"تۋعان جەر" باعدارلاماسى اياسىندا ەڭبەكشىقازاق اۋدانىنا قاراستى اششىبۇلاق اۋىلىندا دەمالىس ساياباعى اشىلدى. شاراعا الماتى وبلىسىنىڭ اكىمى اماندىق باتالوۆ ارنايى قاتىستى، – دەپ حابارلايدى Qamshy.kz اقپارات اگەنتتىگى.

ەلباسى نۇرسۇلتان نازاربايەۆ ءوزىنىڭ باعدارلامالىق ماقالاسىندا: "پاتريوتيزم ەڭ الدىمەن تۋعان جەرگە، ءوز اۋىلىنا، قالاسىنا، وڭىرىنە جانە كىشى وتانىنا دەگەن سۇيىسپەنشىلىكتەن باستاۋ الادى"، – دەگەن بولاتىن. وسى ءسوزدى العا تارتقان جەتىسۋلىق كاسىپكەرلەر مەملەكەت باسشىسىنىڭ "تۋعان جەر" باعدارلاماسىن ىسكە اسىرۋعا جۇمىلا كىرىسىپ كەتكەندىگى كوپشىلىكتى قاتتى قۋانتتى. مەملەكەت باسشىسىنىڭ تاپسىرماسىن جوعارى دەڭگەيدە اتقارىپ جۇرگەن كاسىپكەرلەر جۇمىسىنا ءوز ريزاشىلىعىن بىلدىرگەن الماتى وبلىسىنىڭ باسشىسى اماندىق عابباس ۇلى ساياباقتىڭ اشىلۋىنا كەلگەن اۋىل تۇرعىندارىن قۇتتىقتادى.

"بۇگىنگى كۇنى جەتىسۋ ولكەسىنىڭ الەۋمەتتىك ينفراقۇرىلىمىن دامىتۋعا ولشەۋسىز ۇلەسىن قوسىپ كەلە جاتقان الماتى وبلىسىندا تۋىپ وسكەن ەسىمى ەلگە تاراعان اتاقتى مەسەناتتاردىڭ بارى بەلگىلى. وسى تۇستا "تۋعان جەر" باعدارلاماسى اياسىندا ەڭ العاشقى جوبا ءدال وسى ەڭبەكشىقازاق اۋدانىندا جۇزەگە اسىرىلىپ جاتقاندىعىن ەرەكشە اتاپ وتكەن ءجون. بۇل بارشامىز ءۇشىن جاقسى ۇلگى بولماق. وسىنداي يگى ىستەر وبلىسىمىزدىڭ وزگە دە ايماعىندا ۇلتجاندى ازاماتتاردىڭ قولداۋىمەن اتقارىلادى دەپ ويلايمىن. بارشاڭىزدى تاعى ءبىر مارتە وسىناۋ اسەم دەمالىس ساياباعىنىڭ اشىلۋىمەن شىن جۇرەكتەن قۇتتىقتاپ، ءاربىر ىستەرىڭىزگە ساتتىلىك تىلەيمىن"، – دەدى ايماق باسشىسى.

بەرەكەسى مەن بىرلىگى جاراسقان اششىبۇلاق اۋىلىندا سالىنعان جاڭا دەمالىس ساياباعىن سالۋعا سابيروۆتار وتباسىنىڭ سىڭىرگەن ەڭبەگى زور. ولار جوعارى تەحنولوگيامەن جەمىستەر مەن كوكونىستەردى وسىرۋمەن اينالىساتىن "Amal BIO" ءجشس-نىڭ مەنشىك يەسى. 1 گەكتار اۋماقتى قۇرايتىن ساياباقتا شاعىن فۋتبول، ستريتبول جانە بالالارعا ارنالعان  ويىن الاڭدارى بار. 130 ورىنعا ارنالعان كونسەرت زالى دا قازىرگى زامان تالابىنا ساي جاسالعان.

ساياباقتىڭ بارلىق اۋماعى اباتتاندىرىلعان، جارىقتاندىرىلعان، 100-دەن استام جاس كوشەتتەر مەن دەكوراتيۆتى گۇلزارلار وتىرعىزىلعان. اتالعان جوبانى ىسكە اسىرۋعا مەسەناتتاردىڭ ءوز قاراجاتى ەسەبىنەن 30 ملن. تەڭگە قاراجات بولىنگەن.

"تۋعان جەر" باعدارلاماسىنا قوساتىن ۇلەس مۇنىمەن توقتاپ قالمايتىنىن ايتقان سابيروۆتار وتباسىنىڭ بولاشاققا قۇرعان جوسپارى كوپكە ۇلگى بولماق.  ولار الداعى ۋاقىتتا ەڭبەكشىقازاق اۋدانىنا قاراستى جاڭا تۇرمىس جانە قازاقستان اۋىلدارىندا دا ءدال وسىنداي دەمالىس ساياباقتارىن اشۋدى جوسپارلاۋدا.