EXPO-2017 ۇلتتىق كورمەسى اياسىندا وتەتىن بوكس دوداسىنا الماتى وبلىسىنان 100-دەن استام ادام اۆتوشەرۋمەن جول تارتتى، دەپ حابارلايدى Qamshy.kz اقپارات اگەنتتىگى.

استانادا 9 قىركۇيەكتە قانات يسلام مەن برەندون كۋكتىڭ جەكپە-جەگى وتەدى. سونىمەن قوسا، جانقوش تۇراروۆ، رۋسلان مىرساتايەۆ، جانىبەك ءالىمحان ۇلى، ءالي احمەدوۆ سىندى بوكسشىلار شارشى الاڭدا ءوز باقتارىن سىنايدى. الماتى وبلىسىنان شىققان جانكۇيەرلەر وزدەرىن «قازاق باتىرلارىن قولداۋعا شىقتىق» دەپ سيپاتتايدى.

تالدىقورعاندا قايىرىمدىلىقپەن اينالىسىپ، كوشى-قون ماسەلەسىندە قانداستارعا قۇقىقتىق كومەك كورسەتىپ جۇرگەن قوعام بەلسەندىسى داۋلەتجان شايماران باستاعان جانكۇيەرلەر «قامشى» تىلشىسىنە استاناعا «3 اۆتوبۋس، 6 جەڭىل كولىكپەن جانكۇيەرلەردىڭ اتتانعانىن» حابارلادى.

ايتا كەتەتىن بولساق، ساناۋلى كۇننەن كەيىن 33 جاسقا تولاتىن قانداسىمىز قانات يسلام سوڭعى كەزدەسۋىن امەريكانىڭ دەلاۆەر شتاتى ۋيلمينگتون قالاسىندا برازيليالىق بوكسشى روبسون اسسيسپەن وتكىزىپ، قارسىلاسىن العاشقى مينۋتتا-اق قۇلاتىپ سالعان بولاتىن.

قانات يسلام كاسىپقوي بوكسقا 2012 جىلى اۋىسىپ، سول ۋاقىتتان بەرى ەشكىمگە دەس بەرگەن جوق. ول ءوزى وتكىزگەن 24 كەزدەسۋدىڭ بارلىعىندا جەڭىسكە جەتتى. 20 رەت قارسىلاسىن نوكاۋتقا ءتۇسىردى. سوڭعى كەزدەسۋى قانداسىمىزدىڭ اقش جەرىندە وتكىزگەن ءتورتىنشى جەكپە-جەگى. ول WBO Intercontinental جانە WBA Fedelatin تۇجىرىمدارى بويىنشا الەم چەمپيونى.

ءوزىنىڭ اشىق جاتتىعۋى اياسىندا قانات يسلام تىلشىلەرگە بەرگەن سۇحباتىندا «ءبىزدىڭ جاتتىعۋ لاگەرىمىز كەرەمەت بولدى. وز-وزىمە سەنىمدىمىن جانە جەڭىسكە جەتۋگە دايىنمىن. الدا بولاتىن جەكپە-جەكتى تاعاتسىزدانا كۇتىپ ءجۇرمىن. بۇل – مەنىڭ ءۇيىم جانە مەن جەڭەمىن»، – دەگەن ەدى.