قازاقستان پرەزيدەنتى پولشا رەسپۋبليكاسىنىڭ پرەزيدەنتى اندجەي دۋدامەن كەڭەيتىلگەن قۇرامدا كەزدەسۋ وتكىزدى. بۇل تۋرالى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى. 

كەزدەسۋ بارىسىندا مەملەكەت باسشىسى بىلتىر ۆارشاۆاعا جاساعان ساپارىنىڭ ناتيجەلەرىن اتاپ ءوتتى. وندا قازاقستان-پولشا بيزنەس-فورۋمى اياسىندا قۇنى 1 ميلليارد دوللارعا جۋىق 15 كوممەرسيالىق قۇجاتقا قول قويىلىپ، قازاقستان مەن پولشا اراسىندا تىكەلەي اۋە قاتىناسىن ورناتۋ جونىندە ۋاعدالاستىققا قول جەتكىزىلدى.

نۇرسۇلتان نازاربايەۆ وتكەن جىلدىڭ وزىندە قازاقستاندا پولياك كاپيتالىنىڭ قاتىسۋىمەن 10 كاسىپورىن ىسكە قوسىلىپ، 100 ميلليون دوللارعا جۋىق ينۆەستيسيا سالىنعانىن ايتتى.

– بيىل پولشا ەكونوميكاسى قازاقستان ەكونوميكاسى سياقتى 4%-عا دەيىن ءوسۋى مۇمكىن. بۇل ءوسىم بىزگە بولاشاققا زور ۇمىتپەن قاراۋعا مۇمكىندىك بەرەدى. قازاقستان مەن پولشانىڭ ترانسفورماسيالانۋ جولدارى ۇقساس. ناتيجەسىندە، حالىقتارىمىزدىڭ ءال-اۋقاتى ارتىپ وتىر، – دەدى قازاقستان پرەزيدەنتى.

نۇرسۇلتان نازاربايەۆ قازاقستاندا بيزنەسمەندەر مەن ينۆەستورلار ءۇشىن جاسالىپ جاتقان جاعدايلارعا نازار اۋدارىپ، ساۋدا-ەكونوميكالىق سالاداعى كووپەراسيانى ودان ءارى كەڭەيتۋدىڭ ماڭىزدىلىعىن ەرەكشە اتاپ ءوتتى.

– حالىقارالىق ۇيىمدار قازاقستانداعى ينۆەستيسيالىق كليمات ەڭ قولايلى دەپ سانايدى. ءقازىر بىزدە شەتەلدىك ينۆەستورلارمەن جۇمىس ىستەيتىن «قازاق ينۆەست» كومپانياسى قۇرىلدى. سونداي-اق، «ەكسپو» كورمەسى اياقتالعان سوڭ «استانا» حالىقارالىق قارجى ورتالىعى جۇمىسىن باستايدى. وندا اعىلشىن قۇقىعى قولدانىلاتىن بولادى. الەمدىك قارجى ينستيتۋتتارىنىڭ بارلىعى دەرلىك «استانا» حالىقارالىق قارجى ورتالىعىمەن جۇمىس ىستەۋگە كەلىسىم بەرىپ وتىر، – دەدى قازاقستان پرەزيدەنتى.

مەملەكەت باسشىسى قازاقستان پولشا ءۇشىن وڭىردەگى باستى ساۋدا سەرىكتەسى ءارى ورتالىق ازيا مەن ەۋرازيالىق ەكونوميكالىق وداق ەلدەرى نارىعىنا شىعاتىن سەنىمدى پلاسدارم بولىپ سانالاتىنىن ايتتى.

اندجەي دۋدا نۇرسۇلتان نازاربايەۆتىڭ بىلتىرعى پولشاعا جاساعان ساپارى ەكى مەملەكەت اراسىنداعى ساۋدا-ەكونوميكالىق قارىم-قاتىناستى جاقسارتۋعا سەرپىن بەرگەنىن اتاپ ءوتتى.

– ءبىز بىرلەسە كۇش جۇمىلدىرۋىمىزدىڭ ارقاسىندا تاۋار اينالىمىنىڭ جوعارى دەڭگەيىنە قول جەتكىزە الاتىنىمىزعا سەنىمدىمىن. سونداي-اق، «ەكسپو-2017» كورمەسىنە قاتىسىپ، پولشا مەن قازاقستان پاۆيلوندارىن كورۋگە مۇمكىندىك جاسالعانى ءۇشىن ريزاشىلىق بىلدىرەمىن. بۇل كورمە جاڭارتىلاتىن ەنەرگيا كوزدەرىنە جانە شيكىزاتتىڭ ءداستۇرلى كوزدەرىن قورشاعان ورتا ءۇشىن ءقاۋىپسىز قولدانۋعا بايلانىستى زاماناۋي تەحنولوگيالاردى كورسەتۋگە مول مۇمكىندىك بەرەدى، – دەدى پولشا پرەزيدەنتى.

