بۇگىن ەكسپو-2017 حالىقارالىق مامانداندىرىلعان كورمەسى اياسىندا قىرعىزستان رەسپۋبليكاسىنىڭ ۇلتتىق كۇنى مەرەكەلەندى دەپ حابارلايدى Qamshy.kz اقپارات اگەنتتىگى.

قازىرگى كەزدە قىرعىستاندا ستراتەگيالىق جوبالار نەگىزىندە 2018-2040 جىلدارعا ارنالعان تۇراقتى دامۋدىڭ ۇلتتىق ستراتەگياسى ازىرلەنۋدە. بۇل تۋرالى قىرعىزستان رەسپۋبليكاسىنىڭ ۆيسە-پرەمەرى چولپان سۋلتانبەكوۆا مالىمدەدى. ونىڭ ايتۋىنشا، جاڭا ۇلتتىق ستراتەگياعا سايكەس مەملەكەت الدىندا نەگىزگى ءۇش ماقسات بار: حالىقتىڭ ەكونوميكالىق ءال-اۋقاتى؛ الەۋمەتتىك اماندىعى؛ ازاماتتاردىڭ ءقاۋىپسىز جانە قولايلى ورتاسى. جاھاندىق جىلىنۋ ورىن العان زاماندا «بولاشاق ەنەرگياسى» تاقىرىبىنداعى كورمەنىڭ ماڭىزى زور ەكەنىن دە تىلگە تيەك ەتتى.

«قازاقستاننىڭ 2012 جىلى ەكسپو-2017 كورمەسىن وتكىزۋگە دەگەن ءوتىنىمىنىڭ جەڭىسى مەملەكەتتىڭ حالىقارالىق جوعارى بەدەلىنىڭ تاعى ءبىر دالەلى بولدى. ەكولوگيانىڭ قايتارىمسىز سالدارىنان قۇتىلۋ ءۇشىن بالامالى ەنەرگەتيكانى دامىتۋىمىز قاجەت. كورمە اياسىندا وزىق تاجىريبەمەن الماسۋدىڭ جانە جاڭارتىلاتىن ەنەرگيا كوزدەرىن قولدانۋ سالاسىندا ىنتىماقتاستىق ورناتۋدىڭ ماڭىزى زور دەپ ويلايمىن. قىرعىزستان ەنەرگەتيكانىڭ تۇراقتى دامۋى ءۇشىن مەملەكەتتىك قولداۋ بويىنشا الەمدىك باعىتتى قولدايدى. ەنەرگەتيكا – حالىقتىڭ ءومىر ءسۇرۋ دەڭگەيىنە جانە ەكونوميكانىڭ بارلىق سەكتورلارىنا تىكەلەي اسەر ەتەتىن ستراتەگيالىق سالا. اتالعان سالا ءجىو 2،0% جانە ونەركاسىپتىك ءوندىرىستىڭ 16%، رەسپۋبليكالىق بيۋدجەتتىڭ 10% كىرىسىن قۇرايدى»، – دەدى قىرعىزستان ۆيسە-پرەمەرى.

ءوز كەزەگىندە قازاقستان رەسپۋبليكاسىڭ ۇلتتىق ەكونوميكا ءمينيسترى تيمۋر سۇلەيمەنوۆ مەملەكەتتەر اراسىنداعى دوستىق قارىم-قاتىناس ءوزارا قۇرمەت پەن قىزىعۋشىلىققا نەگىزدەلگەندىگىن جانە قىرعىزستاننىڭ ەكسپو-2017 كورمەسىنە قاتىسۋى – ونىڭ ايقىن دالەلى ەكەنىن اتاپ ءوتتى.

«ەكى ەل اراسىندا جوعارى دەڭگەيدە كەلىسسوزدەر مەن ءتۇرلى جيىندار جۇرگىزىلۋدە. قىرعىزستاننىڭ ۇلتتىق پاۆيلونىن قۇرۋدا ايتارلىقتاي جۇمىستار اتقارىلعاندىعى ايقىن. ق ر ۇكىمەتى اتىنان جانە جەكە ءوز اتىمنان قىرعىستانعا قولداۋ كورسەتكەنى ءۇشىن جانە استانا قالاسىنداعى ەكسپو-2017 حالىقارالىق مامانداندىرىلعان كورمەسىنە قاتىسقانى ءۇشىن العىسىمدى بىلدىرەمىن»، – دەپ قورىتىندىلادى ق ر ۇلتتىق ەكونوميكا ءمينيسترى.

قىرعىزستان پاۆيلونى جىبەك جولى پلازاسىندا ۇسىنىلعان. پاۆيلونداعى ينتەراكتيۆتى ەكسپوزيسيالار كورمە كەلۋشىلەرىنە قىرعىزستان رەسپۋبليكاسى تۋرالى اقپارات بەرەدى، سونداي-اق، ەلدىڭ ەكسپورتتىق الەۋەتىن دامىتۋعا، ەنەرگەتيكالىق قاۋىپسىزدىكپەن قامتاماسىز ەتۋگە باعىتتالعان جوبالار مەن سۋ ەنەرگەتيكاسى سالالارىنداعى جەتىستىكتەرىمەن تانىستىرادى.