5 قىركۇيەكتە نيدەرلاند كورولدىگىنىڭ ەكسپو-2017 كورمەسىنە قاتىسۋى اياسىندا گوللانديالىق جىلىجاي سەكتورىنىڭ تىزبەگىنە ارنالعان سەمينار ءوتتى دەپ حابارلايدى Qamshy.kz اقپارات اگەنتتىگى. اۋىلشارۋاشىلىق سالاسىنداعى 14-تەن اسا گوللانديالىق كومپانيا جىلىجاي سەكتورىنداعى زاماناۋي جوعارى تەحنولوگيالىق شەشىمدەر جونىندە اڭگىمەلەپ، قازاقستاننىڭ اۋىلشارۋاشىلىق سالاسىنداعى كاسىپكەرلەرىمەن جانە فەرمەرلەرمەن B2B كەزدەسۋلەرىن وتكىزدى. استاناداعى سەميناردان كەيىن دەلەگاسيا تالدىقورعانعا جانە الماتىعا بەت الادى. تالدىقورعاندا گوللانديالىق كاسىپكەرلەر جەرگىلىكتى اگرارشىلارمەن كەزدەسىپ، ال الماتىدا گوللانديالىق تەحنولوگيا نەگىزىندە جۇمىس جاسايتىن جىلىجايعا بارىپ قايتادى.
قازىرگى تاڭدا ساراپشىلار نيدەرلاندتىڭ جىلىجاي ءوندىرىسىن ەڭ كەڭ سۇرانىسقا يە ءارى زاماناۋي تەحنولوگيا رەتىندە مويىنداپ وتىر. وسىنىڭ ارقاسىندا نيدەرلاند شاعىن جەر اۋماعى مەن ازداعان حالىق سانىنا قاراماستان، اۋىلشارۋاشىلىق سەكتورىنداعى الەمدىك كوشباسشى رەتىندە ورنىن ساقتاپ كەلەدى. بۇگىنگى كۇنى نيدەرلاند كولەمى جاعىنان ەكىنشى ورىندا تۇرعان اۋىلشارۋاشىلىق ونىمدەرىن شىعاراتىن الەمدىك ەكسپورتشى، سونداي-اق، وسىمدىك شارۋاشىلىعىنداعى كوشباسشى ەل سانالادى.
استاناداعى سەمينار ماقساتى – نيدەرلاند پەن قازاقستاننىڭ اۋىلشارۋاشىلىق سالاسىنداعى ىنتىماقتاستىعىن نىعايتۋ. ءىس-شارانىڭ اشىلۋ سالتاناتىندا نيدەرلاند كورولدىگى ەلشىلىگىنىڭ الماتىداعى كەڭسەسىنىڭ باسشىسى ۆيلكو روگگەنكامپ جانە «اگرارلىق نەسيە كورپوراسياسى» اق باسقارما ءتوراعاسى نارمۇحان سارىبايەۆ ءسوز سويلەدى. سەمينارعا جىلىجاي سەكتورىندا قىزمەت جاسايتىن 14 گوللانديالىق كومپانيا جانە دە اۋىلشارۋاشىلىق سالاسىنداعى 100-دەن اسا قازاقستاندىق فەرمەر مەن مامان قاتىستى. سەمينارعا قاتىسقان گوللانديالىق كومپانيالاردىڭ جارتىسىنان كوبى ءقازىردىڭ وزىندە اگروبيزنەس سالاسىندا قازاقستانمەن ىنتىماقتاستىق جۇرگىزۋدە جانە دە ولار سالانىڭ الەۋەتىنە جوعارى باعاسىن بەرىپ وتىر.
«وسى ساۋدا ميسسياسىنىڭ ارقاسىندا گوللانديالىق كومپانيالار قازاقستاننىڭ اۋىلشارۋاشىلىق سالاسىنىڭ الەۋەتىن باعالاۋعا مۇمكىندىك الماق. ءوز كەزەگىندە 14 گوللانديالىق كومپانيانىڭ ەكسپو-2017 اياسىنداعى وسى سەمينارعا قاتىسۋى گوللانديالىق ساراپتاما مەن تەحنولوگيالاردىڭ ساپاسىن، سەنىمدىلىگىن جانە يننوۆاسيالىق قاۋقارىن بايقاتادى دەپ ۇمىتتەنەمىن»، - دەپ اتاپ ءوتتى نيدەرلاند ەكونوميكالىق ىستەر مينيسترلىگىنىڭ اگروبيزنەس سالاسىنداعى حالىقارالىق ىنتىماقتاستىق جونىندەگى ديرەكتورى ميحيل ۆان ەرەكەل.
