استاناداعى بەيبىتشىلىك پەن كەلىسىم سارايىندا قازاقستانداعى ۆاتيكان ەلشىلىگىنىڭ ۇيىمداستىرۋىمەن «بارلىعىمىز بىرگە ورتاق ءۇيىمىزدى ايالايىق» اتتى حالىقارالىق ءدىنارالىق فورۋمى ءوتتى دەپ حابارلايدى Qamshy.kz اقپارات اگەنتتىگى. شارا «EXPO-2017» حالىقارالىق كورمەسى شەڭبەرىندە وتكىزىلۋدە.

فورۋم جۇمىسىنا ادامدى جان-جاقتى دامىتۋعا جاردەمدەسۋ بويىنشا ۆاتيكاننىڭ ديكاستەريا پرەفەكتى (مينيسترلىك)، اسا مارتەبەلى كاردينال، «ەكسپو-2017» كورمەسىندەگى ۆاتيكان ەلى پاۆيلونىنىڭ كوميسسارى پيتەر كودۆو اپپيا تاركسون جانە مەملەكەتتىك ورگانداردىڭ باسشىلارى مەن ءدىني ۇيىمداردىڭ كوشباسشىلارى  قاتىستى.

شارا بارىسىندا ءسوز سويلەگەن قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ۆاتيكان ەلىمىزگە ءدىني تاتۋلىقتى جانە كونفەسسياارالىق كەلىسىمدى نىعايتۋدا ماڭىزدى ارىپتەس جانە قازاق حالقىنىڭ ومىرىندە مادەنيەت پەن ءدىني قوعامنىڭ دامۋىندا ايرىقشا ورىنعا يە بولىپ  وتىرعاندىعىن اتاپ كورسەتتى. سونداي-اق، نۇرلان ەرمەكبايەۆ بارشا قاۋىمدى الدا كەلە جاتقان قۇربان ايت مەرەكەسىمەن قۇتتىقتادى.

«وسى ءساتتى پايدالانىپ، قازاقستان مەن قاسيەتتى تاق ەلى اراسىندا سەنىمدىلىك پەن اشىقتىققا نەگىزدەلگەن سەنىمدى ارىپتەستىك ورناتىلعانىن اتاپ وتكىم كەلەدى. قازىرگى ۋاقىتتاعى مەملەكەت باسشىلارى اراسىندا نۇرسۇلتان نازاربايەۆ پەن ريم پاپاسى فرانسيسكتىڭ دوستىق قارىم-قاتىناسى ەكى ەل اراسىنداعى ارىپتەستىكتى ودان ءارى نىعايتا تۇسەدى»، – دەپ اتاپ ءوتتى مينيستر ن.ەرمەكبايەۆ.

سوڭعى جىلدارى ءتۇرلى ءدىن وكىلدەرى كەزدەسۋلەرىندە ورتاق ءۇيىمىزدى اتاپ ايتقاندا جەر شارىنداعى كليماتتى، سۋ رەسۋرستارىن، ورمانداردى قورعاۋدىڭ نەگىزگى جانە وزگە دە اسپەكتىلەرى جونىندە پىكىر الماسىپ ءجۇر. فورۋم بارىسىندا قاتىسۋشىلار ءدىن مەن رۋحانياتتىڭ ءبىزدىڭ پلانەتامىزعا جانە تابيعات رەسۋرستارىنا بارىنشا نازار اۋدارتۋعا سەرپىن بەرەتىندىگىن، سونداي-اق، جالپى ادامزاتتىڭ يگىلىگى جولىندا جاسالاتىن ىستەرگە ۇلكەن دەمەۋشى كۇش بولاتىندىعىن ايتتى.    

فورۋمعا قاتىسۋشىلار وسىنداي شارالاردىڭ وتكىزىلۋى تاتۋلىق پەن كەلىسىمدى نىعايتۋعا ايتارلىقتاي ۇلەس قوساتىنىن اتاپ كورسەتتى.