جولعا شىعاتىن كوماندا جينالدى، زاپوليارەنى باعىندىرماقپىز. قازاقستاننىڭ اتىنان 16 ادام جولعا شىقپاق. قىسقا مەرزىمدى جوسپار بويىنشا ەلوردانىڭ تۇكپىر-تۇكپىرىنە دەيىن ارالايتىن وي بار. ءارى قاراي جولعا شىعامىز. جەلمەن بىرگە جۇيىتكيمىز.