استانادا «استانا ارەنا»  ستاديونىندا  ق ر مادەنيەت جانە سپورت مينيسترلىگى، استانا وپەرا تەاترى، «Samruk Kazyna Trust»، «Eni» مۇناي كومپانياسى، «La Scala» تەاترى قىزمەتكەرلەرى اراسىندا فۋتبولدان جولداستىق كەزدەسۋ ءوتتى دەپ حابارلايدى Qamshy.kz اقپارات اگەنتتىگى.

«استانا وپەرا» كۋبوگىنىڭ ءبىرىنشى  ورنىن  ق ر مادەنيەت جانە سپورت مينيسترلىگىنىڭ كومانداسى يەلەنسە، ەكىنشى ورىندى «استانا وپەرا» كومانداسى الدى، ۇشتىكتى «Samruk Kazyna Trust» قورىنىڭ كومانداسى تۇيىندەدى. «استانا وپەرا» تەاترىنىڭ قىزمەتكەرى ەڭ ۇزدىك قاقپاشى اتاعىنا قول جەتكىزدى. ق ر مادەنيەت جانە سپورت ۆيسە-مينيسترى اسقار باتالوۆ مينيسترلىكتىڭ اتىنان شىققان كوماندانىڭ كاپيتانى بولدى.

جۇلدەگەرلەر مەن جەڭىمپازدى ق ر مادەنيەت جانە سپورت ءمينيسترى  ارىستانبەك مۇحامەدي ۇلى ەستەلىك مەدال جانە كۋبوكپەن ماراپاتتادى. ءمينيستردىڭ ايتۋىنشا، مۇنداي جولداستىق كەزدەسۋلەر بولاشاقتا ءداستۇرلى تۇردە وتكىزىلىپ تۇرۋى ءتيىس.