ەۋرازيالىق توپ (ERG) پەن Bahia Mineração جىلىنا 20 ملن. توننا ءونىم بەرەتىن تەمىر كەنى ءوندىرىسىنىڭ جوباسىنا قاتىستى بايا شتاتى جانە قىتايلىق كونسورسيۋممەن ءوزارا تۇسىنىستىك تۋرالى مەموراندۋمعا قول قويدى، دەپ حابارلايدى Qamshy.kz اقپارات اگەنتتىگى كورپوراتيۆتىك كوممۋنيكاسيالار دەپارتامەنتىنىڭ باسپا ءسوز قىزمەتىنە سىلتەمە جاساپ.

تابيعي رەسۋرستاردى ءوندىرۋ جانە بايىتۋ سالاسىنداعى الەمدەگى ءىرى ءارتاراپتاندىرىلعان جەتەكشى كومپانيالاردىڭ ءبىرى Eurasian Resources Group (ERG نەمەسە توپ)، جانە ونىڭ برازيلياداعى ءجۇز پايىزدىق ەنشىلەس كاسىپورنى Bahia Mineração («BAMIN») جىلىنا 20 ملن. توننا ءونىم بەرەتىن تەمىر كەنى ءوندىرىسى جوباسىنا قاتىستى بايا شتاتى جانە قىتايلىق كونسورسيۋممەن جالپى سوماسى 2،4 ملرد دوللارلىق ءوزارا تۇسىنىستىك تۋرالى مەموراندۋمعا قول قويعانىن جاريالايدى. جوبا BAMIN–ءنىڭ يەلىگىندەگى Pedra de Ferro تەمىر كەنى كەنىشىن، تەرەڭ سۋلى Porto Sul تەڭىز ايلاعى جانە ونىمەن بايلانىستىراتىن FIOL تەمىر جول تورابىن قامتيدى. مەموراندۋمعا برازيليا جانە جۇڭگو بيزنەسى وكىلدەرىنىڭ ەكى جاقتى كەزدەسۋى بارىسىندا قول قويىلىپ، سالتاناتقا جۇڭگو حالىق رەسپۋبليكاسىنىڭ ءتوراعاسى سي سزينپين مەن براليزيا فەدەراتيۆتىك رەسپۋبليكاسىنىڭ پرەزيدەنتى ميشەل تەمەر قاتىستى.

جۇڭگو كونسورسيۋمى China Railway Group، China Communications Construction Company جانە Dalian Huarui Heavy Industry Group سىندى جەتەكشى ينفراقۇرىلىمدىق ءارى ماشينا جاساۋشى قۋاتتى كاسىپورىنداردان تۇرادى. مەموراندۋم  كونسورسيۋمنىڭ BAMIN-مەن بىرلەسىپ كەنىشكە، تەمىر جولى مەن تەڭىز ايلاعىنا يەلىك ەتۋ، بىرىكتىرىلگەن كەشەندى دامىتۋ مەن ونى قارجىلاندىرۋ ءىسىن ۇيىمداستىرۋعا مۇددەلى ەكەنىن ايقىندايدى. 

سونداي-اق، مەموراندۋمدا بايا شتاتى Porto Sul ايلاعىنا اۋىل شارۋاشىلىعى ونىمدەرى مەن وزگە دە تاۋارلاردى تاسىمالداۋعا رۇقسات، ءارى تەڭىز بەن FIO تەمىر جولىنا جەڭىلدىكتەر بەرە وتىرىپ، جوبانى دامىتۋعا قولداۋ كورسەتەتىنى جازىلعان.

بايا شتاتىنىڭ گۋبەرناتورى رۋي كوستا دۋش سانتۋش جاڭا جۇمىس ورىندارىن اشۋ مەن بۇكىل شتاتتىڭ دامۋىن قامتاماسىز ەتۋدەگى اتالعان قادامنىڭ ماڭىزىن ايرىقشا اتاپ ايتتى.

مەموراندۋم جايىندا تارقاتا ايتقان ERG ديرەكتورلارى كەڭەسىنىڭ ءتوراعاسى د-ر الەكساندر ماشكيەۆيچ: «اتالعان كەلىسىم بارلىق سەرىكتەستەر ءۇشىن ماڭىزدى جەتىستىك. Pedra de Ferro كەنىشىن ىسكە قوسقاننان كەيىن ول جىل سايىن الەمدىك نارىققا 20 ميلليون تونناعا دەيىنگى كولەمدە جوعارى ساپالى تەمىر كەنىن تۇراقتى جەتكىزىپ، الەمدەگى وزىق جەتكىزۋشىلەردىڭ ءبىرى رەتىندەگى ERGء-دىڭ پوزيسيالارىن نىعايتا تۇسپەك. مەن بايا شتاتىنىڭ جوباعا قولداۋ كورسەتكەنىنە ەرەكشە قۋانىشتىمىن ءارى ونىڭ جەرگىلىكتى ەكونوميكاعا اكەلەر ارتىقشىلىقتارىن ماقتان تۇتانىمىن. ويتكەنى توپ ءوزى جۇمىس ىستەيتىن بارلىق قاۋىمداستىقتاردىڭ ورنىقتى دامۋىنا بار كۇشىن باعىتتايدى»،- دەپ تۇيىندەدى ءسوزىن.

