2020 جىلعا قاراي تۋۆالۋ جاڭارتىلاتىن ەنەرگيا كوزدەرى ەسەبىنەن ەنەرگيا رەسۋرس قاجەتتىلىكتەرىن 100% وتەيدى. بۇل تۋرالى ەكسپو-2017 حالىقارالىق مامانداندىرىلعان كورمەسى اياسىندا وتكەن تۋۆالۋ مەملەكەتىنىڭ ۇلتتىق كۇنى بارىسىندا سىرتقى ىستەر، ساۋدا، تۋريزم، قورشاعان ورتا جانە ەڭبەك ءمينيسترىنىڭ كومەكشىسى اتابي ەۆەكيا مالىمدەدى. ءوز سوزىندە ءمينيستردىڭ كومەكشىسى مەملەكەتتىڭ ەنەرگەتيكا سالاسىنداعى قازىرگى جاي-كۇيى جانە بولاشاق جوسپارىمەن ءبولىستى، دەپ حابارلايدى Qamshy.kz اقپارات اگەنتتىگى ەكسپو-2017 حالىقارالىق كورمەسىنىڭ مەديا-ورتالىعىنا سىلتەمە جاساي وتىرىپ.

اتابي ەۆەكيا: «تۋۆالۋ مەملەكەتىنىڭ ەنەرگەتيكا سالاسىندا قازبا وتىندى پايدالانۋ 74% باسىم، قالعان 26%-دى جاڭارتىلاتىن ەنەرگيا كوزدەرى قۇرايدى. وسىعان وراي، ارالداردىڭ بىتىراڭقى ورنالاسۋى مەن يمپورتتالاتىن مۇنايدىڭ باعاسىنىڭ جوعارى بولۋىنان، الەمدىك نارىقتان وقشاۋ ورنالاسقان ارالدىق مەملەكەت ءۇشىن ەنەرگەتيكالىق قاۋىپسىزدىك وزەكتى ماسەلەلەردىڭ ءبىرى بولىپ تابىلادى. ەلدەگى اتالعان ماسەلەلەردى ەسكەرە وتىرىپ، ءبىزدىڭ مەملەكەت ەنەرگيا رەسۋرستارى قاجەتتىلىكتەرىن جاڭارتىلاتىن ەنەرگيا كوزدەرى ەسەبىنەن وتەۋ مىندەتىن الدىنا قويدى»، - اتاپ ءوتتى.

قازاقستان رەسپۋبليكاسى سىرتقى ىستەر مينيسترلىگىنىڭ ازيا جانە افريكا دەپارتامەنتىنىڭ ديرەكتورى ايداربەك تۇماتوۆ تۋۆالۋ مەملەكەتىنىڭ 2017-2018 جىلدار مەرزىمىنە بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلاۋدا قازاقستان كانديداتۋراسىنا قولداۋ كورسەتكەندىگى ءۇشىن العىسىن ءبىلدىرىپ، ەكى ەل اراسىنداعى قاتىناس تۋرالى مالىمدەدى.

«قازاقستان جانە تۋۆالۋ مەملەكەتى اراسىنداعى ديلوماتيالىق قاتىناس جاقىندا ورناتىلعانىنا قاراماستان، ەكى ەلدىڭ حالىقارالىق قۇرىلىم جانە باستامالار شەڭبەرىندە ءوزارا ارەكەتتەسۋى جانە ىنتىماقتاستىعى قارقىندى جۇزەگە اسۋدا. ەكسپو-2017 كورمە جاھاندىق تازا ەنەرگەتيكانى دامىتۋ يدەيالارىنىڭ وركەندەۋىنە، قازىرگى كەزدەگى تۇسىنىتە جاڭا پاراقتىڭ اشىلۋىنا، سونداي-اق ءتيىمدى ىنتىماقتاستىق ءۇشىن جاڭا مۇمكىندىكتەر بەرەتىنىنە كامىل سەنەمىن»، - قورىتىندىلادى ايداربەك تۇماتوۆ.

تۋۆالۋداعى جاڭارتىلاتىن ەنەرگيا – ەنەرگيا ۇنەمدەۋدە قارقىندى دامۋشى سالالاردىڭ ءبىرى. مەملەكەت ە8 حالىقارالىق كوممەرسيالىق ەمەس ۇيىمىنىڭ قولداۋىمەن جوبا ازىرلەۋدە. اتالعان جوبا جاڭارتىلاتىن ەنەرگيا كوزدەرى ەسەبىنەن بارلىق ەنەرگەتيكالىق قاجەتتىلىكتەردى وتەيدى دەپ جوسپارلانۋدى.