الماتى وبلىسى قاراساي اۋدانىندا ساۋلەتى قايتالانباس ەرەكشە "باتىر بابالار" مەموريالدى كەشەنى اشىلدى. "رۋحاني جاڭعىرۋ" باعدارلاماسى اياسىندا بوي كوتەرگەن نىساندى وبلىستىق اكىمدىك پەن ءوڭىر مەسەناتتارى بىرلەسىپ اتقاردى. جەمىستى جۇمىستىڭ سالتاناتتى اشىلۋىنا، قاراسايلىق جۇرتشىلىقتىڭ قۋانىشىن بولىسۋگە وبلىس اكىمى اماندىق باتالوۆ ارنايى قاتىستى.

جينالعان كوپشىلىكتى "باتىر بابالار" مەموريالدى كەشەنىنىڭ اشىلۋىمەن قۇتتىقتاعان ءوڭىر باسشىسى "رۋحاني جاڭعىرۋ" باعدارلاماسىن جۇزەگە اسىرۋ اياسىندا اتقارىلعان ماڭىزدى جوبالاردىڭ ءبىرى ەكەنىن اتاپ ءوتتى.

"مەملەكەت باسشىسى نۇرسۇلتان ءابىش ۇلى نازاربايەۆ اتاپ وتكەندەي، ەل تاريحىن، باتىر بابالارىمىزدىڭ ەسىمىن جادىمىزدا ۇستاۋ ەرتەڭىمىز ءۇشىن وتە ماڭىزدى. بۇگىنگى اشىلىپ وتىرعان مەموريالدى كەشەننىڭ جەتىسۋلىق وسكەلەڭ ۇرپاقتى وتانسۇيگىشتىككە تاربيەلەۋدەگى الار ورنى ەرەكشە بولاتىندىعىنا سەنىم بىلدىرەمىن"، - دەدى ايماق باسشىسى اماندىق عابباس ۇلى.

ىستىق ىقىلاستان كەيىن وبلىس اكىمى   كەشەننىڭ سالتاناتتى تۇردە لەنتاسىن قيۋ راسىمىنە قاتىستى.

مەسەنات، گەنەرال-مايور ا. شپەكبايەۆ، قاراساي اۋدانىنىڭ قۇرمەتتى ازاماتى س. جىلقىبايەۆ پەن ۋشينسكيي اتىنداعى ورتا مەكتەپتىڭ 8-سىنىپ وقۋشىسى د. شافحاتوۆ ءوز قۇتتىقتاۋلارىن جەتكىزدى.

مەموريالدى كەشەن ەكسپوزيسيالارى ءبىر ۇلكەن زالدان جانە ءۇش تاقىرىپتىق بولىكتەن تۇرادى. "ساق داۋىرىنەن الاش وردا ۇكىمەتىنىڭ قۇرىلۋىنا دەيىن"، "تاۋەلسىزدىككە جەتۋگە ەلەۋلى ۇلەس قوسقان اتاقتى حاندار مەن بيلەر" جانە "ەرلىگىمەن تۋعان جەردىڭ داڭقىن اسقاقتاتقان باتىرلار" دەپ اتالاتىن كەشەن جاس ۇرپاققا التىننان دا قىمبات قازىنا بولماق.

ەكسپوزيسيادا كەسكىلەسكەن ۇرىستار مەن ەل تاعدىرى قىل ۇستىندە تۇرعان الما-عايىپ زاماندا ءوزىنىڭ ەرلىگىمەن تالاي جاۋدىڭ بەتىن قايتارىپ، ۇلان عايىر اتىراپتى ۇرپاعىنا ساقتاپ قالعان اتاقتى حاندار مەن بيلەر، باتىرلار مەن ەل تاۋەلسىزدىگىنە ۇلەس قوسقان جانداردىڭ پورترەتتەرى بەينەلەنگەن. ەكسپوزيسيانىڭ ورتالىق تۇسىندا باتىر بابالارعا تاعزىم كورسەتۋدى اسپەتتەيتىن كومپوزيسيا بەينەلەنگەن.

بابالار رۋحىنا تاعزىم ەتۋ، جاس ۇرپاققا اتا-بابا ەرلىگىن پاش ەتۋ ماقساتىندا بوي كوتەرگەن كەشەننىڭ قۇرىلىسىن "داۋلەت سەرپىن 603" ج ش س مەردىگەر قۇرىلىس مەكەمەسى جۇرگىزدى. نىساننىڭ ورنالاسقان جالپى جەر اۋماعى - 1،04 گەكتاردى قۇرايدى. كەشەننىڭ اينالاسىنا دەكوراتيۆتى شىرشالار مەن كوشەتتەر وتىرعىزىلىپ، تولىقتاي اباتتاندىرىلعان. مۋزەي عيماراتى وبلىس مەسەناتتارىنىڭ قارجىسىنا، ال ىشكى ەكسپوزيسيالارىنىڭ قۇرىلىسى الماتى وبلىسى اكىمدىگىنىڭ تاپسىرىسى بويىنشا سالىندى. مەموريالدى كەشەندى كۇتىپ-ۇستاۋعا وبلىستىق مادەنيەت، ارحيۆتەر جانە قۇجاتتاما باسقارماسى جاۋاپتى.