جولاۋشىنىڭ دەنساۋلىق جاعدايىنا بايلانىستى «سكات» ۇشاعىنىڭ كاپيتانى شۇعىل تۇردە قوسالقى اۋەايلاققا قونۋعا ءماجبۇر بولدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
كۋاگەرلەردىڭ سوزىنە قاراعاندا، ۇشاق بورتىندا دارىگەر بولماعاندىقتان، العاشقى كومەكتى ستيۋاردەسسالار جاساعان. دەگەنمەن شەتەلدەن كەلگەن ازاماتشانىڭ قان قىسىمى جوعارىلاي بەرگەن.
«وسى ورايدا ۇشقىش اۋە كەمەسىن كەرى بۇرىپ، جىلدامدىقتى ارتتىرىپ جاقىندا ورنالاسقان اقتاۋداعى اۋەجايعا بەت الدى. ۇشاقتى وسىنداي دارەجەدە ۇقىپتى ءارى جىلدام قوندىرعان جاعدايدى بۇعان دەيىن كورمەپپىن»، – دەپ جازدى جولاۋشىلاردىڭ ءبىرى فەيسبۋكتەگى پاراقشاسىندا.
«بورت استانا-ەريەۆان باعىتىندا ۇشقان ەدى. اتالعان جولاۋشىنىڭ جاعدايى ناشارلاعان، ياعني كۋاگەرلەردىڭ ايتۋىنشا، ونىڭ جۇرەگى قىسىپ اۋىرعان. كاپيتان اقتاۋداعى قوسالقى اۋەايلاققا قونۋ تۋرالى شەشىم قابىلدادى. ۇشاق قوناتىن ساتتە جولاۋشىنىڭ جاعدايى ناشارلاي تۇسكەن. دارىگەرلەر بريگاداسى شاقىرتىلىپ، ونى رەيستەن الىپ قالدى. سوڭعى اقپاراتقا قاراعاندا، جەدەل جاردەم قىزمەتكەرلەرى ناۋقاستى مەديسينالىق مەكەمەگە الىپ كەتكەن. ەگەر دە ونىڭ دەنساۋلىعى تۇزەلسە، وندا بۇل ازاماتشا ەرتەڭ باسقا رەيسپەن ساپارىن جالعاستىرادى»، – دەدى اۋە كومپانياسىنداعى قوعاممەن بايلانىس ءبولىمىنىڭ جەتەكشىسى ۆيكتوريا ستوروجيلوۆا.