كەزدەسۋ سوڭىندا مەملەكەتتەر باسشىلارى بۇقارالىق اقپارات قۇرالدارىنىڭ وكىلدەرى ءۇشىن بىرلەسكەن بريفينگ وتكىزدى. قازاقستان پرەزيدەنتى جۋرناليستەر الدىندا سويلەگەن سوزىندە قازاقستان مەن پولشا اراسىنداعى ءوزارا قارىم-قاتىناس 25 جىل ىشىندە ديپلوماتيالىق بايلانىستار ورناعان ساتتەن بەرى دامىپ كەلە جاتقانىن اتاپ ءوتتى. 

– ءبىزدىڭ ەلدە پولشا كاپيتالىنىڭ قاتىسۋىمەن 115 كاسىپورىن جۇمىس ىستەۋدە، 200 ميلليون دوللاردان استام تىكەلەي ينۆەستيسيا سالىندى. ماشينا جاساۋ، اۋىل شارۋاشىلىعى، ەنەرگەتيكا، حيميا، كولىك، قۇرىلىس سالالارىنىڭ پەرسپەكتيۆاسى زور، – دەدى قازاقستان پرەزيدەنتى.     

نۇرسۇلتان نازاربايەۆ ازيا مەن ەۋروپا اراسىندا جۇكتى جەدەل جەتكىزۋ ءۇشىن زاماناۋي كولىك ينفراقۇرىلىمىن قالىپتاستىرۋعا باعىتتالعان جوبالاردى بىرلەسە ىسكە اسىرۋعا دايىن ەكەنىمىزدى ءبىلدىردى. 

مەملەكەت باسشىسى سونداي-اق عىلىم مەن ءبىلىم بەرۋ جانە مادەني-گۋمانيتارلىق سالالارىندا ەكى ەل اراسىنداعى بايلانىستاردى دامىتۋ ماسەلەلەرىنە توقتالدى.

بۇدان بولەك، قازاقستان پرەزيدەنتى پولشا پرەزيدەنتىنە قازاقستان رەسپۋبليكاسىنىڭ ەۋروپالىق وداقپەن كەڭەيتىلگەن سەرىكتەستىگى جانە ىنتىماقتاستىعى جونىندەگى كەلىسىمدى راتيفيكاسيالاعانى ءۇشىن العىس ايتىپ، پولشانىڭ 2018-2019 جىلدارداعى  بۇۇ قاۋىپسىزدىك كەڭەسىنىڭ مۇشەلىگى كەزەڭىندە حالىقارالىق كۇن تارتىبىندەگى وزەكتى ماسەلەلەردى شەشۋ ءۇشىن بىرلەسە جۇمىس اتقارۋدىڭ ماڭىزدىلىعىن اتاپ ءوتتى.   

پولشا پرەزيدەنتى ەكى ەلدىڭ بىرلەسكەن ءىس-قيمىلى ەكونوميكالىق قارىم-قاتىناستاردى ىلگەرىلەتىپ، ونى جاڭا دەڭگەيگە كوتەرۋگە مۇمكىندىك بەرەتىنىنە سەنىمدى ەكەنىن ايتتى. 

– ءبىز قازاقستان-پولشا قارىم-قاتىناستارىن جاقسارتۋعا باعىتتالعان جولمەن ءجۇرىپ كەلەمىز. مەن قازاقستان پرەزيدەنتىنە پولشانىڭ كانديداتۋراسىن بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋعا قولداۋ بىلدىرگەنى ءۇشىن العىس ايتامىن. ءبىز وسى ۇيىمداعى جۇمىسىمىزدا قازاقستاننىڭ تاجىريبەسىن پايدالاناتىن بولامىز. بۇۇ قاۋىپسىزدىك كەڭەسىندەگى قازاقستاننىڭ ءرولى اسا ماڭىزدى. اسىرەسە، ەلدەرىڭىزدىڭ سيرياداعى قاقتىعىستى بەيبىت رەتتەۋ جونىندەگى ءتيىمدى ميسسياسىن ەرەكشە اتاپ وتكىم كەلەدى، – دەدى ا.دۋدا.

ايتا كەتسەك، پولشا پرەزيدەنتىنىڭ قازاقستانعا مەملەكەتتىك ساپارى اياسىندا تومەندەگىدەي قۇجاتتارعا قول قويىلدى:

– «جاسىل كوپىر» ارىپتەستىك باعدارلاماسى تۋرالى حارتيا؛

– قازاقستان رەسپۋبليكاسى ۇلتتىق ەكونوميكا مينيسترلىگى مەن پولشا رەسپۋبليكاسى دامۋ جانە قارجى مينيسترلىگى اراسىنداعى ەكونوميكالىق ىنتىماقتاستىق تۋرالى كەلىسىم.