تالدىقورعان قالالىق اكىمدىگىنىڭ، ءبىلىم ءبولىمىنىڭ جانە دەمەۋشىلىك كورسەتكەن جەكە كاسىپكەرلەردىڭ ۇيىمداستىرۋىمەن تالدىقورعاندىق 40 وقۋشى قاپشاعاي قالاسىنداعى "بايتەرەك" دەمالىس ايماعىنا تىنىعۋعا اتتاندى.

ءبىر جىلعى ۋاقىتتىڭ باسىم كوپشىلىگىن مەكتەپتە وتكىزەتىن وقۋشىلار جازعى دەمالىس كۇندەرىن اسىعا كۇتەتىنى بەلگىلى. سوندىقتان دا، وقۋشىلار ءۇشىن ەڭ قىزىقتى مەزگىل - جاز ماۋسىمى. ءۇش اي دەمالىس مەزگىلىندە بالالار الاڭسىز اسىر سالىپ ويناپ، ءبىر جاساپ قالارى انىق. دەمالىسقا شىققان ولاردىڭ ءبىرى جازعى لاگەرلەردە دەمالسا، ەندى ءبىرى قالا ارالاپ، ساياحاتتاعاندى ۇناتادى. ال، كەيبىرەۋلەرى جەكە شارۋاشىلىقتا ەڭبەك ەتىپ، تابىس تاپقاندى قالايدى. قالاي دەسەك تە، جاز بويى بالالاردىڭ كوزدەن تاسا بولماي، ۋاقىتتارىن ءتيىمدى وتكىزۋىنە تەك مەكتەپ قانا ەمەس، اتا-انا، جالپى قوعام بولىپ اتسالىسۋىمىز قاجەت. الايدا، بالاسىنىڭ دەمالىسىن كوڭىلدى وتكىزۋگە جاعداي جاساي المايتىن دا وتباسىلار قوعامدا جوق ەمەس. وسىنداي ولقىلىقتىڭ ورنىن تولتىرۋ ماقساتىندا جىل سايىن تالدىقورعاندىق وقۋشىلاردىڭ دەمالىسى ارنايى قالالىق اكىمدىكتىڭ باستى نازارىندا بولادى. ولاردىڭ جازعى دەمالىستى كوڭىلدى، قىزىقتى ءارى اسەرلى ەتىپ وتكىزۋلەرى ءۇشىن ارنايى جوسپار قۇرىلادى. جىل سايىن ەڭ ءبىرىنشى كەزەكتە الەۋمەتتىك جاعدايى از قامتىلعان، كوپ بالالى وتباسىنىڭ جانە قورعانشىلىق پەن قامقورلىقتاعى بالالار ءتۇرلى دەمالىس شارالارىنىڭ باستى كەيىپكەرىنە اينالادى.

بيىل دا جىل سايىنعى ءداستۇر بويىنشا يگى ىستەر اتقارىلۋدا. سونىڭ جالعاسى رەتىندە قىرىق بالا قاپشاعايعا دەمالۋعا جولعا شىقتى. وقۋشىلاردىڭ قاۋىپسىزدىگى ءۇشىن ارنايى جەدەل جاردەم بريگاداسى مەن جول-پاترۋلدىك پوليسياسى ەكيپاجى جۇمىلدىرىلعان. مۇندا بالالار ءارتۇرلى قىزىقتى شارالارعا قاتىسىپ، وي-ورىستەرىن دامىتىپ، تانىمدىق دۇنيەلەرمەن تانىسادى.

"جالپى، جازعى دەمالىس باستالعالى بەرى بالالاردىڭ ۋاقىتىن ءتيىمدى وتكىزۋ ءۇشىن يگى جۇمىستار اتقارىلۋدا. قالا اكىمدىگىنىڭ، دەمەۋشىلىك كورسەتەتىن جەكە كاسىپكەرلەردىڭ قولداۋىمەن وقۋشىلارىمىز جاقسى دەمالىس ايماقتارىنا بارۋدا. ولاردىڭ بالداي ءتاتتى بالالىق شاقتارى تەك قىزىققا تولى بولۋى كەرەك. بۇگىنگى جاس ۇرپاق ەرتەڭگى ءبىزدىڭ بولاشاعىمىز. سوندىقتان دا، بالا ومىرىنە تەك اتا-انا، مەكتەپتەگى ۇستازدار عانا ەمەس بۇكىل قوعام بولىپ الاڭداۋىمىز كەرەك. وقۋشىلارىمىزدىڭ جىل سايىنعى جازعى دەمالىستارىن قىزىقتى وتكىزۋدى داستۇرگە اينالدىرۋعا تىرىسامىز. ول ءبىزدىڭ نەگىزگى مىندەتىمىز"، - دەيدى تالدىقورعان قالالىق ءبىلىم ءبولىمىنىڭ باسشىسى جاندوس جولدىحانوۆ.

"مەن ۇنەمى ساپارعا شىعۋدى ارماندايتىنمىن. بولاشاقتا ساياحاتشى بولىم كەلەدى. اسىرەسە، دوستارىممەن بىرگە قىدىرعاندى ۇناتامىن. سول ارمانىم بۇگىن ورىندالدى. "قاپشاعايعا دەمالۋعا باراسىڭدار" دەگەن حاباردى ەستىگەندە قاتتى قۋاندىم. قۋانىشىم قوينىما سىيماي، تۋىستارىمنىڭ بارىنە وسى حاباردى جەتكىزىپ شىقتىم. ەكى كۇن بويى دەمالۋعا قاجەتتى بارلىق زاتتارىمدى جيناستىردىم. بۇل مەن ءۇشىن ەڭ كەرەمەت جازعى دەمالىس بولعالى تۇر. وقۋ جىلى باستالعاندا جازاتىن شىعارمانىڭ دا تاقىرىبى دايىن. وسىنداي كەرەمەت كۇندى بىزگە ۇيىمداستىرعان قالامىزدىڭ اكىمىنە، اياۋلى ۇستازدارىما، قامقور جاندارعا ۇلكەن راحمەت ايتامىن"، - دەيدى مۇنداي دەمالىسقا العاش رەت بارا جاتقان كوپ بالالى وتباسىنىڭ تۇڭعىشى اسقار قانات ۇلى. ءبىلىم ءبولىمىنىڭ مالىمەتىنە سۇيەنەر بولساق، وسى ۋاقىتقا دەيىن تالدىقورعاندىق وقۋشىلاردىڭ 90 پايىزى جازعى دەمالىسپەن تولىقتاي قامتىلدى. وقۋ جىلى باستالعانشا كورسەتكىش 100 پايىزعا جەتكىزىلمەك.