بۇۇ-نىڭ مالىمدەۋىنشە، راككادا سوعىسىپ جۇرگەن جاۋىنگەرلەر تۇرعىندار قۇقىعىن ساقتاپ جاتقان جوق. بۇل تۋرالى Qamshy.kz اقپارات اگەنتتىگى شەتەلدىك باق-قا سىلتەمە جاساپ حابارلايدى.

مالىمەتتەرگە سۇيەنسەك، 20 مىڭعا جۋىق تۇرعىنى قورشاۋدا قالعان. ولاردىڭ كەيبىرىن لاڭكەستەر ءتىرى قالقان رەتىندە پايدالانۋى مۇمكىن. جالپى راككانى ازات ەتۋ وپەراسياسى وتكەن جىلدىڭ قاراشاسىندا باستالدى. اسكەري جورىققا سيريانىڭ دەموكراتيالىق كۇشتەرى مەن اقش باسقاراتىن كواليسيا قاتىسىپ جاتىر.

سونداي-اق مۇندا يران مەن رەسەي قولداۋ كورسەتەتىن سيريا بيلىگىنىڭ جاۋىنگەرلەرى دە بار. بىرىككەن ۇلتتار ۇيىمىنىڭ مالىمەتتەرىنە قاراعاندا، تامىز ايىندا قالاعا جاسالعان اۋە سوققىلارىنىڭ سانى كۇرت ارتقان. ماسەلەن، اق ءۇي باسقاراتىن كواليسيا شىلدەدە شاھاردى اۋەدەن 645 رەت اتقىلاسا، تامىزدا 1100 رەت سوققى جۇمساعان. سالدارىنان بىرنەشە اپتانىڭ ىشىندە 151 ادام قازا تاپقان. سوندىقتان ۇيىم مۇشەلەرى كەز كەلگەن اسكەري وپەراسيانى باستار الدىندا ناقتى جوسپار قۇرىپ، قاراپايىم تۇرعىنداردىڭ ومىرىنە قاتەر توندىرمەۋ كەرەكتىگىن ايتادى.