جاڭا وقۋ جىلىنىڭ قارساڭىندا الماتى وبلىسى جامبىل اۋدانىندا 1200 ورىندىق جاڭا مەكتەپ پايدالانۋعا بەرىلدى. ەلباسىنىڭ "نۇرلى جول" باعدارلاماسى اياسىندا ىسكە قوسىلعان ءبىلىم شاڭىراعىنىڭ اشىلۋ سالتاناتىنا الماتى وبلىسى اكىمى اماندىق باتالوۆ قاتىسىپ، تۇرعىندار قۋانىشىنا ورتاقتاستى.
الماتى وبلىسىنىڭ باسشىسى اماندىق عابباس ۇلى ۇستازدار مەن وقۋشىلاردى جانە اتا-انالاردى جاڭا مەكتەپتىڭ اشىلۋىمەن قۇتتىقتادى. حالىقتىڭ پايدالانۋىنا بەرىلىپ وتىرعان بۇل يگىلىك ەلباسى نۇرسۇلتان نازاربايەۆتىڭ ساليقالى ساياساتىنىڭ ارقاسىندا جانە مەملەكەتتىك باعدارلامالاردى ءتيىمدى جۇزەگە اسىرۋدىڭ ناتيجەسىندە بيىلعى جىلدىڭ وزىندە وبلىستا 49 000 ءبۇلدىرشىننىڭ 1 سىنىپ تابالدىرىعىن اتتايتىنىن جەتكىزدى.
"وسى جىلى وبلىستا 49 مىڭ بالا ءبىرىنشى سىنىپقا بارادى. وڭىرىمىزدە 35 مەكتەپ سالىنىپ جاتىر. سونىڭ 24 مەكتەبىن ءبىلىم كۇنى، قالعانىن جىل اياعىنا دەيىن اشاتىن بولامىز. جاڭا وقۋ جىلىن جاڭا عيماراتتا باستاعالى وتىرعان سىزدەر قانداي باقىتتىسىزدار. وسىنداي جاعداي جاسالۋىنا جاۋاپ رەتىندە جاقسى وقىڭدار. ۇزىناعاش اۋىلىنداعى ورتا مەكتەپ سىزدەردىڭ ءبىلىمدى ازامات بولىپ قالىپتاسۋلارىڭا جول اشسىن. ۇستازدار مەن اتا-انالارىڭدى ۇنەمى ۇزدىك باعامەن قۋانتىپ جۇرىڭىزدەر"، - دەدى وبلىس اكىمى.
اتا-انالار اتىنان ارداگەر ۇستاز التىنجان نۇسىپالييەۆا ەلباسىنىڭ ساليقالى ساياساتىن جۇزەگە اسىرىپ وتىرعان وبلىس باسشىسىنا، اۋدان اتقامىنەرلەرىنە العىس ايتتى. اسەم عيمارات تۇرعىزىپ، حالىقتىڭ يگىلىگىنە ۇسىنعان قۇرىلىستىڭ باس مەردىگەرى "ريگوليت" جاۋاپكەرشىلىگى شەكتەۋلى سەرىكتەستىگىنىڭ ديرەكتورى سەيدۋلا سارسەكوۆ مەكتەپ ديرەكتورى سەرىك تىلەپبەرگەنوۆكە نىساننىڭ سيمۆوليكالىق كىلتىن تاپسىردى. اۋداننىڭ ايتىسكەر جاس اقىنى ايتۋعان جەتەبايەۆ دومبىرامەن ارناۋ ايتتى. اۋداندىق ءماسليحات دەپۋتاتى، اۋداندىق كاسىپوداق ۇيىمىنىڭ ءتوراعاسى اسكەربەك ابايەۆ كوپشىلىككە باتا بەردى. "جاس ۇلان" وقۋشىلار ءۇيىنىڭ جاس بيشىلەرى بي بيلەپ، ءبىرىنشى سىنىپ تابالدىرىعىن اتتاعالى وتىرعان ءبىر توپ ءبۇلدىرشىن ورتاعا شىعىپ، ولەڭ وقىدى.
وبلىس اكىمى اماندىق باتالوۆ، ءماسليحات دەپۋتاتى اسكەربەك ابايەۆ جانە ارداگەر-ۇستاز، اتا-انا التىنجان نۇسىپالييەۆا لەنتا قيۋ ءراسىمىن ورىنداپ، اجەلەر شاشۋ شاشتى. وبلىس باسشىسى باستاعان قۇرمەتتى قوناقتار مەكتەپ ىشىمەن تانىستى. زاماناۋي ۇلگىدە بوي كوتەرگەن ءبىلىم ورداسىنا 1 ملرد. 924 ميلليون تەڭگە جۇمسالعان. 15 مىڭ شارشى مەتر عيماراتتىڭ ءىشى قاجەتتى قۇرال-جابدىقتارمەن جاراقتالعان. ەكى سپورتزال بار. ونىڭ ءبىرى 168 شارشى مەترلىك گيمناستيكا زالى، ەكىنشىسى 648 شارشى مەتر ۆولەيبول، باسكەتبولعا ارنالعان. عيماراتتا بارلىق ماتەريالدىق-تەحنيكالىق بازامەن قامتىلعان 60 وقۋ كابينەتى، سونىڭ ىشىندە ارنايى قۇرال-جابدىقتارمەن جابدىقتالعان 2 حيميا، 2 فيزيكا، 2 بيولوگيا، 2 لمك، 4 ينفورماتيكا كابينەتتەرى بار. سونىمەن قاتار 2 كىتاپحانا، 2 تەحنولوگيا كابينەتى، 230 ورىندىق اسحاناسى دا بار. ءتيىستى ءپان كابينەتتەرى، كىتاپحانا، شەبەرحانا بار. مەكتەپ اۋلاسىنىڭ جالپى جەر كولەمى 4 گەكتار قۇرايدى. بۇگىنگى كۇنى وقۋشىلار سانى - 850. وقۋشىلار 100 پايىز وقۋلىقتارمەن قامتاماسىز ەتىلگەن.
اۋدان ورتالىعىنىڭ شەتىندە كەيىنگى جىلدارى جاڭا تۇرعىن ۇيلەر ورامىنىڭ پايدا بولۋىمەن بىرگە الەۋمەتتىك نىساندارعا دەگەن قاجەتتىلىك تە تۋىنداعان بولاتىن. ونى شەشۋدىڭ جولدارى بىرتىندەپ جۇزەگە اسىرىلىپ كەلەدى. سونىڭ ءبىرى وسى ءبىلىم ۇياسىنىڭ قولدانىسقا بەرىلۋى. جالپى، بيىل اۋدان بويىنشا بەس مەكتەپ عيماراتى بوي كوتەردى.
