بىرەۋلەر ءۇشىن الەۋمەتتىك جەلى – وتىرىكتىڭ مەكەنى: ول جەردە ادامدار تابىستى ءارى اقىلدى ادامنىڭ بەتپەردەسىن كيىپ الىپ ءتۇرلى كوز تارتارلىق سۋرەتتەر سالىپ، اقىلدى اڭگىمەلەر ايتادى. ولار مۇنى قالىپتى جاعداي دەپ قابىلدايدى. الايدا، مەنىڭ ويىم مۇلدە باسقاشا، الەۋمەتتىك جەلى اركىمدى شەكسىز قوعامنىڭ ءبىر بولىگى بولۋعا شاقىرىپ، الەمدى تۇبەگەيلى وزگەرتتى.
Facebook جەلىسىندە پاراقشانى تەك شىنايى بولۋ ءۇشىن اشتىم. بۇل ومىردە كوپتەگەن ماسەلەلەر تۋىنداۋى مۇمكىن، الايدا وتىرىك – ەشكىم دە قۇتىلىپ شىعا المايتىن قاقپان بولىپ تابىلادى. مەن ءبىر قاتەرلى دەرتپەن كۇرەسۋگە ءماجبۇر بولدىم، جاراتقان سىزدەردى ونداي سۇمدىقتان ساقتاسىن.
اكادەميك اتام مۇحتار الييەۆ كوز جۇمعاننان سوڭ ءبىر جارىم ايدان كەيىن اۆستريا تۇرمەسىندە اكەم راحات الييەۆ وز-وزىنە قول جۇمساپ، قايتىس بولدى. ءومىر ماعان كۇتپەگەن جەردەن ەكى بىردەي سوققى جاسادى. جۇرتتىڭ ءبارى بايلىق پەن باقىتقا ماساتتانىپ ءومىر سۇرەتىن ادام رەتىندە تانيتىن ايسۇلتان الەمدەگى ەڭ باقىتسىز ادامعا اينالدى. مۇنداي ۋاقىتتا اياق-قولىڭدى كەسىپ السا دا ءبارىبىر، تەك جانىڭدى اۋىرتاتىن مۇنداي قاسىرەتتى شەكپەسەم ەكەن دەپ ويلايسىڭ.
بۇكىل وتباسىم مەنى قولداۋعا تىرىستى. اتام نۇرسۇلتان نازاربايەۆ ەرەكشە قامقورلىق تانىتتى. ءبىر ەلدىڭ پرەزيدەنتى كۇندىز 17 ميلليون ادامنىڭ ماسەلەسىن شەشسە، كەشكە بارلىق ۋاقىتى مەن نازارىن ماعان اۋداردى. ول كەزدە مەن اتامنىڭ ماعان قولداۋ كورسەتۋ ءۇشىن قانشالىقتى كۇش-جىگەرىن سارپ ەتكەنىن تۇسىنە المادىم. سوندىقتان دا بولار ول ۋاقىتتاردا ۇلكەن قاتەلىككە بوي الدىرىپ، اقىماقتىق جاسادىم. ەڭ ۇلكەن قاتەلىگىم – ەسىرتكىمەن جانىما تىنىشتىق ىزدەدىم.
قوعام ءۇشىن ناشاقورلىق – ۇلكەن ماسەلە. ال ادام ءۇشىن ول قاتەرلى دەرت. العاشىندا الەم ۇلدە وزگەرىپ، اينالاڭ نۇرلانا باستاعانداي كۇي كەشەسىڭ، بارلىق ماسەلەلەرىڭ شەشىلىپ، ءبارىن ۇمىتقانداي بولاسىڭ، ءبىراق ول تەك باستاپقى ۋاقىتتا عانا. كەيىننەن ەسىرتكى ادام اعزاسىن ۋلاپ، قاتەرلى دەرتكە شالدىقتىرادى. ەسىرتكىگە تاۋەلدى بولىپ قالعان ادامدار تەك ءولىم ارقىلى ودان قۇتىلادى جانە دە مۇنداي ۋ ادام جانىن ەمدەمەيدى.