بۇگىنگى كۇنى اۋىل شارۋاشىلىعى – كولەمى جاعىنان ەنەرگەتيكا سالاسىنان كەيىن ەكىنشى ورىنداعى نيدەرلاند پەن قازاقستاننىڭ ءوزارا ىنتىماقتاسىپ وتىرعان سالاسى. ماسەلەن، ەكى ەل اراسىندا ساۋدالانعان اۋىلشارۋاشىلىق جانە باعباندىق ءونىم كولەمى 2015 جىلى 100 ملن. ەۋرودان استى، ونىڭ ايتارلىقتاي بولىگى جىلىجاي شارۋاشىلىعىنداعى جوبالاردىڭ ۇلەسىنە تيەسىلى. قازىرگى تاڭدا گوللانديانىڭ اۋىلشارۋاشىلىق سالاسىنداعى 40-تان استام كومپانياسى قازاقستانمەن جەمىستى ىنتىماقتاستىق جۇرگىزۋدە.
ماسكەۋدەگى نيدەرلاند كورولدىگى ەلشىلىگىنىڭ اۋىل شارۋاشىلىعى سالاسىنداعى ماسەلەلەر جونىندەگى كەڭەسشىسى مەۋۆەس براۋەردىڭ ايتۋىنشا، گوللانديالىق بيزنەس قازاقستانداعى قىزمەتىن ارى قاراي دا كەڭەيتۋگە نيەتتى. «نيدەرلاند قازاقستانداعى نارىقتىڭ قاجەتتىلىكتەرىن قاناعاتتاندىرۋ ءۇشىن سىزدەردىڭ ەلدەرىڭىزبەن كوپ جىلداردان بەرى تابىستى ىنتىماقتاسىپ كەلەدى. نيدەرلاند – جوعارى ساپالى تۇقىمدار مەن كوشەتتەردى، زاماناۋي يننوۆاسيالىق تەحنولوگيالاردى جەتكىزىپ، اۋىلشارۋاشىلىق سالاسىن كاسىبي كونسالتينگپەن، ترەنينگتەرمەن قامتاماسىز ەتىپ وتىرعان بىردەن-بىر ەل»، - دەپ قوستى ول.
نيدەرلاند كورولدىگى ەلشىلىگىنىڭ گوللانديالىق بيزنەس وكىلدەرىنە جانە قازاقستاندىق فەرمەرلەرگە ارناپ وتكىزەتىن كەزدەسۋلەرى قاشاندا ۇلكەن سۇرانىسقا يە. بيىل بۇل ءىس-شارانى ەكسپو-2017 حالىقارالىق كورمەسى اياسىندا ۇيىمداستىرۋ تۋرالى شەشىم قابىلداندى.
بيىل ساۋدا ميسسياسىنا ءىرى گوللانديالىق كومپانيالار قاتىسۋدا، اتاپ ايتقاندا، ولاردىڭ اراسىندا AltroNova (تۇقىمدار)، Bom Group (دايىن جىلىجايلار كەشەنى)، Celtic Cooling (مۇزداتقىش جانە جەلدەتكىش جابدىقتار)، Certhon (جىلىجاي كەشەندەرى مەن جۇيەلەرى)، Dalsem (جىلىجاي جوبالارىن دايىنداۋ)، Enza Zaden Export B.V. (تۇقىمدار)، Hoogendoorn Growth Management (اۆتوماتتاندىرۋ جۇيەلەرى)، Hortilux Schréder (جىلىجايلارعا ارنالعان جارىقتاندىرۋ)، Koppert (وسىمدىكتەردى بيولوگيالىق قورعاۋعا ارنالعان قۇرالدار)، Philips Lighting Kazakhstan and Central Asia (جارىق تەحنيكاسى جانە جارىقتاندىرۋ)، Prime Horti Solutions LLP (جىلىجايلار جانە جىلىجايلارعا ارنالعان زاتتار)، Van den Bos Flowerbulbs (گۇل بادانالارى)، Van der Hoeven (اۋىل شارۋاشىلىعىنا ارنالعان دايىن جوبالار) سىندى كومپانيالار بار.
