2017 جىلعى 1 قىركۇيەك، ساعات 14.30-دا قازاقستان رەسپۋبليكاسىنىڭ ۇلتتىق مۋزەيىندە بەلارۋس رەسپۋبليكاسىنىڭ ۇلتتىق تاريحي مۋزەيى قورىنان قازاقستان رەسپۋبليكاسىنىڭ ۇلتتىق مۋزەيىنە ۋاقىتشا كورمەگە قويۋ ءۇشىن ەتنوگرافيالىق جانە تۇرمىستىق بۇيىمدار كولەكسياسىن تاپسىرۋ ءراسىمى ءوتتى دەپ حابارلايدى Qamshy.kz اقپارات اگەنتتىگى.

ءىس-شارا بەلارۋس رەسپۋبليكاسى پرەزيدەنتى اكىمشىلىگىنىڭ باسشىسى كوچانوۆا ناتاليانىڭ قازاقستان رەسپۋبليكاسىنا رەسمي ساپارى اياسىندا ۇيىمداستىرىلىپ وتىر.

 اشىلۋ سالتاناتى بارىسىندا العاشقى بولىپ ءسوز العان كوچانوۆا ناتاليا:

«بەلارۋس رەسپۋبليكاسىنىڭ ۇلتتىق تاريحي مۋزەيىنەن ەتنوگرافيالىق جانە تۇرمىستىق بۇيىمدار كوللەكسياسىن قازاقستان رەسپۋبليكاسىنىڭ ۇلتتىق مۋزەيىنە تاپسىرۋ مەن ءۇشىن ۇلكەن قۋانىش. بۇل كوللەكسياداعى نەگىزگى بۇيىم رەتىندە مەن ۇلتتىق ايەل كيىمىن ايتا الامىن. ويتكەنى، كيىمدى، اسىرەسە، ايەل كيىمىن – كەز-كەلگەن ۇلتتىڭ تۇرمىسى مەن ءسالت-داستۇرىنىڭ ايناسى دەۋگە بولادى. بۇگىنگى ءبىز سىيعا تارتىپ وتىرعان كوللەكسيا مۋزەيگە كەلۋشىلەرگە بەلارۋس ەلىنىڭ مادەنيەتىن تولىق اشىپ بەرەدى دەگەن سەنىمدەمىن!» - دەپ ءسوزىن تۇيىندەدى.

بەلارۋسسيانىڭ حالىقتىق شىعارماشىلىعىنىڭ جالپى كورىنىسىندە سۇلگىلەر كونە زاماننان بەرى بەلگىلى جانە ەرەكشە ورىن الادى. ولار ءاردايىم تۇرمىستىق قولدانىس ماقساتىندا عانا ەمەس، سونىمەن بىرگە تۇرعىن ۇيلەر مەن يكونداردى بەزەندىرۋدە، سونداي-اق ۇيلەنۋ، جەرلەۋ راسىمىنە جانە باسقا راسىمدەردە كەڭىنەن قولدانىلعان.

بەلارۋس رەسپۋبليكاسىنان سىيعا تارتىلاتىن قولونەر تۋىندىلارى ۇلتتىق مۋزەيدىڭ «قازاقستان حالقى اسسامبلەياسىنىڭ تاريحى جانە كوپۇلتتى قازاقستان» زالىنىڭ، بەلارۋس حالقىنا ارنالعان بولىگىنە قويىلدى.

قازاقستان رەسپۋبليكاسى ۇلتتىق مۋزەيى مەن بەلارۋس مەملەكەتى مۋزەيلەرى اراسىنداعى بايلانىس بەلسەندى تۇردە دامىپ كەلەدى.

2017 جىلدىڭ ساۋىرىندە قازاقستان رەسپۋبليكاسىنىڭ ۇلتتىق مۋزەيىندە «ليسسابوننان مينسك ارقىلى، ماسكەۋ، استانادان ۆلاديۆوستوكقا دەيىن» كورمەسىنىڭ اشىلۋ ءراسىمى ءوتتى. بۇل جوبا بەلارۋس رەسپۋبليكاسىنىڭ قازاقستانداعى ەلشىلىگى مەن قازاقستان رەسپۋبليكاسىنىڭ ۇلتتىق مۋزەيىنىڭ بىرلەسكەن جۇمىسىنىڭ ناتيجەسى بولدى.

سونداي-اق، ۇلتتىق مۋزەيدە 2016 جىلى بەلارۋس ەلىنىڭ فوتوسۋرەتشىسى مارينا باتيۋكوۆانىڭ «سۋلا. ۇزدىكسىز» كورمەسى ءساتتى وتكەن بولاتىن.