ءبىر مۇشەسى ەسىرتكىگە تاۋەلدى بولعان وتباسى ۇنەمى قورقىنىش ۇستىندە بولادى ەكەن. ەندى نە بولادى؟ نە ىستەيمىز؟ كورشىلەر نە ويلايدى؟ جۇمىستا نە ايتادى؟ قورقىنىش سەزىمى ادامداردىڭ قارىم-قاتىناسى بۇزىپ، جالعىزدىققا الىپ بارادى جانە ءۇمىت وتىن وشىرەدى ەكەن. مەنىڭ وتباسىم دا العاشىندا قورىققان بولاتىن. الايدا، ەڭ باستىسى، مەن ءوزىمنىڭ بۇل ىس-ارەكەتىمدى اتاما ايتىپ، كىنامدى مويىندادىم. بالكىم، مەنىڭ اتامنىڭ ورنىندا باسقا ءبىر پرەزيدەنت بولعاندا ول بۇل ماسەلەنى جىلى جاۋىپ قويۋعا تىرىسار ما ەدى؟! الايدا نۇرسۇلتان نازاربايەۆ ونداي ادام ەمەس. ونىڭ ەڭ ءبىرىنشى ايتقانى: «شىنشىل بولعانىڭ ءۇشىن جارايسىڭ. ءيا، وتە ءقاۋىپتى دەرت، الايدا سەن بۇل دەرتكە شالدىققانداردىڭ ەڭ ءبىرىنشىسى نەمەسە ەڭ سوڭعىسى ەمەسسىڭ. ونى جەڭىپ شىعۋىڭا كۇشىڭ جەتەدى» - دەدى. اڭگىمە بارىسىندا بۇل دەرتتى قالايدا جەڭىپ شىعىپ، زۇلىمدىقتى مەيىرىمدىلىككە الماستىرۋعا ۋادە بەردىم. «ايسۇلتان ماعان ۋادە بەرسە، ول ونى ۇنەمى ورىندايدى»، - دەپ سالماقتى تۇردە اتام جاۋاپ بەردى.
مەن وعان ءومىر بويى قارىزدارمىن. شىندىعىن ايتقاندا، ول مەنى ەكى رەت قۇتقارىپ قالدى. تەك سول كەزدە مۇنى تۇسىنۋگە اقىلىم مەن تاجىريبەم جەتپەگەن ەكەن. ءقازىر جاقىن ادامدارىم مەنىڭ قاسىمدا، مەن قولداۋ مەن سەنىمگە تولى وتباسىدا ءومىر ءسۇرىپ جاتىرمىن. بۇل – وتە ماڭىزدى.
بۇل دەرتتى تەك ءوزىڭنىڭ ەرىك جىگەرىڭمەن جەڭىپ شىعا المايسىڭ. بۇل دەرتتەن تولىقتاي ايىقتىراتىن ءدارى ءالى جاسالماعان. قانشاما وتباسى وسى ۋلى دەرتتىڭ سالدارىنان قۇردىمعا كەتتى، سول سەبەپتى دە ءقازىر اشىق جازىپ وتىرمىن. مۇنداي جاعدايدان شىعاتىن مۇمكىندىك بار جانە مەن ونى بىلە تۇرا بولىسپەي وتىرا المايمىن. مەنىڭ بۇل جازبام كەمىندە ءبىر ادامدى جامان جولدان تىيسا، كەمىندە ءبىر وتباسىنى بۇل دەرتتەن قۇتقارسا، دەمەك مەن بەكەر جازباعانىم.
