جۋىردا تالدىقورعان قالاسىندا تۇرمىستىق قاتتى قالدىقتاردى قابىلداپ، سۇرىپتاپ جانە وڭدەيتىن زاۋىت اشىلادى.
جاقىن ارادا ىسكە قوسىلاتىن زاۋىت قۇرىلىسى وتكەن جىلى باستالعان. قاتتى تۇرمىستىق قالدىقتاردان ءونىم وندىرەتىن ءوندىرىس ورىنى تالدىقورعان-ۇشتوبە باعىتىنداعى تاس جولدىڭ بويىندا ورنالاسقان. ونىڭ جالپى اۋماعى 3.5 گەكتار جەردى الىپ جاتىر. قاتتى تۇرمىستىق قالدىقتاردى قايتا وڭدەۋ زاۋىتىنىڭ قۇرىلىسىنا 1،4 ميلليارد تەڭگە قاراجات بولىنگەن. ال ءونىم ءوندىرۋ قۋاتتىلىعى جىلىنا 100 توننانى قۇرايدى. قازىرگى تاڭدا زاۋىتتا قوقىس وڭدەيتىن كەشەننىڭ ءتۇرلى تەحنيكالىق قۇرال-جابدىقتارى تولىعىمەن قامتاماسىز ەتىلگەن. زاۋىت ورنالاسقان پوليگون اۋماعى "ADAL DAMU CAPITAL" جشس-عا 10 جىلعا جالعا بەرىلگەن.
قايتا وڭدەۋ بويىنشا "ADAL DAMU CAPITAL" ج ش س كاسىپورىننىڭ قۋاتتىلىعى جىلىنا - 100 مىڭ توننا.
زاۋىت جۇمىسى ءۇش كەزەڭنەن تۇرادى. ءبىرىنشى كەزەڭدە قاتتى تۇرمىستىق قالدىقتاردى سۇرىپتاۋعا ارنالعان قوقىستى قايتا وڭدەيتىن كەشەندى جانە قايتالاما شيكىزاتتى وندىرۋگە ارنالعان سەحتى پايدالانا وتىرىپ، جۇمىس جاسايدى. ال ەكىنشى كەزەڭدە بويىنشا قاتتى تۇرمىستىق قالدىقتاردىڭ ورگانيكالىق فراكسياسىن قايتا وڭدەۋ بويىنشا بيوگازدى كەشەن قۇرىلىسىمەن قوقىستى وڭدەيدى. مۇنداعى ءوندىرىس قۋاتتىلىعى جىلىنا 18 مىڭ توننا گاز.
سونىمەن قاتار زاۋىتتىڭ ءۇشىنشى كەزەڭىندە ورگانيكالىق قالدىقتاردان بيوگۋمۋس وندىرۋگە ارنالعان ۆەرميفابريكا قۇرىلىسى جۇمىس ىستەيتىن بولادى..
"ءقازىر زاۋىت ءوز جۇمىسىن باستاۋعا دايىن. بارلىق تەحنيكا جۇمىلدىرىلعان. قۇرىلعىلار قاعاز، پوليەتيلەن بوتەلكەلەرىن جانە قوقىس قالدىقتارىن جىك-جىگىمەن توپتاستىرىپ شىعارادى. باسقالارى وڭدەۋ كاسىپورىندارىنا، ال قالدىقتار پوليگونعا جونەلتىلەدى. كەيىن ول قالدىقتاردى دا ىسكە جاراتاتىن بولامىز. وسىنى ءىستىڭ جوعارى دەڭگەيدە ىسكە اسۋىنا كومەكتەسكەن وڭىرلىك اكىمدىككە ايتار العىسىم شەكسىز. بىرلەسە ىستەگەن جۇمىستىڭ بەرەكەسىن ءبىز عانا ەمەس، وبلىس تۇرعىندارى دا كورەتىن بولادى. قوقىس وڭدەۋ "جاسىل ەكونوميكاعا" كوشۋدىڭ ماڭىزدى سەكتورلارىنىڭ ءبىرى.
ءقازىر ەكولوگتار قورشاعان ورتاعا بارىنشا كوڭىل ءبولىپ جاتىر. مەنىڭشە، ءاربىر تۇرعىن قورشاعان ورتانىڭ تازالىعىنا ءبىر كىسىدەي اتسالىسۋى كەرەك. وسى ماسەلەنى العا تارتا وتىرىپ، ءبىز وسىنداي زاۋىتتى ىسكە قوسۋدى ءجون دەپ سانادىق. زاۋىت ىسكە قوسىلىسىمەن ءبىز بىردەن 170 ادامدى تۇراقتى جۇمىسپەن قامتاماسىز ەتەمىز. ءبىزدىڭ نەگىزگى قۇرىلعىلارىمىزدىڭ بارلىعى ەۆروپالىق ۇلگىدەگى ەڭ مىقتى ءارى زاماناۋي قۇرىلعىلار. ساپاسى دا جاقسى. الداعى ۋاقىتتا الەم بويىنشا وزىق ۇلگىدەگى جاڭا تەحنولوگيالاردىڭ جەلىسىمەن جابدىقتالعان تەحنيكالاردى الاتىن بولامىز"، - دەيدى "ADAL DAMU CAPITAL" ج ش س باسشىسى ەرلان دۇيسەبايەۆ.
بۇگىنگى تاڭدا زاۋىتتا وتىزعا جۋىق ادام جۇمىس ىستەيدى. زاماناۋي قۇرىلعىلاردىڭ ءتىلىن ولار ءقازىردىڭ وزىندە مەڭگەرىپ العان. بولاشاقتا ناتيجەلى جۇمىس ىستەۋگە دايىن جۇمىسشىلار جۇمىسقا ورنالاسقانىنا شەكسىز ريزا. جايدارمان جاڭالىقتان قۇلاعدار بولعان جەتىسۋلىقتاردىڭ قۋانىشىندا شەك جوق. اسىرەسە، بۇگىنگى كۇننىڭ ەڭ وزەكتى ماسەلەسىنە اينالعان تۇرمىستىق قالدىقتاردى قايتا وڭدەۋ جۇمىسىنىڭ كۇن سايىن جاندانىپ، دامىپ كەلە جاتقانى كوڭىلگە قۋانىش سىيلايدى. ال جاڭا زاۋىت وبلىستاعى جۇمىسسىزدىق دەڭگەيىنىڭ ءسال دە بولسا ازايۋىنا ۇلەس قوساتىنىن ەرەكشە اتاپ وتكەن ءجون.
