استانادا بولعان توبەلەسكە بايلانىستى ءتۇرلى پىكىرلەر بار، دەپ جازادى Qamshy.kz اقپارات اگەنتتىگى.

ەسكە سالا كەتەتىن بولساق، 2 قىركۇيەكتە ساعات 21.00-دە كۇزەت كومپانياسىنىڭ قىزمەتكەرلەرى مەن شەتەلدىك جۇمىسشىلار (ءۇندىستان ازاماتتارى) اراسىندا «ابۋ-دابي پلازا» قۇرىلىس الاڭىنىڭ باقىلاۋ-وتكىزۋ بەكەتىندە تۇرمىستىق سيپاتتاعى جانجال ورىن العان. وسىنىڭ سالدارىنان سولجاعالاۋداعى بىرنەشە كوشە جابىلعان.

وسى وقيعاعانى بىرەۋلەر تۇرمىستىق كيكىلجىڭ دەسە، ەندى ءبىرى ۇلتارالىق قاقتىعىس دەپ پىكىر بىلدىرۋدە. كوپشىلىك وزگە ۇلتتىڭ ءوز جەرىمىزگە كەلىپ ءوزىمىزدى باسىنۋىن ورىنسىز دەپ ەسەپتەپ، اشۋلانىپ تا جاتىر.

بيلىك وكىدەرىنەن العاشقى بولىپ مينيستر داۋرەن ابايەۆ وقيعادان كوپ وتپەي حالىقتان داۋرىقپاۋدى سۇراپ مالىمدەمە جاسادى.

اتالعان وقيعاعا بايلانىستى استانا قالاسىنىڭ اكىمى اسەت يسەكەشيەۆ تە وقيعا ورنىنا تەز جەتىپ، جاعدايدى ءوز باقىلاۋىنا الدى. اكىم ءوزىنىڭ فەيسبۋك پاراقشاسىنا بىلاي دەپ جازدى: 

«كۇزەت مەكەمەسى مەن شەتەلدىك جۇمىسشىلار اراسىندا تۇرمىستىق كيكىلجىڭ تۋىنداعان. قازىرگى ۋاقىتتا وقيعا ورنىنا مەملەكەتتىك قىزمەتكەرلەر جانە ءتارتىپ ساقشىلرى جونەلتىلدى. ەكى جاق اراسىندا كەلىسسوز جۇرگىزىلىپ، كيكىلجىڭ شەشىلدى. تەرگەۋ امالدارىنىڭ ناتيجەسىندە ءتيىستى شارالار قولدانىلادى. وقىس وقيعا مەن ارانداتۋشىلىقتى بولدىرماۋ ءۇشىن قاجەتسىز تالداۋلاردان اۋلاق بولۋلارىڭىزدى وتىنەمىن».

زاڭگەر ايگۇل ورىنبەك توبەلەسكە قاتىسى بار كۇزەتشىدەن ءمان-جايدى سۇراپ، جاساعان جەكە زەرتتەۋىنە ساي، كۇزەت قىزمەتكەرى ىشىمدىك ءىشىپ العان ينديالىقپەن اراسىندا كيكىلجىڭ ورىن الىپ، ارتى توبەلەسكە ۇلاسقانىن جەتكىزگەن. ينديالىق كۇزەتشىنى ۇرىپ، قولىن سىندىرىپتى. وسى وقيعادان كەيىن ينديالىق ءوزىنىڭ ءبىر توپ دوستارىن شاقىرىپ، ينديالىقتار مەن قازاقتاردىڭ اراسىندا توبەلەس بولىپتى. 

قاقتىعىس سالدارىنان ءۇندىستاننىڭ ەكى ازاماتى ءتۇرلى دەنە جاراقاتىمەن مەديسينالىق مەكەمەگە جەتكىزىلگەن. 

ينديالىقتار مەن قازاقتاردىڭ اراسىندا بولعان توبەلەستىڭ اقيقاتى مەن اڭىزى ءبىراز ۋاقىتتان كەيىن بەلگىلى بولاتىن شىعار. 

ازىرگە بەلگىلى اقپارات بويىنشا، «ابۋ-دابي پلازا» قۇرىلىس الاڭىنداعى باقىلاۋ-وتكىزۋ بەكەتىندە قۇقىق قورعاۋ ورگاندارىنىڭ زاڭدى تالاپتارىنا باعىنباعان 8 ادامعا اكىمشىلىك شارا قولدانىلدى.