مەن بۇدان ايىعۋدىڭ جولىن تاپتىم، ەڭ الدىمەن ماعان اللا كومەكتەستى. ومىرىندە ناشانى تاتىپ كورگەن ادام مەنىڭ نە جايلى جازىپ وتىرعانىمدى تۇسىنەدى. بۇل ىستە كىنالى جوق، تەك جاپا شەگۋشىلەر عانا بار. ارينە، كەم تۇستارى دا جەتەرلىك. الايدا، ناشاقورلىقپەن كۇرەسۋ كەرەك، ءبىراق ناشاقور دەرتىنە شالدىققاندارمەن كۇرەسۋ – قىلمىس ەكەندىگىن ۇلكەن سەنىممەن ايتا الامىن.
جىل سايىن ميلليونداعان ادامداردىڭ ءومىرىن جالماعان بۇل دەرت ءار ەلدە كوبەيىپ، ءوسىپ كەلە جاتىر، سەبەبى ادامدار بۇل جايىندا ايتۋعا قورقادى. وتىرىكشىلەر تەك باي-باعلاندار مەن الەۋمەتتىك جاعدايى جاقسى ادامدار عانا ناشاقور بولادى دەپ جار سالا ايتادى. سول سەبەپتى دە قوعام ولارعا ەشقانداي اياۋشىلىق تانىتپايدى. ناشاقورلىق - تەك جامان ادامداردىڭ جانىن الاتىن قايىرىمدى ءىس ەمەس، ول قولى جەتكەننىڭ ءبارىن جۇتىپ الادى. سول سەبەپتى دە بۇل جايىندا اشىق تۇرلە ايتۋ مەنىڭ پارىزىم دەپ بىلەمىن. ال، الەۋمەتتىك جەلى مۇنى ەلگە تاراتۋدىڭ ەڭ ءتيىمدى جولى، سول ءۇشىن دە قۋانىشتىمىن.
تەك ايتىپ قانا قويماي، قانداي دا ءبىر ءىس جاساۋعا مۇمكىندىگىم بولادى دەپ ۇمىتتەنەمىن. بۇل ماسەلەگە قاتىستى ويىمدا ءبىرشاما جوسپارلار بار، ءدال قازىرگى ۋاقىتتا ناشاقورلىقپەن كۇرەس جۇرگىزەتىن قايىرىمدىلىق قور اشۋ ۇستىندەمىن. سول ىسكە جۇمىلدىراتىن بىلىكتى مامانداردى ىزدەپ، مەنىڭ باستاماما كومەكتەسەتىن ادامداردى ىزدەۋدەمىن. بۇل دەرتكە شالدىققان ءاربىر ادامعا كومەكتەسۋگە تىرىسامىن، سەبەبى ولاردىڭ جانىن مەن تۇسىنەمىن. ەڭ باستىسى ونداي كەزەڭدە ءوزىڭنىڭ جالعىز ەمەس ەكەندىگىڭە سەنىمدى بولۋ قاجەت جانە دە سەن بۇل دەرتكە شالدىققانداردىڭ ەڭ ءبىرىنشىسى دە، ەڭ سوڭعىسى دا ەمەستىگىڭدى ۇعىنعان ءجون. قازىرگى تاڭدا ادامدار ناشاقورلىقپەن كۇرەس جۇرگىزۋدە جاقسى تاجىريبە جيناپ العان. مەن Narcotics Anonymous قوعامداستىعىنا العىسىمدى بىلدىرەمىن.
وزىڭمەن كۇرەسۋ قاشان دا قيىن، مەن ءۇشىن بۇل كۇرەس ەڭ اۋىر دا قيىن كۇرەس بولدى. بارىنە قولىڭدى ءبىر سىلتەپ، بەرىلە سالۋ قاجەت پە، الدە بار كۇش-جىگەرىڭدى جيناپ اياعىنا دەيىن كۇرەسۋ كەرەك پە دەگەن ەكى ويدىڭ ورتاسىندا قالدىم. بۇل – ناعىز ىشكى جيحاد. قۋانىشىما وراي، ءۇمىت ساۋلەسى ءارقاشاندا كەۋدەڭدەگى قاراڭعىلىقتى جەڭىپ شىعادى.
ايسۇلتان نازاربايەۆتىڭ Facebook پاراقشاسىنان الىندى