 «BAMINء-نىڭ دامۋىنداعى ماڭىزدى كەزەڭدى ەڭسەرگەنىمىز ءۇشىن مەن ەرەكشە قۋانىشتىمىن»، – دەدى ERGء-دىڭ باس اتقارۋشى ديرەكتورى بەنەديكت سوبوتكا. قۇرلىقارالىق Bi-Oceanic تەمىر جولىنا ارنالعان قۇرىلىس بلوگىن قۇرۋ مەن الەمدەگى ەڭ تارتىمدى تەمىر كەنى كەنىشتەرىنىڭ ءبىرىن يگەرۋ ءىسىن ىنتالاندىرۋ ماقساتىن كوزدەگەن اتالعان جوبانىڭ ارقاسىندا ءبىز قىتايدىڭ ءبىرقاتار جەتەكشى كاسىپورىندارىمەن سەرىكتەسە جۇمىس ىستەپ، بايا شتاتىمەن ارىپتەستىكتىڭ نىعايتتىق.

برازيليانىڭ سولتۇستىك-شىعىسىنداعى بايا شاتاتىنىڭ كاەتيتە كەنتىنىڭ ماڭىندا ورنالاسقان Pedra de Ferro كەنىشىنەن جوعارى سۇرىپتى تەمىر كەنى يگەرىلەتىن بولادى. وندىرىسكە ەنگىزىلگەن سوڭ، كەنىشتەن جىلىنا 20 ميلليون توننا جوعارى ساپالى تەمىر كەنى ءوندىرىلىپ تۇرماق. سونىڭ ىشىندە ىلعالدى وڭدەۋدى قاجەت ەتپەيتىن جوعارى ساپالى تاۋارلىق تەمىر كەنى دە بار. Pedra de Ferro كەنىشىندەگى شيتكىزات قورىنىڭ كولەمى مەن اۋقىمى ءارى ونىڭ لوگيستيكالىق ينفراقۇرىلىمدارعا قول جەتىمدىلىگى كەنىشتى الەمدەگى ەڭ ەكونوميكالىق ءتيىمدى كەنىشتەردىڭ ءبىرى ەتپەك.

Porto Sul - بايا، يلەۋس قالاسىنىڭ سولتۇستىگىندە ورنالاسقان تەرەڭ سۋلى تەڭىز ايلاعى. ول كوپتتوننالى ءىرى سۋ كولىكتەرىن قابىلداپ، BAMINء-نىڭ كەندەرىن جونەلتۋدىڭ العاشقى قادامىنا اينالماق. سونداي-اق اۋىل شارۋاشىلىعى جانە باسقا دا تاۋارلاردىڭ ماڭىزدى تىرەك ەكسپورت جانە يمپورت ورتالىعىنا اينالماق.

FIOL تەمىر جولى – برازيليانىڭ سولتۇستىك-شىعىسىنداعى نەگىزگى تاسىمال دالىزىنە اينالاتىن كەڭ جولاقتى جاڭا تەمىر جول جەلىسى. كەزەڭ-كەزەڭىمەن دامىپ كەلە جاتقان تەمىر جول جەلىسىنىڭ العاشقى بۇتاعى Porto Sul ايلاعىنان ەلدىڭ ىشىنە قاراي كاەتيتە كەنتىنە دەيىن 535 شاقىرىمعا سوزىلعان. كەلەسى كەزەڭدە توراپ برازيليانىڭ باستى اۋىل شارۋاشىلىعى  ورتالىقتارىنا جالعاسىپ ودان ارى وزگە دە تەمىر جول جەلىلەرىمەن تۇيىسپەك. FIOL تەمىر جولى برازيليا فەدەراتيۆتىك ۇكىمەتىنىڭ مەنشىگى. ءوز كەزەگىندە ول كونسەسسيالىق كەلىسىم شارت اياسىندا ونى جەكە ينۆەستورلارعا ساتۋعا مۇددەلى ەكەنىن جاريالادى.